Erninermi ullormusianik qinnuteqarit

Erninermi ullormusiat aningaasaqarnikkut ikiorsiissutaapput, angajoqqaat angajoqqaavissiallu naartunermi, erninermi meeravissiartaarnermilu atatillugu sulinngiffeqarnerminnut pissarsiarisinnaasaat. Angajoqqaanngortussaaguit pisortaniillu piffissami siusinnerusukkut pilersorneqarnak, erninermi ullormusiaqarneq pillugu malittarisassanut ilaavutit.

Erninermi ullormusianik qanoq annertutigisunik pisinnaanersutit assigiinngilaq, matumani sulinermik inuussutissarsiortuunersutit, ilinniartuunersutit, namminersortuunersutit imaluunniit namminersortumik inooqateqarnersutit apeqqutaalluni.

Erninermi ullormusiat ullut 14-ikkaarlugit tunniunneqartarput.

Erninermi ullormusiat akileraaruteqarfiusussaapput.

Erninermi ullormusianik pisartagaqarsinnaavutit illit:

• Kalaallit Nunaanni najugaqartutut inuit allattorsimaffianni nalunaarsorneqarsimaguit
• Sapaatit akunneri kingulliit 13-it sivikinnerpaamik akunneq ataaseq sulisimaguit
• Sulinngiffeqarnerup nalaani sulisitsisunnit akissarsiaqanngikkuit
• Naartunermi, erninermi meeravissiartaarnermilu inatsimmi piumasaqaataasut naammassisimagukkit

Pisortani sulinermik inuussutissarsiuteqartuuguit
Pisortani atorfeqaruit sulinngiffeqarnerullu nalaani akissarsiornak, erninermili ullormusiaqarsinnaatitaallutit, SIK-p isumaqatigiissutaa malillugu sulisartup ilinniagaqarsimanngitsup 18-it sinnerlugit ukiullip ikinnerpaatut akissarsiarisartagaata erninermi ullormusiat amerlaqatigaat. Aningaasat taakku akunnernut sapaatit akunnerini kingullerni 13-ini suliffigisimasavit naleqatigaat, taamaattoq sapaatip akunneranut akunnerit amerlanerpaamik 40-t tikillugit. Sapaatip akunneranut akunnerit ikinnerpaamik 14-it pisinnaavatit.

Ilinniagaqartuuguit
Ilinniartuuguit erninermi ullormusiat ilinniarnersiutivit, sulillutit misiliininni akissarsiavit imaluunniit meeqqamut tapit ilanngullugit tapiissutisiarisartakkavit, mannalu tikillugu pissarsiarisarsimasavit amerlaqatigaat aamma meerartaannut meeqqamut tapit allat ilaassapput.

Namminersortuuguit imaluunniit ikiortaaguit
Namminersortuuguit imaluunniit aapparisannut inooqatigisannulluunniit namminersortumut ikiortaaguit, erninermi ullormusiatit sapaatit akunnerini kingullerni 13-ini isertitarisimasavit naleqatigaat.

Isertitatit uppernarsarsinnaassavatit, assersuutigalugu kontup assilinera, akileeqqusissut imaluunniit tunisinermik allagartat atornerisigut. Isertitatit uppernarsarsinnaanngikkukkit sapaatip akunneranut akunnerit 14-it naleqataanut erninermut ullormusiaqassaatit. Sulinngiffeqarnissaq sioqqullugu isertitatit sapaatip akunneranut erninermut ullormusiat akunnernik 14-inik annikinnerusimappata tamanna aamma atuuppoq.

Annertunerpaamik sapaatip akunneranut akunnernik 40-nik erninermut ullormusiaqarsinnaavutit.

Erninermi ullormusianik pisartagaqalernissaq qinnuteqaatiginiarukku, najukkanni innuttaasunut sullissivimmut imaluunniit nunaqarfimmi allaffimmut saaffiginnissaatit imaluunniit online-kkut qinnuteqarlutit. Pappiaqqat uppernarsaatit assigiinngitsut nassassagakkit eqqaamassavat.

