PKU-mi pikkorissarnerit

PKU aqqutigalugu piginnaasanik ineriartortitsiviusumik pikkorissaanerit ilinniagaqarsimanngitsunut neqeroorutaapput. Pikkorissartitsinerit sivikinnerpaamik ullunik pingasunik sivisussuseqartarput, siunertaavorlu inuit inuussutissarsiutini akunnattoorfiusuni taakkunani inuussutissarsiorfigisaanni imaluunniit inuussutissarsiutini piorsaaffiullutillu annertusaaffiusuni piginnaasaqarnerulersinnaanissaat. Taamaalilluni suliffissaaleqinissap aarlerinartoqarsinnaanera annikillisineqarsinnaaqqullugu, ilutigalugulu inuussutissarsiutini piorsaaffiullutillu annertusaaffiusuni suliffissarsiornerit inissaqartitssinnaaqqullugit, assersuutigalugu inuussutissarsiutini ukunani:

• Sanaartorneq
• Takornariaqarneq
• Inuussutissarsiutilerineq
• Kommunini ulluunerani, ullu unnuarlu paaqqinnittarfiit
• Peqqinnissaq

Siunnerfigisat tassaapput inuttaasut ilinniagaqanngitsut 18-it sinnerlugit ukiullit suliffeqareersut imaluunniit suliffissaaleqisut. Sulisitsisorisaq pikkorissartitsinermut taartisianik pissarsitinneqartassaaq, akerlianillu pikkorissartoq piffissami pikkorissarnermini aningaasarsiaqaannassalluni.

Suliffissaaleqisut PKU-mi pikkorissartitsinerni aamma peqataasinnaapput. Pikkorissarnerup nalaani pikkorissartitsinermut ajunngitsorsiassamik pissarsitinneqartassapput.

Ilinniagaqarsimasut aamma qinnuteqarsinnaapput, suliami pineqartumi inissaqartitsisoqassappat. Ilinniarsimasulli tapiissuteqaataasinnaanngillat ajunngitsorsiassaqarnatillu PKU-mi pikkorissaqataanermi.

PKU-mi pikkorissartitsinerit inuussutissarsiornermik ilinniarfinnit neqeroorutigineqartarput. Inuussutissarsiornermik ilinniarfiit maannamut PKU-ni pikkorissartitsinernik neqerooruteqartartut tassaapput:

• Campus Kujalleq
  Niuernerup, takornariaqarnerup, aallartisaanerup, aningaasanik naatsorsuuserinermik paasinninnissaq tunngaviusumillu qarasaasialerinermut pikkorissaanerit.
• INUILI
  Nerisasserinermi eqqiluisaarnermullu tunngasuni suliat pillugit pikkorissaanerit.
• Imarsiornermik Ilinniarfik
  Inuussutissarsiutigalugu aalisarnermi isumannaallisaanermut pikkorissaanerit.
• KTI Aatsitassarsiornermik Ilinniarfik
  Pikkorissaanerni neqeroorutigisarpaat maskiinanik aqutsineq (maskinfører), oqimaatsunik usingiaanermut tunngasumik pikkorissaanerit aammalu qajannaarsukkanik     kivitsinerit.
• KTI Sanaartornermik Ilinniarfik
  Qalissalerineq, ruujorilerinermi ilusilersuinermi teknikki, qiassaatilerineq, sanaffinni sulisartunut pikkorissaaneq, stilladsilerineq taavalu asbest, PBC aamma oqummut   tunngasuni pikkorissaanerit.
• KTI Saviminilerinermik Ilinniarfik
  Quersuarni nioqqutinik nussuissut (gaffeltruck) aammalu kranbiili oqimaatsunik kivitsisinnaasunut tunngasuni pikkorissaanerit.
• KTI Oqaatsinik pikkorissarfik
  Tuluttut pikkorissaanerit
• Perorsaanermik Ilinniarfik
  Ulloq unnuarlu isumaginninnermut tunngasuni pikkorissaanerit.
• Peqqissaanermik Ilinniarfik
  Peqqissaanermut ikiortit, tapersersortinullu pikkorissaanerit.

Malugiuk
PKU-ni pikkorissaanerit najukkami aallaaviatigut ingerlanneqartarput. Pikkorissartitsinissarlu atortussatigut piumasaqaatitallit pineqarpata, inuussutissarsiornermik ilinniarfinni pikkorissartitsisoqartarpoq.

PKU aqqutigalugu pikkorissaanernut qinnuteqarsinnaanissannut piumasaqaataavoq 18-inik ukioqalereersimassasutit.

PKU aqqutigalugu pikkorissaanerit ilinniagaqarsimanngitsunut naatsorsuusaapput, taamaattumik nalinginnaasumik qinnuteqarnermi akuerisaanissamut piumasaqaateqarfiusaratik. Pikkorissartitsinerilli ilaat ilaatigut Aatsitassarsiornermik Ilinniarfimmi tamakkiisumik ilaannakortumilluunniit tuluttut ingerlanneqartarput. Taamaattumik piumasarineqaqqaassaaq pineqartuni akuerineqaqqaartinnak tuluttut pikkorissarnermi angusaqaqqaarsimassasutit.

Pikkorissartitsinerni siunertarineqarpoq suliffeqarfinni periarfissanik pitsanngorsaanissaq, imaluunniit suliffissaaleqisuugaanni suliffeqalernissaq. Naliliineq naapertorlugu pikkorissarnissamut qinnuteqarninni siunertarineqartut naapertuutsinneqanngippata pikkorissaqataasinnaanngilatit.

