Averuserneq

Nalinginnaasumik paasissutissiineq 

Illit, aappallu katissimasavit marluullusiluunniit inooqatigiikkunnaarnissaq siunniussimagussiuk, averusernissamut pisinnaatitaaffeqarpusi. Avinnissamik qinnuteqaateqannginnissinni sivikinnerpaamik qaammatini arfinilinni averuseqqareersimanissarsi nalinginnaasumik piumasaqaataavoq.

Katissimanerup/nalunaarsukkamik inooqatigiinnerup nalaani inatsisitigut sunniutit averusernissinni atorunnaarsinneqartarput. Matumani pineqarput suulluunniit nalillit ataatsimut pigisat, kingornussisussaatitaaneq imminnullu ilumoorfigeqatigiittussaatitaaneq. Taamaakkaluartoq katissimanersi/nalunaarsukkamik aappariinnersi atuutiinnarallassaaq.

Averuseqqanerup nalaani inooqatigeeqqilerussi averusersimaneq atorunnaartarpoq katissimanerullu/nalunaarsukkamillu aappariinnerup nalaanisulli inatsisitigut sunniutit tamarmik atuutilerseqqinneqartarput. Averusersimanersi atorunnaarsimappat tamanna nalunaarsortikkumallugu kommunimut saaffiginnissaasi.

Suliaq averusernermut tunngasoq eqqartuussivimmi aamma Naalagaaffiup Sinniisoqarfiani ataatsikkut ingerlanneqarsinnaanngilaq.

Qinnuteqarneq 

Averuserneq Naalagaaffiup Sinniisuanit imaluunniit eqqartuussivimmi aalajangiinikkut akuersissutigineqarsinnaavoq.

Naalagaaffiup Sinniisoqarfia aqqutigalugu averusersinnaavusi:
• Marluullusi averusernissaq kissaatigigussiuk
• Averusernermi atugassarititaasut isumaqataaffigigussigit

Eqqartuussivimmut saaffiginnissaasi:
• Aappaasoq kisimiilluni averuserusuppat
• Atugassarititaasunut tunngasut aaqqiagiinngissutigigussigit

Naalagaaffiup Sinniisoqarfia aqqutigalugu averusernissaq qinnutigerusukkussiuk immersugassaq atorlugu qinnuteqaateqassaasi.

Averusernissamut/Avinnissamut immersuiffissaq

Aamma immersuiffissaq Kalaallit Nunaanni Naalagaaffiup Sinniisoqarfianut nammineerlutit aasinnaavat, Nuummiinngikkuillu najukkami politeeqarfimmut aasinnaallugu.

Uppernarsaatit atorfissaqartinneqartut tamarmik qinnuteqaammut ilanngutissavasi. Uppernarsaatit suut ilanngutissanerisi immersugassami allanneqarsimapput. Uppernarsaatit pisariallit tamarmik ilanngussimagussigit aatsaat suliaq ilissinnut tunngasoq Naalagaaffiup Sinniisoqarfiata suliarilersinnaavaa.

Nuummi najugaqarussi qinnuteqaat uppernarsaatinik atorfissaqartinneqartunik tamanik ilalik Naalagaaffiup Sinniisuanut nassiunneqassaaq. Nuummi najugaqanngikkussi taakkua najukkami politeeqarfimmut tunniutissavasi.

Atugassarititaasut pillugit oqaloqatigiinneq 

Qinnuteqaatitut immersugassaq politeeqarfimmut imaluunniit Naalagaaffiup Sinniisoqarfianut tunniutereerussiuk atugassarititaasut pillugit oqaloqatigiinnissamut aggersarneqassaasi. Atugassarititaasut pillugit oqaloqatigiinnermi makkua oqaloqatigiissutigineqassapput aamma isumaqatigiittoqarsinnaavoq:
• Meeqqanut akiliut
• Aapparisamut akiliut
• Inissiamik attartukkamik ataatsimoorussisinnaatitaaneq

Atugassarititaasut pillugit oqaloqatigiinnermi averusernissamut isumaqatigiittoqarpat averusernermut akuersissummik tunniussisoqassaaq. Akuersissummi allaqqassaaq ulloq averuserfik. Isumaqatigiittoqanngippat averusernissamut itigartitsissummik tunniussisoqassaaq eqqartuussivimmullu innersuussisoqarluni.
Kingusinnerusukkut avinnissaq kissaatigineqarpat, taava tamanna nammineerluni qinnutigineqassaaq. Malittarisassat avinnermut tunngasut uani atuarneqarsinnaapput.

Kommune Kujalleq
Postboks 514
3920 Qaqortoq
Oqarasuaat: 704 100
Fax: 704 177
E-mail: kommune@kujalleq.gl
Nittartagaq: www.kujalleq.gl

Naalagaaffiup Sinniisoqarfia
Indaleeqqap Aqq. 3
Postboks 1030
3900 Nuuk

Oqarasuaat: (+299) 32 10 01
E-mail: ro@gl.stm.dk
Nittartagaq: www.rigsombudsmanden.gl