airplanebooksbriefcase business cogs cross election entertainment fish house law lockmedicalpeopleselfservices socialtax

Pisortaqarfiup aalajangiinera – COVID-19 PILLUGU MALITTARISASSAT

23/4-20-mi nutartigaq.
20. april 2020

Kommunip pingaarluinnartumik inuiaqatigiinni ingerlatsinermik inissisimanera, kommunimilu innuttaasorpaassuarnut sunniuteqarnera eqqarsaatigalugu utoqqaat illuisa aamma meeqqeriviit, atuarfiit aamma sunngiffimmi ornittakkat, qatserisoqarfiit aamma annaassiarnerit allallu illersorneqarsinnaasumik isumannaatsumillu ingerlanneqarnissaat kommunip  akisussaaffigaa.

Kalaallit Nunaanni COVID-19-imik nappaateqartoqalereermat pingaaruteqarpoq inuiaqatigiinni suliassat naammassisinnaanngorlugit naammattunik sulisoqarnissaq, taamaammat COVID-19-ip (coronavirusip) tunillaassuunnissaata pinaveersaartinissaa kommunip akisussaaffigaa.

Tamanna tunngavigalugu pisortaanerit ullumimiit Kommune Kujallermi atorfilinnut makku aalajangerpai :

  • Sumiiffiup ataatsip iluani angalanissat pisariaqanngitsut ingerlannissaat pissanngitsut sakkortunerpaamik inassutigineqarpoq. Kommunilli iluani pisariaqartumik angalasoqassappat qanga kommiuniusimasut nunaqarfiisalu iluani angalasoqarsinnaavoq. Ass. Qaqortup kommunerisimasaani nunaqarfittaasalu iluani aamma taamatut Narsap Nanortallillu nunaqarfittaasalu iluani.
  • Sulinermut atatillugu sulisut kikkulluunnit kommunip avataani aaqqissuussinernut/sammisanut peqataaqqusaanngillat.
  • Suliffimmut tunngatillugu pikkorissarnerit atuarnerillu unitsinneqarallassapput.
  • Sulisoq kinaluunniit suliffeqarfiup avataani ataatsimiinnerni peqataassanngilaq.
    • Tele aqqutigalugu attaveqaatit, soorlu videokonference, Skype assigisaallu taarsiullugu atorneqarnissaat innersuussutigineqarpoq.
    • Ingerlatsiviup pisortaata piviusumik nalileereerneratigut ataatsimiinnernut kinguartinneqarsinnaanngitsunut peqataasoqarsinnaavoq.
  • ANGERLARSIMAFFIMMIIT SULINEQ
    • Kommune Kujallermi sullissinerup unittuunngissaa siunertaralugu aamma sulisut akornanni COVID 19-ip tuniluussinnaanera sapinngisamik annikinnerpaamiitinniarlugu pisortap sulisullu akunnerminni isumaqatigiissuteqarnerisigut angerlarsimaffimmiit sulisoqarsinnaavoq.

       

  • ANGERLARSIMAANNAQQUSAANEQ (Akissarsiaqarluni)

Angerlarsimaannaqusaanermi angerlarsimaffiup avataani tuniluunnerup annikinnerpaaffissaaniitinnissaa siunertaavoq.

Innuttaasut COVID-19-imik tunillatissimasumut imaluunniit inummut ulluni kingullerni 14-ini nunatta avataani Nuummilu angalasimasumut qanillattuisimasut sulisitsisumiit upalungaarsimanermilluunniit suliaqartunit angerlarsimaannaquneqarsinnaapput.

  • Angerlarsimaannarnermi pisortarisamiit sulinissaq piumasarineqarsinnaavoq.
  • Sulisut angalaqqusiunnaarnerup kingorna nammineerlutik angalasimasut akissarsiaqaatiginagu angerlarsimaannaqqusaassapput.
  • Angerlarsimaffiit qimannaveersaaruk, taamaaliorit taamaallaat silaannarissassaguit niuerniarlutilluunniit, matumani inunnut allanut minnerpaamik 2 meterinik ungasissuseqarsinnaavutit.
  • Sapinngisamik pulaartoqarnaveersaarit
  • Angerlarsimaannaqqusaanerup sapinngisamik inoqutigiinnit tamanit malinneqarnissaa innersuussutaavoq, taamaanngippat angelarsimaannaqqusaaneq iluaqutaanavianngimmat.

Qulaani aalajangiussat Kommune Kujallermi atorfilittut sulisunut tamanut ullumimiit atuutilerput. 

Kommune Kujalleq soorunalimi sulisut sunngiffimminni sulerissanersut aalajangiisinnaanngilaq – kisianni sunngiffimmi sammisassat sorliit peqataaffigerusunnerlugit sulisut naliliisarnissaat innersuussutigaa.

Nalinginnaasumik pinaveersaartitsinermut pissusilersornissaq:

Illit imminut allallu illersorniarlugit COVID-19-imut nutaamut tunillatsinnaveersaarit.

COVID-19-ip nutaap tunillaassuunnera eqqiluisaarluarnikkut pitsaanerpaamik pinaveersaartinneqarsinnaavoq. Tassa imminut illersorumalluni pingaartumilli allat illersorumallugit, ingammik utoqqaat sanngiitsullu. Taamaammat siunnersuutitsialaat arfinillit malinneqarnissaat kaammattuutigissavarput. Suliffeqarfinnut atuupput, aamma tamat ornittagaanni, assersuutigalugu pisortat allallu angallassissutaanni ilaagaanni.

Tunillatsinnissaq pinaveersaartiguk:

  1. Akulikitsumik errortortarit imaluunniit assanut bakteriaajaat (håndsprit) atortaruk.
  2. Tangajoruit quersoruilluunniit ikusivit peqittarfianik asseruk - assannik assernagu.
  3. Assamminnerit, ulussakkut kunissinerit eqitaarinerilllu pinaveersaakkit - allap timikkut attornissaa killeqartiguk.
  4. Eqqiluisaarneq eqqumaffigiuk - angerlarsimaffimmi aammali suliffinni.
  5. Utoqqaaneruguit imaluunniit anigorsinnaanngisamik nappaateqaruit - allat ungasinniakkit qanilleqqunagillu qinnuigalugit.
  6. Napparsimaleruit angerlarsimaannarit.

Napparsimasoqartillugu pingaartumik utoqqaat angerlarsimaffianni  – meeqqerivinni – atuarfinni sulisut sukannernerusumik eqqumaffigineqarnissaat innersuussutigineqarpoq.

Kommune Kujallermi sulisut COVID-19-imut tunngatillugu apeqqutissaqassappata peqqissutsimut oqartussat nittartagaat innersuussutigineqarsinnaavoq: www.nun.gl, soorluttaaq paatsuungasoqartillugu kommunimi Sulisoqarnermut Immikkoortortaqarfik attavigineqarsinnaasoq.

Ilitsersuut una 2020-mi apriilip 25-ata tungaanut atuutissaaq.

Qaqortoq, april 23-at 2020

Kim Dahl

Pisortaaneq