airplanebooksbriefcase business cogs cross election entertainment fish house law lockmedicalpeopleselfservices socialtax

Qitiusumik Ilaqutariinnik Sullissivik

Sulinitta siunertaa tassaavoq Kommune Kujallermi meeqqat, inuusuttut ilaqutariillu sumiginnakkat atugarissaarnissaat ineriartornissaallu qulakkiissallugu, tamannalu innuttaasoq qanimut suleqatigalugu oqaloqatigalugulu pissalluni, kisanni aamma susassaqarfiit allat peqatigalugit, taakku ilagalugit Isumaginnittoqarfik, Peqqinnissaqarfik aamma Atuarfeqarfik kiisalu pisariaqartitsineq najoqqutarlugu meeqqeriviit il. il. Ilaqutariinnik Sullissiviup sulisui tassaapput tarnip pissusaanik immikkut ilisimasallit, tarnikkut nappaatilinnik sullitseriaatsimi nakorsaatitortitsinikkut katsorsaasoq, ilaqutariinnik siunnersortit, inuusuttunut siunnersortit aamma siusinaarluni iliuuseqarnermi suleqataasut. Tamakku pillugit ataatungaani annertunerusumik atuarsinnaavatit.

Ammasumik siunnersuineq.  

Marlunngornerit tamaasa Ilaqutariinnut Sullissivitsinni / Illuutitsinni nal. 10.00-12.00-ip aamma 13.00-15.00-ip akornanni innuttaasunut tamanut ammasumik siunnersorneqarnissaq siunertaralugu ilitsersorneqarnissamik, tapersersorneqarnissamik oqaloqatiginninnissamillu pisariaqartitsisut neqeroorfigisinnaavavut.

Ilaqutariinnut Sullissiviup / Illuutit ammanerini innuttaasoq kinaluunniit takkulluni saaffiginninnissamut sianernissamulluunniit tikilluaqqusaavoq.
Innuttaasup oqaloqateqarnissaq sioqqullugu ajornartorsiutip suunera kiisalu siuliaqutini ullorlu nalunaarsuummi allassavai.

Malugiuk piffissaq sullinneqartumut ataatsimut atorneqartussaq sivisunerpaamik minutsinik 45-nik sivisussuseqassammat.

Oqaloqatiginninnissamut / siunnersorneqarnissamut pisariaqartitsigaanni ammasarfiit avataatigut "TUSAANNGA"-mut sianersinnaavutit, oqarasuaat: 80 11 80 imaluunnit 1899-imut SMS-erlutit. Nunatsinni innuttaasut tamarmik kinaassutsiminnik isertuussillutik oqarasuaatikkut siunnersorneqarnissamik neqeroorfigineqarput.

Piffissami uani TUSAANNGA attavigineqarsinnaavoq:
Ataasinngorneq-sisamanngorneq: nal. 9.00 – 22.00
Tallimanngorneq aamma arfininngorneq: nal.16.00 – 04.00
Sapaat: nal.16.00 – 22.00.

Inuit aappaminnut nakuusernermik aamma ajorniarnermik ajornartorsiutillit ALLIAQ aqqutigalugu akeqanngitsumik kinaassutsimillu isertuussilluni akeqanngitsumik ikiorneqarsinnaapput.

ALLIAQ attavigineqarsinnaavoq:
Ataasinngornermiit sisamanngornermut piffissami 20:00 - 22:00.
Oqarasuaat: 34 50 40
Nittartagaa <a href="https://www.alliaq.gl/da">Alliaq</a>


Ingerlanissaq.  

Ilaqutariinnut Sullisivimmi sullinneqassagaanni immersuereernikkut aatsaat kommunimi isumaginnittoqarfimmi sullissisumit innersuunneqarsimasariaqarpoq. Tamatumunnga ikiorneqassaguit najukkanni isumaginnittoqarfimmi sullissisoq attavigiuk (link).

