airplanebooksbriefcase business cogs cross election entertainment fish house law lockmedicalpeopleselfservices socialtax

Asasakka Kommune Kujallermi innuttaaqatikka, sulisartut ataqqinartut, nunarsuaq tamakkerlugu ullorsiornitsinni pilluangaaritsi.

1. maj 2020

Kommunitsinni illoqarfittatsinni nunaqarfittatsinnilu sumiikkaluarussi tassaavusi kommunitsinni annerusumik minnerusumilluunniit ineriartortitseqataasut pinngitsoorsinnaanngisagut. 

Piffissami kingullermi nunarsuarmioqatigiit akornatsinni nualluummik Covid-19-imik eqqugaanitsinni sulisartut inuiaqatigiinni qanoq pingaaruteqartigisumik inissisimanerat takutinneqarpoq.

Matumanimi meerartatsinniit utoqqartagut ilanngullugit paaqqutarinninneq, inuiaqatigiinnik sullissineq, suliffiippasuillu ulluinnarni inuuniarnitsinni assakaasunik ingerlatitsisuusut qanoq ataqatigiitsiginerat nalunngeriigarput ersarissarneqaqqippoq.

Taamaammat sulisartut suliffeqarfiuteqartullu periarfissaq manna iluatsillugu kommunalbestyrelse sinnerlugu tunniusimallusi sulinissinnut suliniuteqartarnissinnullu qammangavik qutsavigerusuppassi.

Eqqaamanaqaat utoqqartagut, meeraalluta sulisartut ulluanni persuarsiorlutik oqariartuuteqartarnerat, meeqqanut nuannersumik maligassaasutullu sunniuteqartarsimaqisut.

Sulisartoorusunneq tamanna aqqutigalugu pilersinneqartarpoq, tassa nammaqatigiinneq. Sulisartoqanngippat nunarput ingerlasinnaanngilaq.

Ukiut pingasut ingerlareersimalerput kommunalbestyrelsimut qinersigatta, qinigaasugullu tamattaalluta kommune ineriartortoq, suliffigissallugu orniginartoq, ilaqutariinnut toqqissisimanartoq, inuusuttunut piginnaanngorsaalluartoq utoqqaliffigissallugulu kajungernartoq tunngaviusumik ilungersorluta anguniagaraarput.

Taamaammat 2019-ip aallartisimalaarnerani suliffeqarfik nutaaq Innovation South Greenland pilersipparput. Pilersinneqarnerani kommunalbestyrelse, inuusutissarsiortut tamarmik aamma nutaaliorlutik inuussutissarsiummik aallartisartut aqqutissiuunneqarlutik siunnersorneqarsinnaanngorput.

Tamanna nunatta kujataanut annerpaamik iluaqutissiisussanik piareersaateqarluta pilersaarusiorsinnaanngornitinnik malitseqassammat isumalluarfigaara.

Taamaammat inuussutissarsiutit suliffissat nutaat suulluunniit periarfissanngoraangata ataatsimorluta tapersersortariaqarpagut, suliffiimmi nutaat kommunitsinni pisariaqarteqaagut.

Kommune Kujalliup siunissamut ineriartorneranut ukiut makku assigiinngitsutigut tikkuussiffiupput, tamanna sulisartunut suliffissanik ataavartunik nassataqassaaq.

Qaqortumi mittarfittaarnissamut atatillugu qaartiterinissat aqqusinermillu suliaqarnissat suliffippassuarnik nassataqartussaanerat nuannaarutissaavoq. Matumani mittarfittaarnissamut inuiaqatigiinnut aningaasatigut sunniutigisinnaasai pillugit misissuititsisimanitsinni suliffissat amerlanerusut aammalu kujataani innutaasut amerliartoqqinnissaannik misissuinerup tikkuussinera isumalluarnartuuvoq.

Taamaammat nuannaarutigingaarlugu eqqaarusuppara ukiuni arlaqalersuni kujataani inuerukkiartorneq suliniuteqarluarnitsigut innuttaasunillu qanimut suleqateqarluarnitsigut unitsissimagatsigu, alloriarfissarlu tassaalerpoq inuttusiartoqqilernissamut suliniuteqarnissaq.

