airplanebooksbriefcase business cogs cross election entertainment fish house law lockmedicalpeopleselfservices socialtax

Aalisarnissamut akuersissummik qinnuteqarneq

Nalinginnaasumik paasissutissiineq 

Aalisarnissamut akuersissut tassaavoq inuussutissarsiutigalugu aalisarnissamut akuersissut. Pisassiisoqarneratigut killilersuiffigineqartunik aalisakkanik inuussutissarsiutigalugu aalisarnermik ingerlatserusuttut tamarmik akuersissuteqassapput. Inuttut ataasiusutut imaluunniit ataatsimoorfiusumi inuttut ataasiusutut imaluunniit aktianik ingerlatseqatigiiffimmi, piginneqataalluni ingerlatseqatigiiffimmi, piginneqatigiilluni ingerlatseqatigiiffimmi imaluunniit umiarsuaatileqatigiiffimmi ingerlatseqatigiiffittut akuersissummik qinnuteqartoqarsinnaavoq.

Aalisarnissamut akuersissutit assigiinngitsut sisamat atulersinneqarsinnaapput
• 1) Piffissamut killilikkamut akuersissutit pisarineqarsinnaasunik annertunerpaaffillit
• 2) Piffissamut killiligaanngitsumut akuersissutit pisarineqarsinnaasunik annertunerpaaffillit
• 3) Piffissamut killilikkamut akuersissutit pisarineqarsinnaasunik annertunerpaaffeqanngitsut
• 4) Piffissamut killiligaanngitsumut akuersissutit pisarineqarsinnaasunik annertunerpaaffeqanngitsut
• Naalakkersuisuniit akuersissummik pissarseqqaarnatik nunani allaneersut aalisartut Kalaallit Nunaata aalisarnikkut oqartussaaffiani aalisarsinnaanngillat
• Sinerissamut qanittumi aalisarsinnaanermut angallatip angissusaanut anginerpaaffimmik imaluunniit minnerpaaffimmik piumasaqaateqarpoq aamma avataasiorluni aalisarnissamut angallatit angissusaannut minnerpaaffimmik piumasaqaateqarpoq apeqqutaallu aalisakkat suut aalisarneqarnersut. Kalaallit Nunaata sineriaani inuussutissarsiutigalugu aalisarnermi angallatit uku atorneqarsinnaapput:
• Umiatsiaaqqat akuerisaasut 6 meterinik annerpaamik angissuseqassapput taassuminngaluunniit naannerullutik.
• Aqutsivinni Qeqertarsuup Tunuani, Uummannami Upernavimmilu sinerissamut qanittumi qaleralinniarnermi angallatit atorneqarsinnaasut annerpaamik 19,99 BRT/31,99 BT-imik angissuseqassapput naanerullutilluunniit.
• Sinerissamut qanittumi saarullinniarnermi, qaleralinniarnermi raajarniarnermilu angallatit atorneqarsinnaasut annerpaamik 75 BRT/120 BT-inik angissuseqassapput imaluunniit aalisakkanut allanut taanna ataallugu.
• Saarullinniarnermi, qaleralinniarnermi, raajarniarnermi avaleraasartoorniarnermi aalisakkanilu allanik avataasiorluni aalisarnermi angallatit atorneqarsinnaasut 75 BRT/120 BT sinnerlugu angissuseqassapput.
• Angallatit 20 BRT/37 BT-tut angissusillit anginerusullu piffissami 1. aprilimiit 30. september ilanngullugu tunngaviusumik killigititap iluani inuussutissarsiutigalugu saattuarniarsinnaatitaanngillat.
• Angallatinulli saattuarniutinut inerteqqussut 68030A-p avannaani aamma 70030A-ip kujataani atuutinngilaq.
• Angallatit 6 meterit sinnerlugit angissuseqarpat angallatit inuussutissarsiutissatut akuerisaassaaq aamma imarsiornermut aqutsisoqarfimmi nalunaarsugaalluni - imarsiornermut aqutsisoqarfimmi angallatip nalunaarsugaanera aalisarnissamut akuersissummik qinnuteqaammut ilaatillugu tiguneqarsimassaaq.
• Aalisariutit 6 meterit sinnerlugit takissuseqarpat angallatip uuttuutaanut allagartaq aalisarnissamut akuersissummik qinnuteqaammut ilaatillugu nassiunneqassaaq.

