airplanebooksbriefcase business cogs cross election entertainment fish house law lockmedicalpeopleselfservices socialtax

Unneqqarissumik ingerlatsisoqarpoq!

Paasissutissat eqqunngitsut tusagassiutini saqqummersinneqarnerat illuatungiliuttullu pasinarsaaralutik oqariartuuteqarnerat kujataani borgmesterip uggoraa.
9. marts 2020

Tallimanngornermi martsip ulluisa arfernani Sermitsiaq.ag-mi atuarneqarsinnaanngorpoq Kommune Kujallermi suliassaqarfimmi pisortap (fagchef) soraarsitaanerani meeqqanut inuusuttunullu tunngasutigut suliaqarfimmi sulisut 20-30-t missaaniittut suliumajunnaarsimasut.

-Paasissutissat eqqunngitsut atorlugit taama tusagassiorfitsigut saqqummiussisoqarnera uggoraara, taamatummi saqqummiussisoqarnera illuatungiliuttut atorluarlugu eqqunngitsumik saqqummiusseqqinnerat kommunemut innuttaasunullu peqqinnanngilluinnarmat, qinikkatummi sulissagaanni uneqqarilluni sullissinissaq pingaaruteqaqaaq, Kiista P. Isaksen oqarpoq.

Paasissutissat eqqunngitsut Sermitsiaq.ag-mi saqqummiunneqareernerisa kingorna Kommune kujallermi Inuit Ataqatigiit tusagassiutinut nalunaarutaat inuit attaveqaqatigiittarfianni saqqummertoq borgmesterip iliuuseqartariaqalerneranik oqariartuutigineqarpoq.

-Pisoq pisortamik suliunnaarallartitsineq sumilluunniit ilisimasaqarfigisimanngisaraluara tusagassiorfitsigut saqqummiussisoqarnerani paasiniaaffigisariaqalersimava, erseqqissaatigissavaralu soraarsitsisoqarani suliunnaarallartitsinerummat aammalu sermitsiaq.ag-mi allaaserineqartutut sulisut 20-30-t suliumajunnaanngimmata inuilli tallimat ataallugit suliaminnik unititsisimammata, pisorli pillugu annertunerusumik oqaaseqarsinnaanngilanga, borgmesterimi kommunimi inunnut ataasiakkaanut tunngasunik oqaaseqarsinnaatitaanngilaq, Kiista P. Isaksen oqarpoq.

Inatsisit malillugit sulisoqarpoq

Kommune Kujallermi IA-p tusagassiutinut nalunnaruteqarnerminni saqqummersitaasa ilagaat februarimi kommunalbestyrelsep ataatsimiinnerata nalaani inuit eqimattat akerliuusutsimik takutitsineranni allagartarsuarni allassimasut ilaat ”Korruption”-imik allassimasoqarnera.

-Inatsisit malillugit sulisoqarmat taama pasinarsaarisoqarnera sumilluunniit pissutissaqanngilaq, eqimattammi taakku ”korruption”-imik allaqqasoqarnera sumik tunngaveqarnersoq paasiniaavigalugit attavigineqarnikuupput peqquserlullunilu ingerlatisoqarsimappat nalunaaruteqaqqullugit. Ulloq manna tikillugu suli uterfigineqanngilagut.  Inatsisilli malillugit sulisoqarmat kommunimi sumilluunniit ernumassutissaqanngilagut, Kiista P. Isaksen oqarpoq.

Whistleblower

Ukioq nutaaq aallannerfigalugu Kommune Kujallermi whistleblowerimik aaqqissuussineq atuutsinneqalerpoq, aaqqissuussinerulli aallartinnissaanut app-ip atorneqartussap piareernissaa utaqqisaaginnaleqqavoq. Tamatumalu atorneqalernissaa pillugu inuttaasunut paasissutissiisoqarsimanngitsoq Inuit Ataqatigiinnik oqariartuutigineqartoq borgmesterip illuatungilerpaa.

-februarimi kommunalbetyrelsep ataatsimiinnerani tamanut ammasumik radiomi aallakaatinneqartumi tamanna ilisimatitsissutigineqarnerata saniatugut Qaqortumi innuttaasunut ataatsimiisitinermi paasissutissiissutigineqarpoq soorlu tamatuma aamma Narsami Nanortalimmilu paasissutississutigineqarumaarnera pilersaarutaasoq, Kiista P. Isaksen oqarpoq nangillunilu:

- Tamannali sulisunut atuuttussaasoq erseqqissaatigissavara, IA-nniimmi ima paasineqarsinnaanngorlugu oqariartuutigineqarmat innuttaasunut tamanut atuuttoq, Kiista P. Isaksen nassuiaavoq.

Innuttaasut ikiliartornerat unitsinneqartoq

Piffissami kingullermi kujataani innuttaasut ikiliartornerata unitsinneqarsimanera tusagassiorfinni saqqummiunneqarpoq, kinguninngualu paasissutissat eqqortuunngitsut Sermitsiaq.ag-mi

Saqqummiunneqarput.

-Suliat iluatsittut nuannaarutigalugit saqqummiussisinnaaneq pisinnaatitaaffiuvoq, taamaatoqartillugumi nuaannaarutiginnittaqaanga. Kujataatalu inukilliartornerata unitsinneqarneranut atatsillugu neriuutigeqaara paasissutissanik eqqunngitsunik tusagassiorfitsigut saqqummiussisoqarnera kujataata akisunaassanngikkaa. Uneqqarillunimi ingerlatsisoqarpoq, Kiista P. Isaksen naggasiivoq.