Innuttaasunik qanimut suleqateqarnerput ajunngitsumik kinguneqartoq takusinnaagatsigu siunissami innutaasunik naapeqateqartarnigut ingerlatiinnassavagut, naapeqateqartarnerlu inerisarlugu tamanut ammasumik katersuutsitsitilluta naapinneqarsinnaasarnissarput aamma ingerlattassavarput. Illoqarfinni tamani kommunit allaffiini atortorissaarutit atorlugit tamanut ammasumik katersuutsitsinissaq siulleq apriilip aallaqqaataani pisussatut pilersaarutigisimagaluarparput, tamannali Covid-19-ip pinngitsoortissimasaa siunissami aggersumi pisinnaanngoriarpat nalunaarutigiumaarparput.

Kujataata nunarsuarmioqatigiit kingornussassanik allattorsimaffianut ilanngunnikuunera inuussutissarsiornikkut takornariaqarnikkullu pitsaasumik iluaqutaanissaa suliniutigigatsigu kujataata Visitor Centereqalernissaa Naalakkersuisullu isumaqatigiissuteqarluta atsioqatigiissutigivarput. Matumani kujataata takornariaqarfissuanngornissaa anguniarlugu.

Narsami Neqi A/S-ip ukioq naallugu suliffinnik ataavartunik pilersitsisinnaanissaa siunertaralugu naapeqatigiinnerit ingerlattarsimasagut siunissamut isumalluarnarput, matumani sulisartut ataavartumik suliffissaqarnissaat soqutigisarigatsigu.

Uumasuuteqarneq, nersutaateqarneq aamma nunalerinermi naatitaateqarnermilu misileraanerit nutaaliornerillu pisariaqarput, kujataata nunatta nerisassaasivissuatut nukittorsartuarnera tamatsinnut iluaqutissanngorlugu.

Kommune Kujallermi sanaartorneq sivisuumik uninngasimasoq ukiuni kingullerni aallarteqqippoq, Narsamimi Nanortalimmilu utoqqaat illui suliarineqarput, atuarfiillu aamma iluarsartuunneqarlutik suliarineqarlutik. Taakku sanitigut meeqqerivik Angaju nutarterneqarluni suliarineqarpoq.

Sanaartornerup aallarteqqinnera sulisartunut suliffissanik malitseqarmat tamanna kommunimit qujamasuutitta ilagaat.

Kommunimi sulisunut illoqarfinni pingasuni inissialiornissamik sanaartornissaq aammalu meeqqerivinnik nutaanik sanaartornissaq kommunalbestyrelsip siunniussaanut ilaapput. Inissianik sanaartorneq Qaqortumi aallartereerpoq, kingusinnerusukkullu Narsami Nanortalimmilu sanaartortoqarnissaa pilersaarutaavoq.

Kujataa ilinniartoqarfissuuvoq taamaammat ilinniartunut kollegiat nutaat aamma sanaartorneqarnissaat pilersaarutigineqarpoq.

Kommune Kujallermimi innuttusiartoqqilerneq meerartaqarnerulernitsinnik kinguneqarmat meeqqerivinnik amerlanerusunik pisariaqartitsisoqalerpoq. Tamanna aamma nunaqarfittatta ilaani taamaappoq, taamaammat sumiiffinni pisariaqartitsiffiusuni ulluunerani paasisoqartoqarsinnaaneranut akuersissuteqarpugut.

Imartatsinni aalisakkanik pisassiissutit tulaassinissamut piumasaqaatitallit ukiuni kingullerni qaffariarsimapput, sulilu ilungersorluta amerleriaqqinnissaat uagut qinikkat suliniutigiuarparput – imartatta pisuussutaannik nalituunngortitsinissaq eqqarsaatigalugu.

Aatsitassarsiorneq eqqarsaatigalugu Tanbreezip Killavaat Alannguanni pinngoqqaatinik qaqutigoortunik qalluinissamut qinnuteqaataata akuersissutigineqarnissaanik ukiuni arlaqalersuni utaqqinerput manna isumalluarnartumi killiffeqartoq nuannaarutigaara.