Raajarniarnermi qaleralinniarnermilu immikkut malittarisassat atuupput.

 

Piumasaqaatit pisussaaffiillu 

Inuussutissarsiutigalugu aalisartutut akuerineqarnissamut akuersissuteqassaatit aamma inuussutissarsiutigalugu aalisarnermut akuerisamik umiatsiaaraqarlutit imaluunniit angallateqarlutit. Akuersissummik pissarsinissamut piumasaqaatit pingasut naammassisimassavatit:
• Kalaallinut inuiaqatigiinnut aalajangersimasumik attuumassuteqassaatit
• Tamanna isumaqarpoq ukiuni kingullerni marlunni inuit nalunaarsorsimaffianni allassimasumik najugaqarsimassasutit aamma Kalaallit Nunaanni najugaqarsimassasutit
• Tamanna aamma isumaqarpoq ukiuni kingullerni marlunni Kalaallit Nunaanni tamakkiisumik akileraartartuusimassasutit

Immikkullu pisuni malittarisassanit taakkunannga immikkut akuerineqarnissamik qinnuteqarsinnaallutit.

Aalisarnissamut akuersissut inummuit tunngasuuvoq akuersissummilu allassimasunut aalisakkanut taamaallaat atuulluni. Tamanna ima isumaqarpoq:
• Akuersissut illit pigigit illillu taamaallaat atorsinnaagit
• Illit angallatinnik inuk alla aalisarpat pineqartup angallammik attartussaaq attartortorlu namminerisaminik akuersissuteqarluni. Akuersissummi angallat allassimassaaq tunisinermilu imaluunniit nakkutilliisut piumasaqarnerisigut takutinneqartassalluni.
• Akuersissut allanut attartortinneqarsinnaanngilaq

Pisussaaffiit
Aalisarnissamut akuersissummik peqaruit pisussaavutit:
• Aalisartillutit akuersissutit tigummissallugu, piniarnermi nakkutilliisoq imaluunniit Kalaallit Nunaanni Sakkutuut Aalisarnermut nakkutilliinerminni piumasaqarnerisigut taanna takutissinnaallugu
• Aalisarfinni assigiinngitsunik piumasaqaatit malissagitit
• Aalisakkanut ataasiakkaanut aalisarnermi atortut atoqquneqartut atussagitit
• Sumiiffinni aalisarfiusuni ataasiakkaani piumasaqaatit eqqortissagitit
• Piffissami aalisarnerup ingerlanneqarnissaanut aalajangersarneqartup iluani taamaallaat aalisarsinnaasutit
• Aalisakkanut pisassiissutaasunut ullup naaffissaatut aalajangersarneqartumi imaluunniit ullup naggataamik aalisarfiusussaq sioqqullugu pisassiissutit tamakkerlugit aalisarneqarsimappata aalisarneq unitsinneqassasoq.
• Tunisinerit tamaasa imaluunniit nakkutilliisut peqqusinerisigut akuersissutit takutittassagit
• Pisatit nalunaarutigisassagitit angallatip allattaaviatigut imaluunniit tunitsivimmut toqqaannartumik
• Pisassiissutit tamakkerlugit aalisarneqarsimasutut nalunaarutigineqarpata aalisarnermi atortut tamaasa nunamut qaqissagitit
• Akuersissummi tamanna piumasarineqarpat pisat amerlassusaat nassiutissagitit aamma pisaqarsimanngikkaluaruilluunniit.

Aalisarnermut maleruaqqusat eqqortinngikkukkit akuersissut annaasinnaavat. Soorlu imaassinnaavoq akuersissummi aalisakkat allat pisassatilluunniit sinnersimagukkit.