Uatsinni sullinneqalerussi aaqqinniagassassi suuneri apequtaatillugit piffissaq sivikinnerusoq sivisunerusorluunnit atorneqarsinnavoq. Sullinneqarnissinni aqqusaagassat tassaasinnaapput iniutitsinni oqaloqatigiinnerit, angerlarsimaffimmi pulaarnerit, eqimattakkuutaarluni sammisassaqartitsinerit, matumani apeqqutaatillugu illit/ilissi qanoq neqeroorfigineqarnersusi.

Sullinneqarnerup qanoq katiterneqarnissaa eqqarsaatigalugu sullissisut ataasiakkaat tamatigut suliamut tunngasutigut naliliisarput. Aallaavittut sullissisumik oqaloqatigiinnerit arfineq-pingasut tikillugit neqeroortoqassapput. Oqaloqatiginninnermi kingullermi (imaluunnit killiffissiuilluni ataatsimiinnermi) naleqquttuusorineqarpat sullinneqarneq sivitsorneqarsinnaavoq.

Aallartisarnissamut piareersaatit  

Inneruunneqaruit/-russi ilinnut ilissinnullu ilaqutariiusunut iluaqutaassaaq sullinneqarnissaq sioqqullugu aallartisarnissap piareersarnissaanut piffissaq atorussiuk, piffissarlu allannguutaasinnaasunut aallartisaatitut atorlugu.

Matumani angerlarsimaffissinni atugarissaarnerulernissarsi anguniarlugu immaqa annikitsualuit allanngortinneqarnissaat isumaliutigisinnaavasi. Eqqarsaatit tamakku allannguinissamut pitsaasumik aallarniutaasinnaapput. Aamma sullinneqarnissannut atatillugu naatsorsuutigisasi angerlarsimaffiissinni oqaloqatigiissutigisinnaavasi - ilissi tamassi inuttut immikkut aamma ilaqutariittut kissaatigaasigik?

Neriusaaq  

Meeqqat inuusuttullu Qaqortumiittut 6-18-inut ukiullit sumiginnakkat Neriusaaq ornittakkatut atorpaat, tamatumalu saniatigut meeqqanut inuusuttunullu misissukkanut attaveqaatitut inissisimalluni.

Siunertaavoq meeqqat kinguaassiutitigut nakuusernikkullu innarlerneqarsimasutut pasitsaanneqartut imaluunniit ilisimaneqartut meeqqanut tulluartumik sumiiffissalerlugit ataatsimoorullugit piukkunnaateqartumik qajassuartumillu suliniuteqarfigineqarnissaat.

Neriusaap isumaginninnermut tunngatillugu ilaatigut misissuinermut atorneqarnissaa siunertaavortaaq, matumani meeqqamut inuusuttumulluunniit innarliisimaneq ilisimagaanni imaluunniit pasitsaanneqarpat.

Tarnip pissusaanik immikkut ilisimasallit susassareqatigiinnit suleqatigineqartarput, aammalu meeqqat inuusuttullu atugarissaarnerat allallu pillugit uppernarsaatissarsiorluni misissueriaatsit assigiinngitsut atorneqartarput. Siunissaq ungasinnerusoq isigalugu anguniagaq tassaavoq meeqqat inuusuttullu innarlerneqarsimasut piaartumik sukumiisumillu suliniuteqarfiginissaat, taamaalillutik tarnikkut atugarliornerat annikillisinneqarniassammat.                                      


Ulluinnarni nal.08.00-16.00 ammasarpoq, orniffimmilu meeqqanut inuusuttunullu siunnersortit marluk atorfinitsinneqarsimapput, taakkulu ulluinnarni ingerlatsineq akisussaaffigaat. Suliaannut tunngatillugu ilaatigut meeqqat ilaginissaat pitsaasumillu aamma toqqissisimanartumik atassuteqartalernissaq siunertaavoq.

Kommunimi pisortaniit siunnersorteqarnikkut ikiorneqarneq ingerlanneqartarpoq, tamatumalu saniatigut Neriusaami sulisut meeqqat pillugit nassuiaatinut misissuinernullu ikiuuttarlutik, kiisalu pinartoqartillugu ajornartorsiornermi tapersersuinerit katsorsaanerillu aallartisarnissaat periarfissaralugu.

Meeqqat sammisassaqartinneqarnissaat aaqqissuunneqartarpoq, assersuutigalugu nerisassiorneq, nereqatigiinneq, pisiuttuarneq, asimi unnueqatigiinnerit assigisaallu, taamaalillutik meeqqat iluatsilluarfiusumik misigisaqarnissaminnut periarfissaqalerniassammata, kingunerisaanillu meeqqanut nukittorsaataallunilu ineriartorfiuniassammat.

Neriusaami immikkut ineqarpoq oqaloqatiginnittarfiusumik aamma killisiuinermut atorneqartartumik, taakkunanilu pisariaqartitsineq najoqqutaralugu meeqqat inuusuttullu ataasiakkaarlugit oqaloqatigineqarsinnaapput.

Nalinginnaasumik ulluinnarni meeqqat eqimattakkuutaartarput, matumani meeqqanut inuusuttunullu siunnersortit peqatigalugit assigiinngitsunik sammisaqartarlutik, kisianni ataasinngornikkut ataasiakkaarilluni oqaloqatiginninnerit periarfissarivaat.

Suliassat Neriusaami ISUMAGISINNAANNGISAVUT:
* Atuarfinni aamma/imaluunniit paaqqinnittarfinni tapersersortaasinnaanngilagut.
* Inuusuttuaqqat 18-it sinnerlugit ukiullit ikaarsaariarfimmi sullinneqarneranni sullissisuusinnaanngilagut.
* Angajoqqaarsiat angajoqqaaviillu akornanni akunnermiliuttuusinnaanngilagut.
• Inuiaqatigiit aaqqissuussaaneranni meeqqap ingerlariaqqinnera tamatigut malinnaavisinnaaneq ajorparput, assersuutigalugu savaateqarfimmi, paaqqinnittarfimmi allanilu.

Neriusaamiissagaanni siullermik Isumaginnittoqarfimmiit Ilaqutariinnillu Sullissivimmi sullissisumit misissorneqarsimasariaqarpoq. Ilaqutariinnik Sullissiviup nalilerpagu meeqqap/inuusuttup inuusuttunut siunnersorti pisariaqartikkaa, taava misissorneqarnissaa Neriusaamut ingerlateqqinneqartarpoq.

Imatut paasineqassaaq meeraq/inuusuttoq inuusuttunut siunnersortimik neqeroorfigineqarpat, taava Isumaginnittoqarfiup (sullissisup) nalilersimassavaa ilaqutariit Ilaqutariinnik Sullissivimmit ikiorneqarnissamik pisariaqartitsisut, matumani Ilaqutariinnik Sullissiviup nalilersimappagu meeraq/inuusuttoq inuusuttunut siunnersortimik pisariaqartitsisoq.

Apisseq  

Apisseq tassaavoq angerlarsimaffik katsorsaaviusoq, ilaqutariinnullu inuuniarnikkut atugarliortunut "Siusissukkut Suliniutinut" attuumassuteqartunut neqeroorutaasoq, taakkua ilagalugit naartusut angajoqqaallu ukioqanngitsuniit marlunnik ukiulinnik meeraqartunut. Tassani ilaqutariit toqqissisimanartunik avatangiiseqarlutik angajoqqaajuneq pillugu tapersersorneqarsinnaapput, siunnersorneqarlutik ilitsersorneqarlutillu.

Apisseq isumaqarpoq nannup toquusarsimaartarfia. Taamaattumi nanoq arnaviaq piaqqani isumaginiarlugit qaammatini arlalinni toquusarsimasarpoq, piaqqallu anaanartik ilagalugu aninissamik tungaanut tassaniittarlutik. Tamatuma kingorna ataatsimoorlutik apisseq qimattarpaat.

Angerlarsimaffimmi katsorsaaviusumiiinneq taamaalilluni nannut apissimik atuisarnerannik assersuussineruvoq. Sumiiffillu taanna tassaavoq piaraasunik isumaginninneq, taamaalillutik silarsuarmut angeqisumut appakaannissamut piareersarneqarniassammata.

Pineqartoq tassaavoq ulloq unnuarlu neqeroorut ilaqutariinnut marlunnut inissaqarfiusoq, imaappoq ilaqutariinnut ataasiakkaanut tunngatillugu anaanamut/ataatamut amerlanerpaanillu meeqqanut marlunnut inissaqarfiusoq. Nal. 9.00-ip aamma 16.00-ip akornanni ulluunerani katsorsaaneq qitiutillugu sammineqartassaaq, tamannalu susassaqarfiit assigiinngitsut immikkut ilisimasallit ataatsimut suleqatigiinnerat aqqutigalugu ataqatigiissaarneqassalluni, taakkulu tassaapput sulisut peqqinnissaqarfimmeersut, tarnip pissusaanik immikkut ilisimasalinneersut, perorsaasuneersut isumaginnittoqarfimmeersullu tamarmik susassaqarfiup iluani ilisimasallit piginnaaneqartullu.

Katsorsaaneq imminik ilaqutariit ataasiakkaat pisariaqartitaannik aaqqinniagassaannillu aallaaveqartarpoq.
Tamatuma saniatigut eqqarsartaatsimut tunngatillugu oqaloqatigiinnerit iluaqutigalugit ilaqutariit nalaassimasaminnik kingunerlutsitsisimasut katsorsarneqarneqarnissaminnik, siunnersorneqarnissaminnik ilitsersorneqarnissaminnillu periarfissinneqartarput, taamaalillutik angajoqqatut piginnaaneqarfii sapinngisamik pitsaanerpaamik ineriartortinneqarniassammata.

Tamatuma saniatigut misissuinerit, perorsaanikkut ajornaatsumillu ilitsersuinerit aamma nassuiaanerit atorneqartarput, taamaalillutik angajoqqaat meeqqamik pitsaanerpaamik atugarissaarnissaat, ineriartornissaat ilinniarnissamillu pisariaqartitsinerannik nakkutiginnissinnaanerat ilinniutigineqarsinnaaniassammat.

Katsorsaavimmi najugaqarnissamik akuerineqartinnani sullissisumiit misissorneqarnissaq piumasaqaataavoq.

Quppersagaaraq Apisseq (qarasaasiakut pissarsiarineqarsinnaavoq) 

Ileqqoreqqusaq Apisseq (qarasaasiakut pissarsiarineqarsinnaavoq)

Pisunnaajunnaarnermi malittarisassat  

Isumaqatigiissuteqarneq malillugu takkussinnaanngikkaanni piffissaagallartillugu pisinnaannginneq nalunaarutigineqartassaaq (ajornanngippat ulloq sioqqullugu imaluunnit napparsimaleriataarnermi ullaakkut, soorlu suliffinni tamanna nalinginnaasoq). Taamaanngippat agginngitsoornertut naatsorsuutigineqassaaq oqaloqatigiinnissarlu ataaseq annaaneqassalluni.

Pingasoriarluni malittuinnarnik agginngitsooraanni suliaq unitsinneqarallassaaq, tamatumalu kingorna sapaatip akunnerisa marluk iluanni sullinneqartoq saaffiginninnissaminut periarfissaqarpoq. Tamanna pinngippat suliaq unitsinneqassaaq, tamatumalu kingorna Isumaginninnermut Ataatsimiititaliap aalajangissavaa suliaq qanoq ingerlariaqqissanersoq.

Inatsisit  

Ataatungaani takusinnaavatit Ilaqutariinnik Sulissivimmi immikkoortortaqarfinnilu assigiinngitsuni inatsisit sulinermi aallaaviusut.

• Meeqqat tapersersorneqarnissaannut inatsit - ”Meeqqat tapersersorneqarnissaannut Inatsisartut inatsisaat nr. 20, 26. juni 2017-imeersoq” (link)
• Pisortat ingerlatsineranni inatsisit – ”Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat nr. 9, 13. juni 1994-imeersoq” (link)
• Suliassat suliarineqartarnerat pillugu inatsit – ”Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq” (link)
• Inunnut ataasiakkaanut paasissutissat pillugit inatsit - ”Anordning Nr. 1238 af 14.oktober 2016 om ikrafttræden for Grønland af lov om behandling af Personoplysninger (link)”
• Pinerluttulerinermut inatsit - ”Kalaallit Nunaanni pinerluttulerinermut inatsit aallaavigalugu nalunaarut nr. 1045 7. september 2017-imeersoq” (link)”

Nipangiussisussaatitaaneq, nalunaartussaatitaaneq aamma uppernarsaasiineq  

Suliassat suliarineqartarnerat pillugu inatsimmi § 27 najoqqutaralugu Ilaqutariinnut Sullissivimmi nipangiussisussaatitaavugut. Tamanna isumaqarpoq akuersissummik pissarsisimanngikkaanni oqaloqatigiinnermi oqaluuserineqartut ingerlateqqinneqarsinnaanngitsut.
Sapinngisamik tapersersuineq pitsaanerpaaq anguniarlugu meeqqat 18-it inorlugit ukiullit pineqartillugit meeqqap/inuusuttup inunnik sullinneqarfianik suleqatiginninnissaq imaluunnit atuarnissamik neqeroornissaq pillugu angajoqqaat akuerseqqaartariaqarput. Suliassat suliarineqarneranni paasissutissat siunnersortimut attuumassuteqartumut tunniunneqarsinnaapput.

Meeqqat tapersersorneqarnissaannut inatsimmi § 16 najoqqutaralugu sakkortusisamik nalunaartussaatitaavugut. Tamanna ima paasineqassaaq pissutsinik meeqqap/inuusuttup atugarissaarnissaanut tunngatillugu pissutsinik ernumanartunik pasitsaassaqarutta misigisaqaruttaluunniit kommunimut nalunaarutiginninnissamut immikkut pisussaaffeqarpugut. Nalunaarutiginnittussaatitaaneq nipangiussisussaatitaanermit salliussarpoq.

Tamatuma saniatigut ilaqutariit 18-it inorlugit ukiulimmik meerallit kommunimut allamut nuuppata, taavalu Meeqqat tapersersorneqarnissaat pillugu inatsit najoqqutaralugu kommunimit aallarfigisamit tapersersorneqarnissaq pisariaqartinneqartoq nalilerneqarpat meeqqat tapersersorneqarnissaannut inatsimmi § 17 najoqqutaralugu kommunitut nalunaartussaatitaavugut. Imatut paasineqassaaq suliamut tunngatillugu kommunip qimatap paasissutissat kommunimut nuuffigisaannut allakkatigut nalunaarutigissallugit pisussaaffeqarpoq.

Tamatuma saniatigut Meeqqat tapersersorneqarnissaat pillugu inatsimmi § 52 najoqqutaralugu paasissutissat pissutsinut meeqqap inuttut ilaqutariinnilu atugaanut tunngassuteqartut Politiinut unnerluussisuutitaasunullu ingerlateqqissinnaavavut.

Tamatuma saniatigut inatsisit atuuttut tunngavigalugit killiffik pillugu nalunaarusiortoqassaaq. Imarisaa pillugu ilaqutariit ilisimatinneqassapput, ilassutissanillu paasissutissiinissamik periarfissaqarlutik.