airplanebooksbriefcase business cogs cross election entertainment fish house law lockmedicalpeopleselfservices socialtax

Angut nunatsinni niuernerup inuussutissarsiornerullu iluani aamma politikikkut sunniuteqarluarsimasoq toqukkut qimaguppoq

Angut ikinngutaalluartoq, inoqatiminut asannittoq, nuannaarnissaminik nuannarisalik Gerhardt Petersen nunatsinni inuussutissarsiornerup iluani inerisaanissamut piumassuseqarluartut ilaat annaavarput.
1. april 2020

Gertip ilisarisimaleqqaarneraniit inuppalaartuunini, inoqatiminut tusarnaallaqqissuunini aammalu isummersullaqqissuunini eqqissisimasuuninilu ilisarnaatigigai maluginiarsimavara. Taammattuugami ataqqineqarluni suleqatikkuminartuuvoq.

Nunatsinni ineriartortitsinissamik anersaaqarluni sulerusuttuuvoq. Tamanna niuernerup iluani aamma politikkikkut sulinermigut takutittuartarpaa. Gertimi 21-innarnik ukioqarluni niuernerup iluani suliaqalerpoq ukiorpaaluillu ingerlaneranni pisortatut sulereerluni aamma KNI A/S-imi pisortaanertut sulisimavoq. 

Gertip kalaallit pisortani aqutsisunilu sulinissamut piginnaanngorsarnissaat aamma nunatta pissarititaanik annertunerusumik pilersulernissarput pingartitaraa. Taamaammat KNI A/S-imi pisortaanertut sulinermini ilaatigut kujataata kartoffelii nuna tamakkerlugu pisiarineqarsinnaanngornissaat annertuumik sulissutigisimavaa. Gerti pinngortitamik nuannarisaqartuuvoq, umiatsimillu angalaarnissani nuannarisaraa, qasuersaarfittullu atortarlugu.

Politikkikkut sulinera 1986-imi Qasigiannguani kommunimi ilaasortanngornerani aallartippoq, kingorna inatsisartuni ilaasortaasimavoq, matumani ilaatigut Qaqortumi mittarfissamut aqqusiniliornissamut qulakkeerinninniarluni sukataaruteqartarpoq, Atassummilu siulittaasutut aamma inissisimanikuulluni.

Inuiaqatigiinnut nunaniminullu tunniusimasuugami kræftimik napparsimalereeraluarluni Kommune Kujallermi kommunalbestyrelsimi killissani tikillugu suleqataavoq.

Tamanna inuiaqatiminut nunaminullu qanoq tunniusimatigineranut inissaqartitsineranullu takussutissaavoq. 

Tunniussarpassuaqartaraluarluni qujaniarfigineqaleraangami tuppallerujussuartarnera takusarpara, angutaavormi misissusilerujussuaq, tupalleraangamilu qujamasorujussuartartoq.

Inuttaa takorloorsinnaavara eqqaaniarneqarluni nalunngikkaluaruniuk qanoq tuppallersimaartigissagaluarnersoq.

Gertip sulerusussuseqarnermigut nunatsinnut inoqatiminullu tunniussimasai ataqqillugit qujaniarlutalu eqqaamassassaraagut.

Kommune Kujallermi kommunalbestyrelse sinnerlugu Gertip nulia qitornaalu misiginneqatigingaarpakka.

Gertip eqqaaneqarnera ataqqinartuuli.

Kommune Kujallermi kommunalbestyrelse sinnerlugu,

Kiista P. Isaksen