Perorsaasut akissarsiatik pillugit naammaginninnginnerat Kommune Kujalleq paasinnissinnaalluarpoq, taamaattorli kaammattuutigissavarput isumaqatigiinniarnerni illuatungeriit, Naalakkersuisut Perorsaasullu kattuffiat pineqartoq pillugu saaffigissagaat

Ulluni makkunani pisoq, tassalu Qaqortumi ulluunerani meeqqanut paaqqinnittarfinnik matoqqatitsisuusaarneq, paaqqinnittarfiit aqutsisuisa aaqqissugaat, annikinngitsumik angajoqqaanut meeqqanullu Qaqortumiittunut toqqissisimannginnermik pilersitsivoq.
Kommune Kujalliup tungaanit ulluunerani paaqqinnittarfiit aqutsisuinut paasitinniarneqaraluarpoq taamak annertutigisumik iliuuseqarneq aaqqiissummut tamanut naammaginartumut qanillattuutaanavianngitsoq, matumanimi eqqaamaneqassammat namminneq kattuffitsik aammalu Naalakkersuisut tassaammata perorsaasut akissarsiaannut sulinerminnilu atugaannut isumaqatigiinniartartuusut.
12. oktober 2017

Naalakkersuisut aammalu illuatungaani NPK-p isumaqatigiissutaat 14. september 2017 naqissuserneqarnikuusoq 2016-ip 2020-illu akornanni atuuttussaasoq Kommune Kujalliup tungaanit sukumiisumik qimerloorparput. Tassami kommune nammineq isumaqatigiinniarnernut toqqaannartumik nammineq peqataasimanngikkaluartoq taamaattoq kommune tassaassagami ulluunerani paaqqinnittarfinni sulisunut akissarsiaqartitsinermigut aningaasartortussaq, tassungalu tunngatillugu naqissuserlugu oqaatigissavara isumaqatigiissut nutaaq naapertorlugu perorsaasunut kingumoortumik akissarsiat iluarsiissutissaat tunniuneqartussanngormata.

Matumani pineqartoq pillugu paasivarput Aningaasaqarnermut Naalakkersuisoq Aqqaluaq Biilmann Egede, isumaqatigiissutip nutaap atuutilerneraniit qaammataanngitsorluunniit qaangiummat maanna neriorsuuteqartoq perorsaasut akissarsiaat iluarsiivigineqartariaqartut. Tassungalu tunngatillugu matumuuna Naalakkersuisunut ilaasortaq qinnuigissavara nassuiaateqaqqullugu taamatut oqaaseqarnera ima paasisariaqarnersoq Naalakkersuisut NPK-mut isumaqatigiissutertik atortussaajunnaartikkat?

Kommune Kujalleq qinersivimmi matumani atuuttumi siunertaqarpoq ilaqutariinnut meerartalinnut inuuffigiuminarnerpaassalluni. Kommunitsinni meeraaneq toqqissisimanartuussaaq, angajoqqaajuneq kommunitsinni toqqissisimanartuussaaq aammalu kommunitsinni suliffeqarnissaq toqqissisimanartuussaaq, pingaartumik sulisut inulerisut perorsaasullu toqqissillutik sulifffigisinnaassavaat. Taamaammat perorsaasunut aammalumi ilaqutariinnut meerartalinnut atugarissaartitsiumanerput annertoorujusuuvoq.

Tassunga tapiliullugu assersuutitut ilanngukkusuppara kommunitsinni meeqqerivigissarniarnerput qanoq ilungersunartiginersoq. Nutaanik meeqqeriviliorusuppugut, meeqqeriviit iluarsaassassaasut iluarsaatsikkusuppagut, taamaammallu ukiuni kingullerni aningaasanik illuartitsisaraluarpugut Naalakkersuisulli tamanna qaangiataaginnartarpaat. Unittoortitaanitsinnummi pissutaavoq meeqqeriviit nutaamik sanaartorneqassappata imaluunniit annertuumik iluarsaanneqassappata kommunip Naalakkersuisullu avitseqatigiillutik aningaasaliisussaasarmata, taamaammat uniffilersorneqarnerput anigorniarlugu akisussaaffik tamakkiisumik kommunimit tigorusupparput.

Taamaattorli aningaasarsianut sulinermilu atugassanut tunngatillugu sinaakkutissat isumaqatigiissutini allassimasussaapput, isumaqatigiissullu qanittunnguami atuutsilersinneqartoq 2020-ip tungaanut atuuttussaavoq, taamaassanngippallu Naalakkersuisut NPK-mut nutaamik isumaqatigiinniarnissaminnik neqerooruteqartariaqassapput, taamaammat pisariaqartippara Naalakkersuisut pisut pillugit nassuaateqarnissaat.

Pissutsilli qanorluunniit ikkaluarpata kommunip ulluunerani paaqqinnittarfiini pisortat sulisullu aamma kaammattussavakka isumaqatigiissut pingaarneq tunngavigalugu iliuuseqassagunik iliuuseqartaqqullugit, taamaalillutami suleqatigiilluta sinaakkutissat pitsaasut anguniarnerusinnaagatsigit, ataqqeqatigiinneq paaseqatigiinneq aammalu oqaloqatigiinneq sakkugalugit.

  Inussiarnersumik inuulluaqqusillunga

  Kiista P. Isaksen (S)
Borgmesteri