airplanebooksbriefcase business cogs cross election entertainment fish house law lockmedicalpeopleselfservices socialtax

- Inatsisartut aaliangigaannut Naalakkersuisut ajorsarput inuiaqatigiit pilliutigalugit!

Qaqortumi mittarfiliornissaq pillugu Kalaallit Airportip suliariumannittussarsiuussinermik isumaqatiginniniarnera piffissaq eqqorlugu naammassineqanngitsoq borgmesterip pakatsissutigaa.
21. august 2020

Kalaallit Airports Domestic A/S-ip Qaqortumi mittarfiliornissamut suliariumannittussarsiuussinerani neqeroorutit tallimaasut ingerlatseqatigiiffiup missingersuutaanik annertunerummata suliariumannittussarsiuussineq taamaatsiinnarneqarpoq, tamanna isumaqarpoq pilersaarutit malillugit Qaqortumi mittarfissap suliarineqarluni aallartinnissaa ukioq manna pisinnaajunnaartoq. Suliariumannittussarsiuussinerullu aallaqqaataaniit ingerlanniarneqalernera borgmester Kiista P. Isaksenip pakatsissutigaa.

-Tusagaq alianarpoq, pakatsinaqaarlu. Pilersaarutimmi malillugit Qaqortumi mittarfissamik sanaartorneq ukioq manna aallartittussaagaluartoq pisinnaajunnaartutut nalunaarutigineqarpoq. Tamanna akueriuminaappoq paasiuminaallunilu. Qaqortumimi mittarfiliornissamut missingersuutigineqartut suliariumannittussarsiuussinermilu titartakkat sanaartornermilu atortussat takussutissiat atorneqartut imminnut akimikkut nikingasumik inissisimasimammata mittarfissamik suliarinnikkusullutik neqerooruteqartut tallimaasut tamarmik akisuallaartumik neqerooruteqarsimassapput, tamanna projektiliortut ajorluinnartumik suliaqarsimanerannut ersiutaavoq imaluunniit Naalakkersuisut pilersaarutaasumik amigartunik aningaasaliissuteqarsimapput, taamaassimassappat uggornarpoq tamannami Kommune Kujallermi akisunaartussanngorparput, Kiista P. Isaksen oqarpoq nangillunilu.

-Ukiunimi kingullerni Kommune Kujallermi ineriartornissamik siunnerfeqarluta innuttaasut ukiuni arlaqartuni ikiliartuinnavissimanerat kommunalbestyrelsemi suliniuteqarluarnitsigut innuttaasut amerliartoqqilerneranut saqitissimavarput, tamanna Naalakkersuinikkut suliaqartunit illersorneqartariaqaraluarpoq, maannami killiffitsinni Naalakkersuisunit uupakaasiarineqartutut suusupagisaasutut misigineq allaat tatiginnikkunnaarnermik malitseqarpoq. Suliariumannittussarsiuussisummi suliarinnikkusuttullu neqeroorutigisaat aallaat takorsunnarsipput, saqqummiunneqaratariaqaraluarpullu. Inatsisartummi aaliangigaat Naalakkersuisut ajorsarfigalugu kujataani innuttaasut pilliutigeqqippaat, kingulliunneqartuaannarnerpullu pissusissamisuunngilluinnarpoq, ineriartorusuppugummi, Kiista P. Isaksen oqarpoq.

2018-mi Inatsisartut ukiaanerani ataatsimiinneranni Qaqortumi mittarfiliornissaq Inatsisartunit akuersissutigineqarmat kujataani qitiusumik mittarfittaarnissamut piareersarneq Kommune Kujallermi aallartinneqarpoq.

-Qaqortumi mittarfiliornissaq Inatsisartut akuersissutigereeraallu kommunitsinni inuussutissarsiuteqartut ineriartoqqinnissaannut aamma inuussutissarsiutinik nutaanik pilersitsiniartut aqqutissiuunniarlugit suliffeqarfik siunnersuisarfiusoq Innovation South Greenland pilersipparput, tamannalu atorluarneqalereerpoq. Maannali suliariumannittussarsiuussinerup aappaagumut kinguartinniarneqarnerani inuussutissarsiutinik nutaanik pilersitsiniartut tunnuartilersinnaanerat pisinnaasoq pinngitsoortikkusunnarpoq. Taamaattumik suliariumannittussarsiuussinermik aappaagumut kinguartitsiniarneq akueriinnarneqarsinnaanngilaq, ukiummi naannginnerani suliariummannittussarsiuussinermi isumaqatigiissuteqarnissaq suli periarfissaavoq, Naalakkersuinikkut suliaqartut sanngiinnerujussuat inuaqatigiit pilliutigineqarnerannik kinguneqartariaqanngimmat, Kiista P. Isaksen oqarpoq.

Ukiuni arlaqalersuni kujataani angalaniarneq kipiluttunartumik atugassaqartitisarpoq, matumanilu angalaniarnerusoq eqaannerusoq aqqutissiuunniarlugu Qaqortumi mittarfiliornissaq ukiorparujussuarni suliniutaasimavoq.

-Qaqortumi mittarfittaarnissamut ukiut 30-t sinnerlugit utaqqereerluta utaqqeqqissinnaanngilagut, kujataanimi ineriartoqqinnissaq eqqarsaatigalugu angalaniarneq pitsanngorsartariaqavippoq. Kiffartuussinermummi isumaqatigiissutip pitsaanngitsup pitsaanerulernissaa siunertaralugu Qaqortumi mittarfiliornissaq siunniunneqarnikuuvoq, matumani nunatsinni silannaakkut angalaniarnerup ataqatigiissarneqarnissaa siunertarineqarnikuulluni, ullumikkummi ataqatsigiittutut oqaatigineqarsinnaanngilaq. Ukiussaq ukiullu tulliuttorpassuit kujataani angalaniarneq eqqarsaatigalugu mersernarsereerpoq, matumanilu kiffartuussinissamut isumaqatigiissutissaq pitsaanerpaaq inuiaqatigiit akilersugaat tunniunniartariaqarpoq. Taamaattumik Qaqortumi mittarfiliornissamut kinguartitisoqannginnissaanut Kalaallit Airportip Naalakkersuisullu aaqqissuteqarnissaannik kaammattorsuppakka, utaqqisinneqaqqinnissatsinnummi akuersaaginnarsinnaanngilagut, pingaartumik mittarfissanit pingasuususunit Qaqortup Narsarlu akoirnanni mittarfissap Nunatta karsianiit aningaasalerneqarnissaa aaliangiunneqarnikuuvoq, taamaliornikkut oqaatigineqarnikuummat pingitsoornani sananeqarnissaa qulakkeerneqassasoq, Kiista P. Isaksen naggasiivoq.

Kalaallit Airportimit pilersaarutigineqartut malillugit juni 2020-mi Qaqortup mittarfissaani sanaartorneq aallartittussaagaluarpoq, tamanna augustip qaammataani pisusanngortoq nalunaarutigineqareersorlu kinguartitsisoqarnissaannik aaliangiisoqarpoq.