airplanebooksbriefcase business cogs cross election entertainment fish house law lockmedicalpeopleselfservices socialtax

Borgmester Kiista P. Isaksen: Qaqortup Mittarfissaa 1500 meteriussaaq!

Qaqortup mittarfissaata naalineqarnissaa periarfissaasoq Naalakkersuisumit saqqummiunneqartoq Kommune Kujallermi Borgmesterip akuerinngilaa.
11. september 2020

Qaqortumi mittarfissap naalineqarsinnaaneranik oqalunneq borgmesterip pissusissamisoorsorinngilaa, taannami isumaqarpoq Inatsisartut aaliangigaat akuersissutigineqarnikuusoq malinneqartariaqartoq.

-Inatsisartut 2018-mi Qaqortumi mittarfiliornissaq akuersissutigimmassut mittarfik 1500 meterinik takissuseqartoq akuersissutigineqarpoq, taamaattumik mittarfissap naalineqarnissaanik oqariartuuteqarneq pissusimisuunngilaq akuerineqarsinnaananilu. Tamanna pillugu Attaveqaqatigiinnermut Naalakkersuisoq piffissami aggersumi ataatsimeeqatiseraarput, ataatsimiinnissatsinnilu oqaloqatigiissutissaqarluaratta naapinnissaq qilanaarivara, Kiista P. Isaksen oqarpoq.

Borgmester Kiista P. Isaksenip oqariartuutigisaanut Kommune Kujallermi Inuussutissarsiornermut suliffeqarnermullu ataatsimiititaliap siulittaasua Simon Simonsen isumaqataavoq tapersiillunilu.

-Qaqortumi mittarfissamut ukiorpassuarni utaqqisimasatsinnut utaqqeqqissinnaanngilagut, Simon Simonsen oqarpoq.

Borgmester Kiista P. Isaksen, Inuussutissarsiornermut suliffeqarnermullu ataatsimiititaliap siulittaasua Simon Simonsen aamma Teknikkimut avatangiisinullu ataatsimititaliap siulittaasua Josef Petersen kiisalu Stine Egede Inuit Ataqatigiinniit septembarip 24-ianiit 29-iat ilanngullugu Nuummissapput. Nuummiinnerminni Naalakkersuisunik aamma Inatsisartuni Ataatsimiititaliani ilaasortanik ataatsimeeqateqassallutik.