Aalisarnissamut akuersissuteqarnerit imaluunniit akuersissuteqannginnerit apeqqutaatinnagu aalisakkanut ataasiakkaanut sumiiffinnullu aalisarnermi periutisinut aalisarnermilu atortut atoqqusaasut malittarisassat tamatigut eqqortittassavatit.

Qinnuteqaat 

Aalisarnissamut akuersissutinut qinnuteqaat kommunimi najugarisami isumagineqassaaq.
Aalisarsinnaanermut akuersissut tassaavoq aalisakkanut pisassiissutaasunut killilersugaasunullu inuussutissarsitigalugu aalisarnissamut imaluunniit sunngiffimmi aalisarnissamut akuersissut.
• Angallatit 6 meterit sinnerlugit angissuseqarpat angallatit inuussutissarsiutissatut akuerisaassaaq aamma imarsiornermut aqutsisoqarfimmi nalunaarsugaalluni - imarsiornermut aqutsisoqarfimmi angallatip nalunaarsugaanera aalisarnissamut akuersissummik qinnuteqaammut ilaatillugu tiguneqarsimassaaq.
• Aalisariutit 6 meterit sinnerlugit takissuseqarpat naalagaaffimmut atassuteqarneranut allagartaa angallattillu uuttuutaanut allagartaq aalisarnissamut akuersissummik qinnuteqaammut ilaatillugit nassiunneqassapput

Aalisakkanik killilersorneqartunik pisassiiffiusunillu aalisarniaraanni akuersissummik qinnuteqartoqassaaq.
Tamanna atuuppoq
• inuussutissarsiutigalugu aalisartuugaanni,
• angallateqarluni aalisartuugaanni imaluunniit
• sunngiffimmi aalisartuugaanni imaluunniit taamaattoorusukkaanni
Taakku saniatigut qinnuteqaammi piukkunneqarnissamut piumasaqaatit tunngavigisallu arlallit naammassineqarsimassapput.

Akuersissummik qinnuteqarsinnaavutit:
• Inuttut ataasiusutut
• Umiarsuaatileqatigiittut
• Ingerlatseqatigiiffittut

Aalisarsinnaanermut akuersissut aalisarnernut ukununnga atuuppoq:
• Aalisakkanut aalajangersimasunut ataatsinut
• Sumiiffimmut aalajangersimasumut ataatsimut
• Ukiumi ataatsimi januarip aallaqqaataaniit decembarip 31.-ianut

Aalisakkanik assigiinngitsunik aalisarnissaq kissaatigigukku aalisakkanut aalisarusutannut tamanut akuersissummik qinnuteqassaatit.

Aalisarnissamut akuersissummik qinnuteqaruit qinnuteqarnermi immersuiffissaq immersussavat:
• Sinerissamut qanittumi aalisarnermik ingerlataqaruit Sullissivimmi imaluunniit illit kommuninni inuussutissarsiornermut siunnersortimut qinnuteqassaatit. Inuussutissarsiutigalugu aalisartuunissamut piumasaqaatit naammassisimagukkit aalisarnissamut akuersissutissat najukkannut nassiunneqassaaq
• Umiatsiaararsornermi akuersissutit nutarterniarukku sullissivimmi imaluunniit illit kommuninni inuussutissarsiornermut siunnersortimut saaffigissaatit
• Aalisarnissamut akuersissummut qinnuteqaatit kingusinnerpaamik novembarip 30.-iani tunniunneqarsimassapput

Umiatsiaararsorluni inuussutissarsiutigalugu aalisarnissaq pillugu qinnuteqaammut piumasaqaatit tunngavigisallu

Imarsiorsinnaanermik ilinniarsimanermik allagartat ilanngunneqassapput
Aalisarnermut piniarnermullu peqatigiiffimmiit oqaaseqaat
Aalisarnermiit sulisitsisumiit oqaaseqaat
Inuussutissarsiutigalugu siunnersortimiit oqaaseqaat
Qinnuteqaat Aalipi-mi sulisumiit APNN-imut nassiunneqassaaq - nassiunneqarneranut uppernarsaat tiguneqassaaq

