Kalaallit Nunaanni suliffissaqartitsineq pisortanit aamma namminersortunit ingerlatsivigineqarpoq. Namminersortutut aamma pisortat ingerlassaanni sulinermi atugassarititaasut inatsisit aqqutigalugit maleruagassiorneqarnikuupput. Pisortani atorfilinnut atorfeqarnermi atugassarititaasut, inunnut ataasiakkaanut atuuttut aamma matumani isumaqatigiissutit malillugit maleruagassiorneqarnikuupput.
Isumaqatigiissut tassaavoq sulisitsisup ataatsip imaluunniit amerlasuut aamma sulinermik inuussutissarsiutillit amerlasuut akornanni isumaqatigiissutaat.
Sulisartut kattuffiisa assigiinngitsut Kalaallillu Nunaanni Namminersorlutik Oqartussat akornanni isumaqatigiissutit isumaqatigiinniutigineqartarput. Ataatsimoortumik pisortat isumaqatigiissutaat matumani pineqarput – kommunini Namminersorlutillu Oqartussani sulisunut atuupput, maleruagassallu makku aalajanersarneqarlutik:
- Akissarsiat minnerpaaffissaat
- Tapit
- Sulisitsisup sulisullu soraarnerussutisiassaanut tapiissutaat
- Sapaatip akunneranut piffissaq suliffiusussaq
- Qaangiuttoornermut akissarsiat
- Soraarniarluni siumut nalunaareernissamut piffissaliussaq
Isumaqatigiissut inatsisinut aporaatsinneqarsinnaanngilaq, atorfillilli atugaatigut pitsanngorsaasinnaavoq.
Suliffinni sulisutut sinniisut, sulisartut kattuffiat attavigineratigut isumaqatigiissut ilinnut tunngasut pissarsiarisinnaavat, imaluunniit Naalakkersuisuts nittartagaani (danskisut allassimasumut ingerlaqqippoq - danskisut allassimasuani isumaqatigiissutit amerlanerummata) nassarisinnaavat.
Kalaallit Nunaanni kattuffiit arlalissuupput. Isumaqatigiissutit assigiinngitsut malillugit nalinginnaasumik kikkut atorfeqarnersut uani atuarsinnaavat. Takussutissaq tamakkiisoq link qulaani takuneqarsinnaasukkut atuarneqarsinnaavoq.
Sulisartut kattuffianni ilaasortaanissat piumasaqaataanngilaq – aamma illit suliassaqarfiit eqqarsaatigalugu pisariaqanngilaq – taamaattoq suliassaqarfimmi kattuffiup isumaqatigiinniutigisaani ilaatinneqassaatit.