Sukkanerusumik pitsaanerusumillu sullinneqarnissaq qulakkeerumallugu pingaaruteqarpoq, paasissutissat nutaanerpaat Aalisarnermut Piniarnermullu Naalakkersuisoqarfimmut tunniussimasarnissaat. Taamaammat aalisarnermut akuersissutit pigeriikkat allanngorpat, Naalakkersuisoqarfimmut nalunaarutigissavat.
Tamatuma kingunerisaanik qinnuteqarnissamut immersuiffissaq immersussavat nassiullugulu imaattoqassappat:
• Suliffeqarfik aalisariulluunniit pillugu paasissutissat allanngorpata
• Akuersissummi aalisariummik ilassutissaqarniaruit imaluunniit piigaqarniaruit
Qaleralinnut saarullinnullu tunngatillugu umiatsiaaqqanut akuersissutit atuunneri 2016-imiit qaammatinik pingasunik 2017-imi 1. januar-imiit 31. marts tungaanut sivitsorneqarput.
Umiatsiaaqqanut akuersissutinut qinnuteqartarnerit 1. februar 2017-imiit kommuninit akisussaaffigineqalissapput. Taamaammat qaleralinniarnissamut, saarullinniarnissamut, nipisanniarnissamut kapisilinniarnissamullu kommunerisanni innuttaasunut sullissivimmut imaluunniit inuussutissarsiornermut siunnersortimut saaffiginninnikkut aalisarnermut akuersissummik qinnuteqassaatit. 2016-imi umiatsiaaqqamut akuersissummik, assersuutigalugu qaleralinniarnissamut, saarullinniarnissamut, nipisanniarnissamut imaluunniit kapisilinniarnissamut peqaruit, akuersissummik atulersitsinissaq ingerlaannaq pisinnaavat. 2016-imi assigiinnik akuersissutinik peqarsimanngikkaluaruilluunniit, aalisakkanut assigiinngitsut pineqartunut sisamanut tunngatillugu umiatsiaaqqamut akuersissummik qinnuteqarsinnaavutittaaq. Qinnuteqaatinni taamaallaat Imarsiornermik ilinniagaqarsimanerit allakkatigut uppernarsaannassavat.
Kommunimut toqqaannartumik 2017-imi umiatsiaaqqamut akuersissummik qinnuteqarniaruit 2016-imi assinganik akuersissummik peqassaatit. Akuersissummik nutaamik qinnuteqarniaruit, qinnuteqaatit kommunimit Aalisarnermut Piniarnermullu Naalakkersuisoqarfimmut ingerlateqqinneqassaaq.
Aalisariutinut 6 meter-inik anginerusunut akuersissutinik qinnuteqaatit Aalisarnermut Piniarnermullu Naalakkersuisoqarfimmut suli qinnutigineqartassapput.