airplanebooksbriefcase business cogs cross election entertainment fish house law lockmedicalpeopleselfservices socialtax

Qamutit nummerpladitaqanngitsut

Qamutinik nummerpladitaqanngitsunik peqarpit? – Taamaappat inatsisinut eqqummaarinnittariaqarputit!

Tunngaviusumik Kommune Kujallermi biilinik nummerpladitaqanngitsunik uninngatitsisoqarsinnaanngilaq. Piffissami aalajangersimasumi qamutinik nummerpladitaqanngitsunik uninngatitsinissat pisariaqartissimagukku kommunimiit utaqqiisaasumik nunaminertanik atugassinneqarnissat pisariaqarpoq. Kisianni eqqummaariffigissavat tunngaviusumik utaqqiisaasumik nunaminertanik atugassiineq qamutinut kusanartunut paarilluagaasunullu aatsaat tunniunneqartarmat. 

 

Qamutit nunaminertanik atugassinneqanngitsut kusananngippata paarilluagaanngippatalu aamma nummerpladitaqarnatik uninngappata kommunip qamutit eqqakkatut isigissavai, taamaasilluni kommune avatangiisit innarlitsaaliorneqarnissaannik inatsit naapertorlugu suliamik aallartitsissaaq[1], qamutit iginneqarnissaat anguniarlugu.

 

Qamutitit nummerpladitaqanngitsut sumi uninngatinneqarsinnaappat?

Nunaminertanik atugassiinerit tamarmik Kommune Kujalliup Kommunimut pilersaarutaanut naapertuutissapput (linki aana http://kujalleq2017.odeum.com/). Sumiiffiit ataasiakkaat ilaannut aalajangersagaqarsinnaavoq, illup eqqaanut qamutinik inissiinissamut pinaveersaartitsisumik. Nalinginnaasumik qamutit nummerpladitaqanngitsut inissinnissaanut akuerineqarnissaq naatsorsuutigineqarsinnaavoq, sumiiffinni angallataatilinnut utaqqiisaasumik nunaminertassiiffigineqartartuni. Nunaminertaq kisianni allamut atorneqassanngilaq.

 

Qamutit nummerpladitaqanngitsut nammineq illuutip eqqaanniittut utaqqiisaasumik nunaminertanik atugassiissummik tunineqartarput. Najugaqarfiup piginnittuaniit akuersissuteqaqqaarluni nunaminertamik atugassiisoqarsinnaavoq. Qamutitit illuutillit allat isikkiviinut assersuippata inissinneqarsinnaangillat, aatsaat taakkua akuersissutaannik pissarsisimaguit.

 

OBS! Qamutit nummerpladitaqanngistut nunaminertani kikkunnilluuniit atorneqarsinnaasuni inissisimasut tamatumani biilit uninngasarfiiniittut nunaminertamik atugassinneqarneq ajorput.

 

Qanoq sivisutigisumik qamutitit nummerplade-taqarnatik uninngatinneqarsinnaappat?

Qamutit nummerpladitaqanngitsut qaammatinut arfinilinnut utaqqiisaasumik nunaminertamik atugassinneqartarput.

 

Utaqqiisaasumik nunaminertamik atugassiinerup qaammatinik arfinilinnik sivitsorneqarsinnaanera periarfissaavoq, tunngaviusumik uppernarsarsinnaagukku illit:

 

  • qamutinnik nalunaarsortitsilersutit
  • qamutinnik tunisaqalersutit
  • imaluunniit qamutinnik iluarsaassilersutit/nutarterilersutit.

 

Qamutinut nummerpladitaqanngitsunut utaqqiisaasumik nunaminertassiilluni atugassiineq ataasiaannarluni sivitsorneqarsinnaavoq, tamatuma kingorna qamutit peerneqassapput.

 

Qanoq utaqqiisaasumik nunaminertamik atugassinneqarnissannut qinnuteqassavit?

Utaqqiisaasumik nunaminertamik atugassinneqarnissannut qinnuteqarsinnaavutit una aqqutigalugu: NunaGIS.

 

Nunaminertamik atugassinneqarnissamut qinnuteqaasiorninni ikiorneqarnissannik pisariaqartitsiguit Teknikkimut Avatangiisinullu Ingerlatsivimmut saaffiginnissinnaavutit, taakku qinnuteqaasiorninnut apeqquteqarnissannulluunniit ikiuussinnaapput.

Qamutinnut nummerpladitaqanngitsunut utaqqiisaasumik nunaminertamik atugassiissutit atorunnaarpat susoqassava?

Utaqqiisaasumik nunaminertamik atugassiissut qamutinnut atuutissaaq. Tassa isumaqarpoq, qamutitit allamut inissikkaluarukkit nunaminertamik atugassiissummik nutaamik pisinnaanngilatit.

Utaqqiisaasumik nunaminertamik atugassiissut atorunnaarpat qamutitit nummerpladitaqanngitsut uninngatinnissaannut pisinnaatitaajunnaassaatit. Nunaminertamik atugassiissutivit atuunnerani qamutitit nalunaarsortissimanngikkukkit, tunisimanngikkukkit imaluunniit peersimanngikkukkit kommunip pilersaarusiorneq aamma nunaminertat atorneqartarnerat pillugu inatsimmiittut aalajangersakkat malillugit suliamik aallartitsissaq,[2] qamutivit peerneqarnissaat anguniarlugu.



[1] Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq.