Arfernik angisuunik piniarneq

Arfernik angisuunik arlalinnik piniarsinnaaneq akuerisaavoq. Tassaapput arfivik, tikaagulliusaaq, tikaagullik aamma qipoqqaq, taakku tamarmik piniarneqartarput neqaat, mattaat, orsuat aamma soqqaat pillugit. Arferit assigiinngitsut sisamaasut tamarmik kitaani sineriaata aamma kangiata sineriaata avataani uumasuupput, Tunumili tikaagulliit kisiisa piniarneqarsinnaapput.

Arfernik angisuunik piniarniaruit arfanniarnermut piumasaqaatit suut atuunnersut, arfanniarnermi pisassiissutit, aammalu pisatit qanoq nalunaarutigissaneritit pillugit piumasaqaatit maluginiassavatit.

Tamatuma saniatigut arferit sisamaasut tamarmik piniarneqarnerannut immikkut maleruagassaqarput, taakku ataani atuarsinnaavatit.

Arferit angisuut sisamat piniarniarlugit:
• Inuussutissarsiutigalugu piniarnermut allagartaqassaatit atuuttumik atorsinnaasumik
• Arfermik piniagassannik akuersissummik peqassaatit
• Piniarnermi sakkutut atoqquneqartut atussavatit
• Immikkut immersuiffissatigut tunniunneqarsimasukkut pisanik nalunaaruteqarneq
• Plastikki tunniunneqartoq atorlugu timaanit misissugassamik tigusilluni immikkullu immersuiffissaq ilanngullugu kommunimut tunniunneqassalluni

Malugiuk
Sumi arfernik piniartoqassanersoq kommunimi ileqqoreqqusaliortoqarsimasinnaavoq, aamma sumi arfernik takornariartitsisoqartassanersoq.

Piniarnermut allagartamik qinnuteqarit imaluunniit allagartat nutarsaruk uani

Arfernut qaartartunik arfanniarnermi piumasaqaataavoq, inuit kisimik arfanniarnermi qaartartunik atuinissamut pikkorissarnermik naammassisimasut tamakkuninnga pisisinnaallutillu atuisinnaapput.

Arfernut qaartartunik arfernik angisuunik piniaqataaniaraanni, qamutilik akuerisaq atorneqassaaq.

Akuersissummittaaq piginnittup sumiiffimmi piniarnermut aalisarnermullu nakkutilliisumut qaninnerpaamut piniarnissamut pilersaarut ullorlu suna pillugit siusissukkut ilimasaarereersimassaaq.

Arfermik aalajangersimasumik piniarnissamut akuersissut tassaavoq, arfermik aalajangersimasumik sumiiffimmi aalajangersimasumi pisaqarnissaq, Kitaani imaluunniit Tunumi. Akuersissut nammineq pigineqartussaavoq. Tamanna ima paasineqassaaq tuneqqusaanngilaq imaluunniit allamut tunniuteqqusaanngilaq. Arfanniartillutit akuersissutip kiisalu inuussutissarsiutigalugu piniarnermut allagartap tigumminissaanut pisussaaffeqarputit. Ataatsimut tikaagullinniarnermi piniaqataasut tamaasa aqqi akuersissutini allaqqassapput, taamaattorli immikkut immersuiffissaq atorlugu pisat nalunaarutiginissaanut piniaqatigiinnermi naalakkatut toqqakkap akisussaaffigaa.

Akuersissummik pissarsineq
Arfermik piniagassannut akuersissummik pissarsiniaruit, najukkanni innuttaasunut sullissivimmut imaluunniit nunaqarfimmi kommunip allaffianut saaffiginnissaatit.

Arferit angisuut sisamat piniagaanerini pisassiissutaasartut killeqarput. Arfanniarneq pillugu Ataatsimiititaliarsuup (IWC) pinngortitalerinermit siunnersuineq naapertorlugu pisassiissutit annertussusaat ukiunut arfinilikkaarlugit aalajangersartarpai. Nunani Avannarlerni Imaani Miluumasut pillugit Ataatsimiititaliartaaq (NAMMCO) pinngortitalerinikkut innersuussisarpoq.

Arferit angisuut piniagaanerini pisassiissutit marloriarlugit agguaanneqartarput.

Siullermik Naalakkersuisut pisassatut pisassiissutit annertussusiat aamma nunami agguaanneqartarnissaat aalajangersartarpaat Agguaassisartoqatigiit, Aalisarnermut Piniarnermullu Naalakkersuisoqarfik (APN), Kalaallit Nunaanni Aalisartut Piniartullu Kattuaffianit (KNAPK) aamma kommuniniitinuttaqartoq isumasioqatigalugit.

Tamatuma kingorna najukkani KNAPP-t isumasioqatigalugit arfanniarnermi pisassiissutit kommuninit agguaanneqartarput. Najukkani agguaassineq qinnuteqarnikkut pisarpoq. Pisassiissutit arferit aalajangersimasunut ukiumullu ilivitsumut atuuttarput. Kommunip aqutsiveqarfiini aggustip qaammataani pisassiissutit sinneqassappata, sinneri kommunimit agguaanneqassapput, APNN-imillu nuna tamakkerlugu pisassiissutit sinneqarpata septembarimi agguaatissallugit.

Tikaagulliusaat ukioq kaajallallugu piniarneqarsinnaapput. Tikaagulliusaaq arnaviaq piaraqarpat, taanna piaraaluunniit piniarneqassanngillat.

Angallatit tikaagulliusaarniarnissamut akuerisat ukuupput:
• Angallat minnerpaamik 11,0 meter-imik tamakkerlugu takissuseqassaaq (t.t.) imaluunniit
• Tikaagulliusaamut ataatsimut angallatit marluk tamarmik minnerpaamik 9,2 meter-inik (t.t.) takissusillit

Angallatit tuukkartalimmik qamutileqassapput ningittakkanut qalorsuarnulluunniit amooruteqassallutik minnerpaamik 5 tonsinik qaqitsisinnaasunik, imaluunniit qaqitsissummik amooruteqassallutik.

Qamutillit tuukkartallit sulloqqortussuseqassapput (sakkortussuseqassapput) minnerpaamik 50 mm tikaagulliusaanut akuerisanik arfanniarnermi qaartartoqassallutik. Arfanniarnerni tamani immikkut tuukkamik arfanniarluni qaartartortalimmik piareersimasoqartassaaq. Tamakku saniatigut aleqassapput sioqutalimmik avataasaqassallutillu pisarineqartup kivisinnginnissaanut naammattunik.

Tikaagulliusaaq pissataq sapinngisamik sukkanerpaamik niaquata tungaatigut arfanniarluni qaartartortalimmik aallaallugu toqunneqassaaq.

Arfiviit piniarneqarsinnaapput 1. april aallarnerfigalugu 31. december tikillugu. Arfiviit inerissimasut kisimik piniarneqarsinnaapput. Arfeq arnaviaq piaraqarpat, taanna piaraaluunniit pisarineqassanngilaq.

Arfivimmut ataatsimut angallatit pingasut tamarmik minnerpaamik 11,0 meter takissuseq tamakkerlugu (t.t.) takissusillit atoqquneqarput. Angallatit tamarmik qamutilinnik tuukkartalinnik aamma ningittakkanut qalorsuarnulluunniit amoorutinik minnerpaamik 5 tonsinik qaqitsisinnaassusilinnik amooruteqassapput imaluunniit qaqitsissummik atortuligaassallutik.

Tuukkartalinnik qamutillit minnerpaamik 50 mm-inik sulloqqortussuseqassapput arfivinnut akuerisanik arfanniarnermi qaartartortaqassallutik. Angallatit pingasuusut tamarmik piareersakkamik immikkut tuukkaqassapput arfanniarluni qaartartortalimmik aamma aleqassapput sioqutalimmik avataasaqassallutillu pisarineqartup kivisinnginnissaanut naammattunik.

Arfivik pissataq sapinngisamik piaarnerpaamik sakiaata tungaatigut arfanniarluni qaartartortalimmik aallaallugu toqunneqassaaq

Qipoqqaat ukioq kaajallallugu piniarneqarsinnaapput. Taamaallaat qipoqqaat inerissimasut piniarneqaqqusaapput. Qipoqqaq piaraqarpat, taanna piaraaluunniit piniarneqassanngillat.

Angallatit qipoqqarniarnissamut akuerisat ukuupput:
• Angallat ataaseq minnerpaamik 11,0 meter-imik (t.t.) takissusilik
• Qipoqqamut ataatsimut angallatit ikinnerpaamik marluk tamarmik minnerpaamik 9,2 meter-inik (t.t.) takissusillit

Angallatit tuukkartalimmik qamutileqassapput ningittakkanut qalorsuarnullu amooruteqassallutik minnerpaamik 5 tonsinik qaqitsisinnaasunik, imaluunniit qaqitsissummik amooruteqassallutik.

Qamutillit tuukkartallit sulloqqortussuseqassapput (sakkortussuseqassapput) minnerpaamik 50 mm arfivinnut akuerisanik arfanniarnermi qaartartoqassallutik. Arfanniarnerni tamani immikkut tuukkamik arfanniarluni qaartartortalimmik piareersimasoqartassaaq. Tamatuma saniatigut aleqassapput sioqutalimmik avataasaqassallutillu pisarineqartup kivisinnginnissaanut naammattunik.

Qipoqqaq pissataq sapinngisamik piaarnerpaamik niaquata tungaatigut arfanniarluni qaartartortalimmik aallaallugu toqunneqassaaq.

Tikaagulliit ukioq tamaat piniaqqusaapput. Tikaagulliit inerivissimasut kisimik piniarneqaqqusaapput. Tikaagullik arnaviaq piaraqarpat, taanna piaraaluunniit piniarneqassanngillat.

Tikaagullik pissataq sapinngisamik piaarnerpaamik toqunneqassaaq niaquata tungaatigut arfanniarluni qaartartumik qoorortuumilluunniit minnerpaamik 7,62 x 63 (.30-06)-imik sulloqqortussuseqartumik aallaallugu.

Tuukkartalimmik qamutileqarluni piniarneq
Angallatit tuukkartalimmik qamutilillit tikaagullinniarnermut peqataasut 9,2 meter-it (t.t.) aamma 22,0 meter-it (t.t.) akornanni tamakkerlugu takissuseqassapput. Ningittakkanut qalorsuarnulluunniit amooruteqassallutik minnerpaamik 2 tonsinik kivitsisinnaasunik, imaluunniit angallatit qaqitsissummik amooruteqassallutik.

Tuukkartalimmik qamutillit sulloqqortussuseqassapput minnerpaamik 50 mm tikaagullinnut akuerisanik arfanniarluni qaartartortaqassallutik. Tamatuma saniatigut aleqassapput sioqutalimmik avataqassallutillu pisarineqartup kivisinnginnissaanut naammattunik.

Qoorortoorsorluni ataatsimut tikaagullinniarneq
Piniarneq nunaqqatigiinnut annertuumik pingaaruteqarpat, qoorortoorsorluni ataatsimut piniaqatigiinneq immikkut ittumik akuersissutigineqarsinnaavoq. Qoorortuut minnerpaamik 7,62-mik (.30-06) sulloqqortussuseqassapput eqqarasuartaataanatillu seqqorasuartaataassanngillat. Ikinnerpaamik umiatsiaaqqat tallimat piniarnermut peqataassapput, naalakkamillu toqqaasoqarsimassaaq kommunimut pisamik nalunaaruteqartussatut akisussaasumik.

Piniarsinnaanermut akuersissummut peqatigalugu immikkut nalunaarutiginnittarnissamut immersugassamik pissarsissaatit. Arfermik angisuumik pisaqarsimaleruit, taanna immersugassaq immersussavat najukkannilu Innuttaasunut sullissivimmut tunniullugu, taakkulu Aalisarnermut Piniarnermullu Naalakkersuisoqarfimmut nassiutissavaat.

Tamatuma saniatigut timaanit misissugassamik tiguseriarlutit tunniussinissamut pisussaaffeqarputit, peqataanik pisaqarnermi arferup suunera, ullua sumiiffialu paasissutissiissutigissallugit. Misissugassaq Kalaallit Nunaanni Pinngortitaleriffimmut ingerlateqqinneqassaaq, tassanngaanniit arferit amerlassusaannik uumalluataarnerinnillu nakkutigineqartussaapput.

Arfernik angisuunik sisamanik piniarsinnaanermut periarfissarisannik aalajangiinerit sunniuteqartut pillugit naammagittaalliuteqarsinnaatitaavutit. Naammagittaalliuteqarniaruit allakkatigut naammagittaalliuteqassaatit Aalisarnermut Piniarnermullu Naalakkersuisoqarfimmut.

Naammagittaalliuutip allannissaanut ikiorserneqarusukkuit, najukkanni kommunimut saaffiginnissinnaavutit.