• Kalaallit nunaata imaluunniit nunat allat imartaanni avataasiorlutit aalisarnermik ingerlataqaruit qinnuteqaatit Aalisarnermut, Piniarnermut Nunalerinermullu Naalakkersuisoqarfimmut nassiutissavat
Inuussutissarsiutigalugu aalisartuuguit ilaatigut avataasiorluni qaleralinniarnermik, saarullinniarnermik, saattuarniarnermik, raajarniarnermik imaluunniit suluppaagarniarnermik ingerlataqarnissamut aalisarnissamut akuersissuteqassaatit
Kalaallit Nunaata Kitaani aalisakkanik pisassiissutigineqartunik arlalinnik aalisarsinnaavutit, tassunga ilanngullugit qalerallit, saarulliit, raajat, saattuat aamma suluppaakkat. Tunumi aamma aalisakkanik pisassiissutigineqartunik arlalinnik aalisarsinnaavutit, tassunga ilanngullugit qalerallit, saarulliit, raajat, saattuat, suluppaakkat aamma ammassat. Tunngaviusoq tassaavoq aalisarnissamut akuersissuetqarnissat.
Nunat allamiut angallataat Kalaallit Nunaata aalisarnissamik isumaqatigiissuteqarnera tunuliaqutaralugu Kalaallit Nunaata imartaani aalisarsinnaavoq.
Kalaallit Nunaanniit angallatit aamma Kalaallit Nunaata aalisarnissamik isumaqatigiissuteqarnera tunuliaqutaralugu nunat allat imartaanni aalisarsinnaappuut.
Isumaqatigiissutaasimasut aamma kalaallit nunaanni aalisarnermik ingerlatsiviit pilersinneqarsimasut periarfissaat pillugit uunga allagarnikkut paasisaqarsinnaavutit apnn@nanoq.gl.
Taakku saniatigut misileraalluni aalisarnerit arlallit ingerlanneqarput ilaatigut tinguttuut, saarullernaq, saarullit atamasoq, avaleraasartuut, ammassuillu, aamma akuersissuteqarnissamik tunngaveqartut. Tamanna pillugu annertunerusumik atuarsinnaavutit uani.

Malugiuk
Illit akuersissutinni allaasimasoq angallat imaluunniit angallatit atorlugit taamaallaat tunisisinnaavutit. Tamanna isumaqarpoq umiatsiaaraq aamma qimussit imaluunnit angallatit imaluunniit angallatitit aalisarnermi atorneqartut akuersissummi allanneqarsimassasut.

Eqqaamajuk illit aalisarnissamut akuersissummi paasissutissat atuukkunnaarpata Aalisarnermut, Piniarnermut Nunalerinermullu Naalakkersuisoqarfimmut ilisimatitsissagavit. Tamanna assersuutigalugu tassaasinnaavoq akuersissummi allassimasumik allaanerusoq angallat atorlugu aalisarusukkuit.

Akuersissutip allanngortinnera annertunerusumik atuarit


Naammagittaalliorsinnaaneq 

Qinnuteqarsimaguit aamma aalisarnissamut akuersissummik qinnuteqaatit itigartinneqarsimappat itigartitsineq pillugu naammagittaalliuuteqarsinnaavutit.

Naammagittaalliuutit allassimassaaq aamma sooq sunalu pillugu naammagittaalliuuteqarnerlutit allassaatit. Eqqaamajuk naammagittaalliuutigerusutat pillugu aalajangiinerup assilinera ilanngutissagakku.

Allakkatigut naammagittaalliuutit Aalisarnermut, Piniarnermut Nunalerinermullu Naalakkersuisoqarfimmut nassiutissavat.

Naammagittaalliuutit Aalisarnermut, Piniarnermut Nunalerinermullu Naalakkersuisoqarfimmi suliarineqassaaq. Naalakkersuisoqarfik allanik apeqqutissaqaruni attavigissavaatit. Naammagittaalliuutit suliarineqareerpat akissutisissaatit.

Naalakkersuisoqarfimmiit aalajangiineq naammaginngikkukku illit pillutit suliaq Ombudsmandimut saqqummiussinnaavat imaluunniit aalajangiineq eqqartuussivinni misilillugu.

 

Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl