airplanebooksbriefcase business cogs cross election entertainment fish house law lockmedicalpeopleselfservices socialtax

Kommune Kujalleq aamma Inatsisartuni Eqqissisimatitsinermut Avatangiisinullu Ataatsimiititaliaq naapeqatigiipput

Marlunngorneq aggustip 25-ianni Ataatsimiititaliaq Qaqortumi kommunip ataatsimiittarfiani borgmester Kiista P. Isaksenimit, Kommune Kujallermi Teknikkimut Avatangiisinullu Ataatsimiititaliap siulittaasuanit Josef Petersenimit aamma Kommune Kujallermi aatsitassat pillugit siunnersortimit Ole Christiansenimit saqqummiivigineqarput.
26. august 2020

Saqqummiussinermi Kommunimi eqqagassalerineq matumani aamma siunissamut pilersaarutaasut, Kujataata Nunarsuarmiut kingornussassanut allattorsimaffianni ilaanera aamma aatsitassanut tunngasut saqqummiunneqarput.

-Nuannaarutigivara ataatsimiititaliamik naapeqateqarnerput, Inatsisartunimi siunnersuutigineqartut ataatsimiititaliamut innersuunneqarlutik suliassanngortinneqarsinnaasarput, taamaammat kommunitsinni avatangiiserisatsinnut soqutiginnillutik tusagaqarusunnerat eqqartueqatigiilluarnerpullu qujanaqaaq, Kiista P. Isaksen oqarpoq.

Assimi takuneqarsinnaapput (Saamerlermiit): Aqqa Samuelsen ataatsimiititaliap siulittaasuata tullia, Jens Danielsen ataasimiititaliami ilaasortaq, Kiista P. Isaksen Kommune Kujallermi borgmesteri, Doris J. Jensen ataatsimiititaliap siulittaasua, Mikivsuk Thomassen ataatsimiititaliami ilaasortaq aamma Kommune Kujallermi Teknikkimut Avatangiisinullu Ataatsimiititaliap siulilittaasua Josef Petersen. Ole Christiansen skype-ikkut peqataasoq assimi ilaanngilaq.