Pikkorissartitsinerit ilaat immikkoortukkuutaanut, tassa modul-inut, arlalinnut aamma aaqqissuusaasarput. Taakkunani piumasaqaataasarpoq assersuutigalugu modul 1 angusiffigisimassagit modul 2-mut ingerlariaqqissinnaassaguit.

PKU aqqutigalugu pikkorissaqataasimaguit pisussaaffigissavatit:

• Pikkorissarnermut takkuttarnissat.
• Pikkorissartinnermi tunniusimallutit peqataasarnissat.
• Pikkorissarnermi naliliinerup peqataaffigisarnissaa.
• Aammalu pikkorissartitsineq inaarutaasumik misilitsinnermi naggaserneqassappat tassani peqataanissat.

Pikkorissartitsinermut takkutinngikkuit pikkorissartutut ajunngitsorsiarsisinnaanngilatit angusiffiginagulu pikkorissartinnerit. Pikkorissartitsinermi tunniusimallutit peqataanngikkuit pikkorissartitsineq aamma angusiffiginavianngilat. Pikkorissartitsisup aalajangissavaa pikkorissarnermik kikkut naammassinnissimanersut.

Nammineq napparsimaneq imaluunniit qaniginerpaasat akornanni napparsimasoqarnera kisimik akuerineqarsinnaapput pikkorissariartunngitsoornissamut tunngavigisatut.

PKU aqqutigalugu pikkoriassaqataaguit pisinnaatitaaffigissavatit:

• Suliffeqaruit pikkorissartitsinermullu piffissap suliffiusussap iluani ingerlanneqartassappat aningaasarsiaqaannarnissat. Sulisitsisinullu pikkorissarnerpit nalaani pikkorissarnerpit nalaani pikkorissartitsinermut ajunngitsorsiassamik pissarsissaaq.
• Pikkorissarnermut taartisiat, suliffissaaleqisuuguit.
• Pikkorissarnivit naammassereernerani pikkorissarnermut uppernarsaatisinissaat.

Malugiuk
Angalanissat najugaqarfigisassallu ilinniarfeqarfiit aaqqissuutissavai, pisariaqarpat Majoriaq suliffisarsiuussisarfillu suleqatigalugit.

PKU aqqutigalugu pikkorissartitsinissaq ilinnut piukkunnartoq siumorukku, sulisitsisunnut saaffiginnissinnaavutit periarfissat suuneri paasiniarlugit. Pikkorissarnermi piffissap suliffiusussap iluani ingerlanneqassappat, sulisitsisunnit akuersissummik pissarseqqaassaatit PKU aqqutigalugu pikkorissaqataassaguit. PKU aqqutigalugu pikkorissarneq piffissap suliffiusussap avataani ingerlanneqassappat pikkorissarnermut taartisiaqassanngilatit, tamatumani aningaasarsiannik annaasaqarnaviannginnavit. Suliffissaaleqisuuguit periarfissatit paasiniarumallugit suliffissarsiuussisarfimmut imaluunniit Majoriamut saaffiginnissaatit.

Illit sulisitsorisalluunniit pikkorissartitsinermut akiliummik akiliissanngilasi. Namminersornerullutik Oqartussat ilinniarfiup PKU-mi pikkorissartitsinermut atatillugu aningaasartuutai matussusissavaat. Inuussutissarsiornermik ilinniarfiit pikkorissartitsinissamut atasumik angalanermut, najugassikkallarnermut nerisaqarnermullu aningaasartuutit aamma matussusertarpaat.

Lærling-it ilinniagaqarniartullu allat PKU-imi pikkorissartitsinernut atatillugu ikiorsiissutisiaqarsinnaanngillat. Inuit suliffeqanngikkallarnermi ikiorsiissutinik pisartagallit pikkorissarnermut akissarsianik pissarsisinnaanngillat, taamatullu suliamik ilinniagaqarsimasut tapiissutisisinnaanatik.

PKU-mi pikkorissartitsinerit suliamik ilinniagaqarsimanngitsunut suliffeqartunulli pingaarnerusumik sammitinneqarput, taakkununngalu nalunaarnissaq pigajuttarpoq sulisitsisup ilinnut saaffiginninneratigut soqutiginninnerit paasiniarlugu. Sulisitsisut aamma taannaavoq peqataanissannik nalunaarutiginnittussaq.

Suliffissaaleqisuuguilli Majoriap imaluunniit suliffissarsiuussisarfiup peqataanissat nalunaarutigissavaa. Sulisitsisuit, Majoriap imaluunniit suliffissarsiuussisarsiup arlaasa nalunaarutigigaluarpatilluunniit, qinnuteqarnissamut immersuiffissaq peqatigiillusi immersussavarsi. Suliffissaaleqisuuguit iliuusissatut pilersaarut immersussavattaaq. Immersornissaanut suliffissarsiuussisarfimmit imaluunniit Majoriamit ikiorneqassaatit.
Qitiusumik ilinniarfiit tamarmik immikkut qinnuteqarnissamut nammineq immersuiffissiaqarput, taakkulu nittartagaanniipput. Immersuiffissiaq illit sulisitsisuilluunniit aamma ilinniarfimmut imaluunniit suliffissarsiuussisarfimmut toqqaannartumik saaffiginnillusi pissarsiarisinnaavarsi.

Inuussutissarsiornermik ilinniarfik akuerineqarsimanersutit pillugu ilinnut toqqaannartumik paasissutissiissaaq.

Inuussutissarsiornermik Ilinniarfiit qinnuteqarnermut nammineq immersugassaateqarput, nittartakkaminni tigussaasuuvoq taanna immersugassaq. Illit imaluunniit sulisitsisut aamma inuussutissarsiornermik ilinniarfimmut Majoriamulluunniit saaffiginninnikkut immersugassaq pisinnaavarsi.

• AMA-mi pikkorissarnerit