Meeqqanut akilersuutit kommuninut kommunillu innuttaanut nanertuutaasussaanngillat!

Naalakkersuisunut ammasumik allakkat aappassaat:
Siullermik Isumaginninnermut Naalakkersuisoq qujaffigissavakkit aaqqiissutissaasinnaasut pillugit kommunit oqaloqatiginissaannut piumassuseqaravit, matumanimi pineqartumi aaqqiissuteqarnissaq pisariaqavippoq nukingernarlunilu.
22. september 2017 Bormesterip naalakkersuisunut allagaa ammasoq imm. 2 200917

Asasakka Naalakkersuisut, matumani pingaartumik Aningaasaqarnermut Naalakkersuisoq aammalu Isumaginninnermut Naalakkersuisoq,

Siullermik Isumaginninnermut Naalakkersuisoq qujaffigissavakkit aaqqiissutissaasinnaasut pillugit kommunit oqaloqatiginissaannut piumassuseqaravit, matumanimi pineqartumi aaqqiissuteqarnissaq pisariaqavippoq nukingernarlunilu.

Soorlu allakkanni siullermi ersarissumik oqaatigiga, siunertarinngilara meeqqanut akilersuutit atorunnaarsinneqassasut. Siunertaraarali kommuninut nammakkersuutaanngitsumik aaqqiissuteqartoqassasoq, tamannalu pissappat Inatsisartut peqqussutaat nr. 2. 3. marts 1994-meersoq kingusinnerusukkullu allannguuteqartinneqartoq atorunnaarsiutigalugu nutaamik naapertuunnerusumik taarserneqartariaqarpoq.

Piviusuuvoq kommunit pinngitsoqaratik – minnerunngitsumillu Kommuneqarfik Sermersooq ilanngullugu - ullumikkut aningaasaqarnerminnut ukiut tamaasa ajorseriaatigisarmassuk. Tamanna pivoq naak massa Naalakkersuisut akiliutaasussat pillugit aalajangersaasuusut aammalu Naalakkersuisut aaqqissuussinermi akisussaasuusut.

Nunarput nunanut allanut nallersuunniartarparput, matumanilu nunat avannarliit qiviaannarutsigit Danmark-imi, Norgemi, Sverigemilu meeqqanut akilersuutinik kommunit nammatassinneqarneq ajorput. Siumoortumimmi meeqqanut akiliutit tamarmik naalagaaffiup karsianit matussuserneqartarput, pilersuisussaatitaasorlu kinguaattooruteqarsimappat naalagaaffiup kinguaattoortullu akornanni iluarsiniarneqartarpoq.

Aaqqiissutaasinnaasut assigiinngitsuupput, meeqqamut akilersuisussaatitaasup akilinngitsuugaannut tunngatillugu aammalu meeqqat atugarissaarnissaat qulakkeerniarlugu pisortat tapiissutigisartagaat pineqartillugit.

Meeqqamut akiliutinik pisinnaatitaaffeqartup akiliutinik pissarsinissaanut qulakkeerininniutinut tunngatillugu, takorloorneqarsinnaavoq aaqqiissutit uku atuutsinneqalersinnaasut:

  • Meeqqanut akiliutissat akilertinniarneqarnerat kinguaattoorutillu akilersinniarneqarnerat akiitsunut allanut sanilliullugit pingaarnerusunngortinneqarsinnaapput.
  • ”Savalimmiuni aaqqiissut”-ip ilaa nunatsinnut naleqqussarlugu atuutsilersinneqarsinnaavoq, akilersuisussap akiligassai akiitsuilu akileraarummut siumoortumik nalunaarutiginninnermi ilanngullugu naatsorsorneqartalersillugu.

Ersarippoq meeqqamut akiliutip siumoortumik akilersortinneqartarneranut tunngatillugu inatsit equngassuteqarmat. Inatsimmi allaqqavoq, ”aningaasartuutit allat” kommunip tunniussisuusup aningaasartuutigissagai. Kommunimi siumoortumik tunniussinermini aningaasartuuteqalertarpoq akilersuisussaasorlu kommunimut akiitsoqalertarluni, tamatuma malitsigisaanik kommunit ataatsimoortumik tapiissutit aqqutigalugit kommunit aningaasartuutaat matussuserneqarneq ajorpoq, taamaalillunilu kommuninut akiitsut qaffakkaluttuinnartinneqarlutik, taamaammallu meeqqamut akilersuutit isumaginninnermut tapiissuteqarnertut ingerlatiinnarneqassappata (naak massa taamaattuunngikkaluartut!), aaqqiissutaasinnaasut arlaqarput:

  • Periarfissaavoq, kommunit siumoortumik tunniuttagaat aningaasartuutivittut isigineqalernissaat, ataatsimoortumik tapiissutit aqqutigalugit matussuserneqartalersillugit, taamaalillunilu Namminersorlutik Oqartussat akiitsullip toqqaannartumik pisussaaffeqarfigilissavai.

  • Taamatuttaaq takorloorneqarsinnaavoq, Namminersorlutik Oqartussat Kommunillu akornanni nammagassat suliassallu pillugit isumaqatigiissut allanngortinneqarsinnaasoq, taamaaliornikkut siumoortumik akilersuutit Namminersorlutik Oqartussat tamakkiisumik nammineq isumagisarilerlugu.

Qanorluunniit ikkaluarpat pisariaqarpoq nutaamik eqqarsarnissaq aammalu inuiaqatigiinni ajornartorsiutaasup aaqqiiviginissaanut immikkut iliuuseqarnissaq, taamatuttaaq aaqqiissutaasinnaasut allat aamma isumaliutigineqartariaqarput.

Qularutigineqassanngilaq Namminersorlutik Oqartussat angajoqqaallu pilersuisussaatitaasut akornanni pisariaqartinneqarpat kommuni akunnermiliuttutut ikiuukkusummat, taamaattorli aningaasartuutinut tunngatillugu kommunip nammakkersorneqartarnera kommunimut innuttaasunullu pitsaanngitsumik kinguneqartaqisoq siunissami atuutissanngitsoq qulakkeerneqartariaqarpoq.

Inussiarnersumik inuulluaqqusillunga

 

Kiista P. Isaksen (S)
Borgmesteri