Inissiap iluarsartuunnissaa, pitsanngorsarnissaa imaluunniit allilerneqarnissaa akisusinnaavoq.
Illuliortarnernut aningaasalersuineq pillugu Inatsisartut inatsisaat 1. januaari 2018-imi atulersinneqarpoq taannalu naapertorlugu inissiavit iluarsartuunnissaanut, pitsanngorsarnissaanut imaluunniit allilerneqarnissaanut taarsigassarsinissamut kommunimut qinnuteqarsinnaavutit.
Inissiat pioreersut iluarsartuunneqarnissaannut, pitsanngorsarneqarnissaannut aamma allilerneqarnissaannut kommune aningaasartuutit katillugit 40 %-iisa tungaanut taarsigassarsititsisinnaavoq, taamaattoq amerlanerpaanik 300.000 koruuninik. Illit nammineerlutit sinneri ikinnerpaamik 60 %-ii aningaasalersussavatit.
Taamaallaat inissiamut pineqartumut iluarsartuussinissamut, pitsanngorsaanissamut imaluunniit alliliinissamut ataatsimut taarsigassarsititsisoqarsinnaavoq.
Inissiap angissusaa alliliinerup kingorna 110 m2-imik anginerulerpat alliliinissamut taarsigassarsititsisoqarsinnaanngilaq.
Erniaqanngitsumik aamma akitsuuteqanngitsumik taarsigassarsititsineq matumani pineqarpoq, taannalu naapertorlugu inissiaq tamaat qularnaveeqquteqartinneqassaaq. Taarsigassarsititsinermi taarsigassarsiaasinnaasut allat inissiami isumannaallisarneqarnissaa eqqarsaatigalugu pingaartinneqarput.