airplanebooksbriefcase business cogs cross election entertainment fish house law lockmedicalpeopleselfservices socialtax

Suliniutinut tapiissutit

Paasissutissat nalinginnaasut 

Nutaarsiassaqartitsiviit tusagassiorfiillu namminersortut, arlaannaannulluunniit attuumassuteqanngitsut, naqitat internetiluunniit tunngavigalugu allatat imarisaallu kalaallinut atuartartunut aaqqissuunneqarsimasut suliniutit killillit pillugit tapiiffigineqarnissamik qinnuteqaateqarsinnaapput.

Suliniutinut tapissutit pilersitsinermut suliniummilluunniit ineriartortitsinermut tunniunneqartarput.

 

Piumasaqaatit 

Tapiiffigineqassagaanni piumasaqaataapput:

  1. tusagassiorfik Kalaallit Nunaanni angerlarsimaffeqassaaq,
  2. tusagassiorfik piffissami tapiiffigineqarfimmi tamarmi akisussaasumik aaqqissuisoqassaaq,
  3. ukiumi qinnuteqarfiusumi ukiorluunniit qinnuteqarfik sioqqullugu suliffeqarfik qinnuteqartup aallartissimanngippagu tusagassiorfik akisussaalluni aaqqissuisoq peqatigalugu minnerpaamik ukioq tamaat suliffiusunik pingasunik katillugit tiimeqartunik aaqqissuussisartunik sulisoqassaaq,
  4. saqqummersitat politikikkut, inuiaqatigiinnik kulturimillu sammisaqarfiunerusunik tusagassiortut namminneq suliarisaannik tusagassianik imaqassapput, tassani takoqqusaarutit ilanngunnagit imarisaata ikinnerpaamik affai sammisaqarfiit assigiinngiiaartut pillugit ilanngutassianik aamma nutaarsiassanik oqallisigineqartunik sammisaqarluni aaqqissuisuneersunik tusagassianik imaqassapput,
  5. inuussutissarsiortut sulianilluunniit suliarinnittartut, sulisut, sulisitsisut inuussutissarsiutilluunniit immikkoortuisa kattuffii, politikikkut partiit sulisoqarfinniluunniit assigiinngitsuni sulisut kisiisa saaffigiinnarnagit atuisunut assigiinngiiaartunut saqqummersitat saaffiginnittuussapput, aamma
  6. saqqummersitat minnerpaamik kalaallisut allassimassapput.

Qinnuteqaateqartup piumasaqaatit aamma naammassisassai:
  • Tusagassiutit naqitat qaammammut ikinnerpaamik ataasiartumik saqqummertassapput
  • Internetikkut tusagassiuut ullut tamaasa nutarterneqartassaaq.
  • Tusagassiuut assigiimmik atugassaqartitsilluni tamanillu pissarsiarineqarsinnaalluni nuna tamakkerlugu pissarsiarineqarsinnaassaaq
  • Imminut napatissinnaasumik ingerlatsinermut pilersaarummik peqassaaq

 

Qinnuteqarneq 

Suliniummut tapiiffigineqarnissamik qinnuteqaateqarniaruit qinnuteqarnissamut immersuiffissamik immersuissaatit. Matuma siuliani innersuussaq takusinnaavat.

Qinnuteqaatinik fax aqqutigalugu nassiussisoqarsinnaanngilaq.

NemID-mik peqaruit
NemID-mik peqaruit Kulturimut aningaasanik internetikkut qinnuteqaateqarsinnaavutit.

NemID-mik peqanngikkuit
NemID-mik peqanngikkuit, qinnuteqarnissamut immersuiffissaq immersoriarlugu allanik papiaraatinnik ilaasariaqartitannik ilallugu allakkatigut uunga nassiutissavat: ikin@nanoq.gl

Qinnuteqaatissannut piumasaqaatit paasilluarusukkukkit kulturimut tunngasunut siunnersorti attavigisinnaavat, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoqarfimmut, uunga sianerlutit (+299) 34 57 41 imaluunniit emailimut: ikin@nanoq.gl

 

Suleriaatsit 

  1. Allatseqarfimmiut suliniummut tapiissutinik qinnuteqaammik tigusaqarsimapput
  2. Allatseqarfimmi qinnuteqaatit eqqortunik uppernarsaatitaqarnersut misissorneqarput
  3. Allatseqarfimmi qinnuteqaat inatsisitigut piumasaqaatinik naammassinninnersoq misissorneqarpoq
  4. Allatseqarfimmit inaarutaasumik suliarinninnissamut aalajangiinissamullu inassuteqaateqartoqarpoq
  5. Qinnuteqaat tunniussisartunit suliarineqarpoq aalajangiiffigineqarlunilu

 

Naatsorsuuserisussaatitaaneq 

Tapiiffigineqarnissamik akuerineqarsimaguit naatsorsuusiortussaatitaavutit taakkunanilu tapiissutit siunertamut atorneqarsimanerat nalunaarsortussaavat. Ima pisoqarsimappat tapiissutisiarisimasatit tamakkiisumik naafferarlugilluunniit utertissavatit:

  • sinneqartooruteqarsimavutit imaluunniit
  • aningaasat siunertamut atorsimanngilatit


Tapiissutit 150.000 kr-nit pineqarsimappata kukkunersiuisumik nalunaarsorsimasumik atuisoqassaaq.

 

Piffissaliussat 

Qinnuteqarnissamut killiliussaq tassaavoq ukiumi qaammatisiutini suliniutip aallartinneqarfiani 1. maj.

 

Naammagittaalliorneq 

Qinnuteqarfigisavit aalajangersimanerat eqqorsorinngikkukku taakkununnga naammagittaalliutigisinnaanngilat, naammagittaalliuuteqassaguilli taamaallaat eqqartuussivik aqqutigisinnaavat.

 

Ilinniartitaanermut, Kultureqarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikin@nanoq.gl
Nittartagaq: www.naalakkersuisut.gl