Meeqqamut anaanaasoq
Meeqqamut anaanaasup nassiutissavaat nassarlugilluunniit:

• Qinnuteqaatitut immersugassaq immersugaq
• Ernisussiortumit naartunermut uppernarsaat
• Sapaatit akunnerini kingullerni 13-ini akissarsiavit allagartaat
• Akileraartarnermut allagartat
• Kontuit normua
• Sulinngiffeqarnerup nalaani sulisitsisunnit akissarsiaqartitaannginnissamut uppernarsaat

Meeqqamut ataataasoq imaluunniit anaanaaqataasoq
Meeqqamut ataataasup imaluunniit anaanaaqataasup nassiutissavaat nassarlugilluunniit:

• Qinnuteqaatitut immersugassaq immersugaq
• Sapaatit akunnerini kingullerni 13-ini akissarsiavit allagartaat
• Akileraartarnermut allagartat
• Kontuit normua
• Meeqqap anaanaanut katissimanngikkuit, ataatassarsiuussinermut immersugassaq Politiineersoq immersugaq imaluunniit anaanaaqataassutsinnut uppernarsaat
• Sulinngiffeqarnerup nalaani sulisitsisunnit akissarsiaqartitaannginnissamut uppernarsaat

Angajoqqaavissiat angajoqqaarsiallu
Angajoqqaavissiat angajoqqaarsiallu aamma erninermi ullormusianik qinnuteqarsinnaapput. Erninermi ullormusianik qinnuteqarniaruit najukkanni innuttaasunut sullissivimmut imaluunniit nunaqarfimmi allaffimmut saaffiginnissaatit.

Meeqqamut anaanaasoq
Naatsorsuutigisamik erninissamut sapaatit akunneri 13-it sioqqullugit sulisitsisunnut nalunaaruteqassaatit.

Ernereernerup kingorna kingusinnerpaamik sapaatit akunneri 12-it qaangiuppata qaqugu suliartoqqinnissat naatsorsuutiginerit pillugu sulisitsisut nalunaarfigissavat

Meeqqamut ataataasoq imaluunniit anaanaaqataasoq
Sulinngiffeqarnissat qaqugu aallartissasoq naatsorsuutiginerlugu sulisitsisunnut aallartitsinnagu kingusinnerpaamik sapaatit akunneri 4-t qaangiutsinnagit nalunaarutigissavat.

Meeraq unitsinneqassappat, ernereernerulluunniit kingorna nalinginnaasumit sivisunerusumik napparsimavimmiissappat, sulinngiffeqarnissavit aallartiffissaata piffissaa allanngortissinnaavat. Sukkanerpaamik sulisitsisut nalunaarfigissavat.

Napparsimavimmut uninneq
Piffissami sulinngiffeqarfinni meeraq napparsimavimmut unitsitaassappat, sulinngiffeqarnerit sivitsorniarukku sulisitsisunnut sukkanerpaamik tamanna pillugu oqaluttuarissavat

Aappaata sulinngiffeqarfiani taarsiisoq
Angajoqqaajusup aappaa toqussagaluarpat, perululissagaluarpat, immikkulluunniit allanik peqquteqarluni sulinngiffeqarsinnaanngippat, sulinngiffeqarneranut angajoqqaajusup aappaa pisinnaavoq. Angajoqqaajusup aappaata sulinngiffeqarneranut pissaguit sulisitsisunnut sukkanerpaamik tamanna oqaluttuarissavat.

Erninermi ullormusiaqarnissamik qinnuteqarsimaguit, qinnuteqaatillu tamakkiisumik taperserneqarsimanngippat, kommune tunngavilersuinissaminut maalaaruteqarnissamullu ilitsersuinissaminut pisussaaffeqarpoq.

Assersuutigalugu aalajangiinerit makku maalaarutigisinnaavatit:

• Sulinngiffeqarnerup nalaani ullormusiaqarnissamut pisinnaatitaaneq
• Erninermi ullormusianik pinngitsaalisaasumik aqutsivigineqarneq
• Aningaasanik utertitsinissamut piumasaqaateqarneq
  
  

Maalaaruteqarumaguit, Isumaginninnermi Maalaaruteqarnermi Aalajangiisartunut taama iliorsinnaavutit.

Isumaginninnermi Maalaaruteqarnermi Aalajangiisartunut maalaaruteqarit

• Naartunermi, erninermi meeravissiartaarnermilu sulinngiffeqartarneq
• Qitornavissiartaarneq