airplanebooksbriefcase business cogs cross election entertainment fish house law lockmedicalpeopleselfservices socialtax

Peqatigiiffik Nuukasik Eqalugaarsunni pilersinneqarpoq

Pitsaaliuinermi immikkoortortaqarfiup Eqaluugaarsunni innuttaasunik oqallititsinerani peqatigiiffik innuttaasunut susassaqartitsilluni aaqqissuusisartussaq pilersinneqarpoq.
23. oktober 2020

Marlunngorneq 20. oktober Kommune Kujallermi pitsaaliuinermi immikkoortortaqarfik Eqalugaarsunniippoq, matumani meeqqanut Danialip Atuarfiani atuartunut paasititsiniaanermi nerisaqarneq, timimik aalatitsineq, tupa aamma inuttut inerikkiartorneq pillugu saqqummiussilluni.

Paasititsiniaanerup saniatigut Eqalugaarsunni innuttaasut Eqalugaarsunni pisariaqartinneqartut pillugit nereqatigiinnertalimmik oqallitsinneqarput.

-Oqallititsineq nereqatigiinnermik aallartittoq Eqalugaarsunni innuttaasunit peqataaffigineqarluarpoq. Innuttaasut oqallititsinermi peqataasut eqimattanut tallimanut agguataarlutik nunaqarfimminni pisariaqartinneqartut eqqartorpaat, unnuullu ingerlanerani peqatigiiffik Nuukasik nunaqarfimmi innuttaasunut susassaqartitsilluni aaqqissuussisartussaq pilersinneqarpoq, Kommune Kujallermi Qaqortumi pitsaaliuinermi siunnersorti, Anna P. Knudsen oqarpoq.

Eqalugaarsunni innuttaasut peqatigiiffimmik pilersitsisut pitsaaliuinermi immikkoortortaqarfimmiit pinnguarpassuarnik aamma Inuunerittamiit pinnguaatinik timip aalatinnerulernissaanut atorluarneqarsinnaasunik tunissuteqarfigineqarput.

-Tunissutigineqartut tigulluarneqarput nuannaarutigineqarlutillu. Nuannaarutigaaralu oqallinnermi Eqalugaarsummiut akisussaaffimmik tigusillutik sulerusussuseqarluarnerminnik takutitsinerat. Peqatigiiffimmimmi pilersitsisoqarnerani nunaqarfimmi sammisaqartitsilluni aaqqissuussinerit ingerlanneqarsinnaanngorput, alloriarnerlu taanna pitsaaliuinermi immikkoortortaqarfimmiit nuannaarutigaarput, Helga Nielsen Pitsaaliuinermi immikkoortortaqarfimmi pisortaq naggasiivoq.