Angajoqqaanik suleqateqarneq

Meeqqat ulluunerani paaqqinnittarfimmiinnerminni ilikkalertornissaat ineriartornissaallu sapinngisamik pitsaanerpaanik tunngavissaqartinnissaat qulakkeerniarlugu, illit angajoqqaatut ulluuneranilu paaqqinnittarfimmi sulisut akornissinni suleqatigiinnissaq pingaaruteqarpoq.

Suleqatigiinnermut pingaarutillit ilagaat atuisunut ataatsimiisitsisarneq, angajoqqaat meeqqaminnik paaqqinnittarfimmiittuutillit tamarmik peqataaffigisassaat aamma sulisunit peqataaffigineqartoq. Atuisunut ataatsimiisitsisarnerni illit angajoqqaatut meeqqavit ulluinnarni atugaanut sunneeqataanissannut qulakkeerneqartarpoq.

Suliassat pingaarutillit aappaat tassaavoq, meeqqavit ineriartornerani nalilersuinerit uppernarsaatillu allattorlugit suliarineqartartut. Perorsaasut meeqqat tamaasa immikkut ukiumut marloriarlutik ineriartornerat pillugu allaaserisaqartassapput, allaaserisaallu tunngavigalugit ulluunerani paaqqinnittarfiup meeqqallu angajoqqaavisa akornanni oqaloqatigiittarput.

Ulluunerani paaqqinnittarfimmi tamatuma saniatigut nalunaarsuiffeqarpoq, taannalu paasissutissanik ilinnut meeqqannullu tunngasunik imaqartinneqarpoq ulluunerani paaqqinnittarfiup angajoqqaallu akornanni ajornannginnerusumik sukkanerusumillu attaveqaqatigiinnissamut qulakkeerinnittussamik.

Ulluunerani paaqqinnittarfiit tamarmik atuisunut ataatsimiisitsisarput. Atuisunut ataatsimiisitsisarnerit angajoqqaanit paaqqinnittarfimmiititaqartunit tamanit paaqqinnittarfimmilu sulisunit peqataaffigineqartarpoq, illillu angajoqqaatut meeqqavit ulluinnarni meeqqerivimmi inuuneranut sunniuteqarfigisinnaasattut atuutissalluni. Meeqqavit paaqqinnittarfianut tunngasunik siunnersuutissaqaruit oqallisigititassaqaruilluunniit atuisoqatigiit aqqutigisinnaavatit.

Meeqqat paaqqinnittarfimmi paaritittartillugu atuisut ataatsimiittarnerini peqataasassaatit.

Atuisut ataatsimiittarneri ukiumut ikinnerpaamik pingasoriarlutik ingerlanneqartassapput. Ulluunerani paaqqinnittarfimmi pisortaasoq atuisut ataatsimiinnissaannut aggersaasussaavoq. Atuisunut ataatsimiisitsinermi isumaqatigiinnginnermi, taasisoqarnerani aalajangiisoqartassaaq.

Atuisut ataatsimiinnerminni assigiinngitsorpassuarnik suliassaqarput, soorlu:
• Sammisassanik siunnersuuteqarneq aaqqissuussinerlu
• Perorsaanermut tunngasunik ukiumut pilersaarusiornermi peqataaneq
• Ukiumut pilersaarusianik malittarinninneq
• Paaqqinnittarfiup initaasa aaqqissuunnissaannut siunnersuuteqarneq
• Aalajangersimasunut aalajangiineq ulluinnarni meeqqamut sunniuteqarsinnaasunut.
• Ulluunerani paaqqinnittarfimmi pisortassamik atorfinitsitsinissamut inassuteqarneq

Atuisunut ataatsimiisitsinerni suliassat ataasiakkaat naammassiniarnissaannut suliassanik agguataariniarnermik suleqatigiissitaaraliornermillu aalajangiussaqartoqarsinnaavoq.

Ulluunerani paaqqinnittarfinni tamani perorsaanermik suliaqartut ikinnerpaamik ukiumut marloriarlutik meeqqat naliliivigalugit allaaserisaqartassapput. Naliliineq taamaattoq meeqqap ineriartorneranik imaqartinneqassaaq, soorlu inooqataanikkut, misigissutsikkut timikkullu.

Meeqqat tamakkerlugit ineriartornerannik naliliivigisarnerat marlunnik siunertaqarpoq. Siulleq tassaavoq meeqqat ineriartornerat qulakkeerneqassammat. Tassa meeqqap ineriartornerani arlaannik ukiuanut naleqqutinngitsoqarpat perorsaasut malugipallassinnaavaat, taamaalillunilu meeraq pineqartoq ajoquteqalinnginnerani ikiorserneqarsinnaalluni.

Imaassinnaavoq:
• Ineriartornermut allaaserisap takutippagu meeraq oqalunniarnermigut akornuteqartoq, taava sulisut meeraq assigiinngitsunik sammisaqartillugu sungiusartarsinnaavaat imaluunniit meeraq oqallorissaasumut ilisimasalimmut innersuussinnaallugu
• Ineriartornermut allaaserisap takutippagu meeraq pinnguaqatitaarniarnermigut ajornartorsiuteqartoq sulisut meeqqap tamatuminnga ilinniartinnissaa eqqumaffiginiarsinnaavaa

Ineriartornermut naliliinerup siunertaasa aappaat tassaavoq ulluunerani paaqqinnittarfimmi sulisut meeqqallu angajoqqaavisa akornanni suleqatigiinnerup qulakkeernissaa. Angajoqqaatut pisussaavutit meeqqavit paaqqinnittarfia suleqatigissallugu, paaqqinnittarfillu pisussaavoq ikinnerpaamik ukiumut marloriarluni meeqqavit ingerlanera pillugu oqaloqatigiinnissamut aggersassallutit.

Soorunami angajoqqaatut meeqqavit naliliivigineqarneranut akisussaaqataavutit angajoqqaatullu meeqqavit naliliivigineqarluni qanoq allaaserineqarsimanera paasissallugu pisinnaatitaaffeqarlutit.

Nalunaarsuiffik tassaavoq paasissutissat assigiinngitsut ilinnut meeqqannullu tunngasunik imalik meeqqavit paaqqinnittarfiata atorfissaqartitaa. Paasissutissat tassaasinnaapput:
• Meeqqap aqqa inuuialu
• Angajoqqaat angajoqqaatulluunniit akisussaasut aqqi
• Meeqqap najugaa
• Angajoqqaat oqarasuaataasa normui, angerlarsimaffiannut suliffiannullu
• Qaqugukkut qanorlu sivisutigisumik meeraq paaqqinnittarfimmiittassanersoq
• Paaqqinnittarfimmit aninermut patsisit

Nalunaarsuiffik meeqqavit paaqqinnittarfiani sulisunut pingaaruteqarpoq. Sulisut pisariaqartippaat paasissallugu meeqqavit napparsimalernerani nakorsiartariaqalerneraniluunniit kina sianerfigissanerlugu. Sulisuttaaq pisariaqartippaat illit meeqqannik aallersinnaanngikkaangavit kiap aallertussaanera paasissallugu.

• Ulluunerani paaqqinnittarfiit
• Ulluunerani paaqqinnittarfiit - Inissiineq, anineq akiliisarnerlu
• Ulluunerani angerlarsimaffimmi paarsineq