Meeqqanut akilersuutit kommuninut kommunillu innuttaanut nanertuutaasussaanngillat!

Inatsisartut peqqussutaat nr. 2. 3. marts 1994-meersoq aalajangiunneqarmat, kingumut kommunit pisussaaffilerneqaqqipput meeqqanut akilersuutinut siumoortumik akiliisussaq sinnerlugu aningaasalersuisussaatitaallutik, tamannalu taamanili kommunit aningaasaqarneranut annertuumik nanertuutinngortinneqarput.
21. september 2017 Bormesterip naalakkersuisunut allagaa ammasoq 180917

Asasakka Naalakkersuisut, matumani pingaartumik Aningaasaqarnermut Naalakkersuisoq aammalu Isumaginninnermut Naalakkersuisoq,

Inatsisartut peqqussutaat nr. 2. 3. marts 1994-meersoq aalajangiunneqarmat, kingumut kommunit pisussaaffilerneqaqqipput meeqqanut akilersuutinut siumoortumik akiliisussaq sinnerlugu aningaasalersuisussaatitaallutik, tamannalu taamanili kommunit aningaasaqarneranut annertuumik nanertuutinngortinneqarput. Tamanna pivoq naak massa inatsisit malillugit meeqqanut akiliutit annertussusissaat Naalakkersuisunit akisussaaffigineqarlunilu aalajangersarneqartaraluartoq. Pissutsit taamaannerisa kingunerisaanik inerniliisoqarsinnaavoq nunatta karsia kommunit aningaasatigut nammatassaannik annertuumik pilersitseqataasartoq.

Ukiut amerlasuut ingerlanerini Kommune Kujallermit, allaallu qanga Narssap Kommunerisimasaani uanga borgmesteriunerma nalaanili, Naalakkersuisunut qaqugukkulluunniit issiasunut ajornartorsiut aaqqiivigineqaqqullugu noqqaassuteqartuaraluarpugut, kingullermilli tamanna pivoq ”Akiitsut akiitsunillu akilersuineq” februar 2015-mi saqqummertumi Naalakkersuisut nassuiaataanni, Kommune Kujallermit imaattumik kaammattuuteqaratta:

” Kommune Kujalliup tamanna isumaliutigissallugu pissutissaqarluarsoraa, tassalu akilersuutit kommuninit Namminersorlutik Oqartussanut nuunneqarunik aamma angajoqqaat akunnerminni aaqqitassaat eqqartuussivinnut suliassanngorlugit nuunneqarunik iluaqutaassannginnersut? Akilersuutit kommuninit Namminersorlutik Oqartussanut nuunneqarnissaannut manna tunngavilersuutigineqarsinnaavoq, tassalu kommunit akornanni annertuumik nutserarnerup kingunerisaanik kommunit akilersuinermik qulakkeerinnissinnaasannginnerat.”

Piviusormi tassaavoq meeqqanut akilersuutinut innuttaasut akiitsui ukiut tamaasa qaffakkaluttuinnarmata. Kommune Kujallermut tunngatillugu akiitsut tassunga tunngasut agguaqatigiissillugu ukiumut 3 mio. kr. missaannik qaffattarput maannalu katillugit kommunip karsianut akiitsut 56,3 mio. kr.-iupput.

Taamaannat Qeqqata Kommuniani Borgmesteri isumaqatigilluinnarpara Naalakkersuisunut Inatsisartunullu kaammattuuteqarmat Inatsisartut Peqqussutaat taamatut isikkoqartillugu atorunnaarsinneqartariaqartoq. Aningaasarpassuimmi Kommunit innuttaminnut sullissinerminnut pitsanngoriaatinut atugassaralui kommuninut pinngitsaaliissummik akiitsunnguutsinneqartarput.

Taamaattorli meeqqap/meeqqat isumassorneqarnissaat eqqugaaqqunagu aammalu qulakkeersimaneqartariaqarmat ilanngullugu Naalakkersuisunut Inatsisartunullu ilanngullugu kaammattuutigissavara peqqussummik naapertuunnerusumik kommuninullu aningaasartuutaangitsumik taarserneqassasoq, matumani aamma ilanngullugu eqqaasitsissutigissavara meeqqanut akilersuutit Naalakkersuisunit akisussaaffigineqarmata aammalu akiliisitsiniartarneq Namminersorlutik Oqartussaniimmat.

 

Inussiarnersumik inuulluaqqusillunga

 

Kiista P. Isaksen (S)
Borgmesteri