Akuersissummimmi tuniussinissamut tusarniaanissat manna killiffigineqartut Naalakkersuisunit paasissutissiissutigineqarnikuuvoq. Tamanna suliffinnik nutaanik nassataqartussaammat Killavaat Alannguanni sulisoqalernissaa qilanaarutissaraarput.

Manna periarfissaq iluatsillugu kommunitsinni kulturikkut illorsuassaq kommunip allaffittaqartussaq aammalu multihali maanna pilersaarusiorneqarluni aallartereersoq inuttaasut peqataatillugit ilusilersorneqartussaajumaartussat saqqummiutinngitsoorusunngilakka, pilersaarutimmi taakku angisuut kommunitsinnut suliffissanik nassataqartussaammata.

Taakku siunissami sulisartut sulereernerminni ilaquttatik ilagalugit ataatsimoorfigisinnaassagaat takorloorsinnaavara, inuunermimi sulineq pingaaruteqarluarpoq taamaattorli imminut qasuersaartissinnaanissaq aamma pingaaruteqaqaaq – taamaammat immissinnut isumagisarnissarsi eqqaamassavarsi.

Oqaaseqarlunga aallartinninni eqqaavara sulisartut kommunitsinnut qanoq pingaaruteqartigisumik inissisimanerat – taamaammat sulisartuunerup kinguaariinniit kinguariinnut ingerlatittuarnissaanut meerartatsinnut inuusuttatsinnullu siunnersuilluarlutalu takutitsilluartarnissarput tamanut siunnersuutigerusuppara. Meeqqammi perorsakkagut malinnaasut taakkuupput nunatsinnut sullissisussaasut nunarpullu sinnerlugu siunissami kiinnertartussat, qanortoq ataqqeqatigiinneq pingaartillugu maligassiuiarnissarput eqqaamaneqartuarili.

Meerartagut meeraanerminni nuannaartorisaqartarput, nuannaartorisallu aallaavigalugit suliffigilerusutaq anguniarneqarsinnaasarpoq, taamaammat meerartagut meeqqat atuarfianni atuarneraniilli suliffinni misiliinissaannut tikilluaqqullugit periarfissiisarnissaq suliffeqarfinnut innersuussutigerusunnarpoq, taakkuuppummi uagut sulisinnaajunnaarutta uagutsinnut sullissilertussat.

Taamaammat matumani unneqarissumik sullissinissaq, suliffeqarfimmilu toqqissisimanartumik avatangiiseqartitsinissaq sulisitsisunut tamanut kaammatuutigerusunnarpoq, sulisartummi pitsaanerpaamik atugassaqartinneqarnissaat pingaaruteqaqaaq.

Tamanna uagut kommunitta iluani pingaartipparput, taammaammat suliffimmi peqquserluttoqarneranik nalunaaruteqartarneq, taasalu whistleblowerimik aaqqissuussaq ukioq manna suliffeqarfitta iluani atulerparput, tamatumalu saniatigut peqquserluttuliornermut pinaveersaartitsisunut Transparency International Greenlandimut ilaasortanngorpugut, tamanna unneqarissumik sulinitsinnik qulakkerinneqataassammat.

Suliasartut ullorsiornitsinni pinngitsoorusunngilanga nammineq kajumissutiminnik sulisartut ilanngullugit qujassuteqarnissannut; nukippassuimmi atorlugit inuiaqatigiinnut tunissuteqartuartarnersi tamatsinnut qujassutissaavoq, susassaqartitsinermimmi aammalu pinaveersaartitsinermik suliaqartuartarpusi, taama suliaqartuartarnissinni kommunerput najugaqarfigissallugu nuannersoq nuannernerulersittarparsi.

Sulisartut ullormi ullorsiornissinni tamassi pilluaqqigitsi, sulisartuuneq inuunermi tulluusimaarutissat annertuut ilagaat – sulisartummi inuiaqatigiinnut annertuumik tunissuteqartarput. Taamaammat kommunalbestyrelse sinnerlugu tamassi qutsavigeqqillusi ullorsiorluarnissassinnik kissaatsingaarpassi.