Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO) Namminersorlutik Oqartussat ataanni nunami nerisassat isumannaatsuunissaannut, uumasunut nakorsaqarnikkut upalungaarsimanissamut aamma uumasut atugarissaarnissaannut pingaarnertut akisussaasut.
Kalaallit Nunaanni Uumasunut Nakorsaqarnermut Inuussutissalerinermullu akisussaaffik Namminersorlutik Oqartussat aamma Danmarkimi inuussutissalerinermut, aalisakkanut nunalerinermullu oqartussaqarfiup akornanni avillugu tigummineqarpoq.
Danmarkimi Fødevarestyrelsen suliffeqarfiit neqilerisut aalisakkerisullu akuerineqartarneri nakkutigineqarnerilu eqqarsaatigalugu oqartussani qullersaavoq, tassunga ilanngullugit umiarsuit suliffissuaatigisut, nunanut allanut niuernissaq siunertaralugu akuerineqarsimasut.
Uumasut nakorsaqarnerup nerisaqarnerullu tungaasigut Namminersorlutik Oqartussat aamma Fødevarestyrelsenip akisussaanerup tungaatigut suleqatigiinnerat pillugu allat uani atuarsinnaavatit.
Inuussutissanut tunngasut:
- Suliffeqarfiit inuussutissaleriffiusut aamma inuussutissanik siullertut tunisassiortut - akuersissuteqarneq, suliffeqarfinnik inuussutissaleriffinnik nunatsinni tuniniaavinnut nioqqutissiortunik ilitsersuineq nakkutilliinerlu,
- UNIO attaveqarfigiuk suliffeqarfik inuussutissaleriffiusoq aallartissagukku ingerlatarilissagukkuluunniit.
- Nerisassat isumannaatsuunissaat – ilaatigut inuussutissat tunuartinneqartussat pillugit piareersimaneq atuisunullu paasissutissiisarneq. Nappaatinik inuussutissatigoortunik atugaasoqalersillugu tunillaassuinermik sumiissusersiuineq.
- Neqinik nakkutilliineq – neqinik tamanik nunatsinni tuniniaavinnut naatsorsuunneqartunik toqoraavinni neqinik nakkutilliineq. Kalaalimineerniarfinni tuniniarneqartunik neqinik nakkutilliisoqartanngilaq.
- Uumasut nakorsaqarfiata killeqarfinnik nakkutilliinera - nunat allat angallataannik aalisakkanik aalisakkanillu tunisassianik EU-mut eqqussiniarlutik kissaateqartunik killeqarfimmi nakkutilliineq.
Uumasut nakorsaqarnerannut tunngasut:
- Uumasut atugarissaarnissaat – nakkutilliineq ilitsersuinerlu. Tamanna uumasunut tamanut atuuppoq, pingaartumik qimmeqarfiusuni qimminik qimuttunik aamma uumasuutinik taamatullu Kalaallit Nunaanni tamarmi uumasunik illumiutanik nakkutilliinermut.
- Uumasunik illersuineq - Uumasunik pisariaqanngitsumik naalliutsitaasunik imaluunniit paarineqanngitsunik illersorneqarsinnaasumik pineqanngitsunik, taava UNIO-mut nalunaarutiginnissinnaavutit.
- Passussinikkut nakorsaasersuinikkulluunniit ikiuunneq qimmit qimuttut, savaatillit qimmii nunalerinermilu uumasutit eqqarsaatigalugit.
- Malugiuk UNIO uumasuutinnik uumasut nakorsaqarfiattut katsorsaanermik neqerooruteqarsinnaanngimmat.
- Uumasunut nappaalatitsinaveersaarneq – matumani ilinniartitaaneq aamma kommunini qimmilerisunut perlerornermut, parvovirusimut aamma qimmit nappaataannut akiuussutissamik kapisisarnernut ilitsersuinerit.
- Uumasunut nakorsaqarnikkut nappaatinut upalungaarsimaneq – uumasuutit nappaataannik nalunaarutigineqartussaasunik nakkutilliineq nunanilu tamalaani oqartussanut assigiinngitsunut nalunaarusiortarneq.
- Nappaatit uumasut inuillu akornanni tunillaassorsinnaasut – Zonoo-sinik (Nappaatit uumasut inuillu akornanni tunillaassorsinnaasut) nakkutiginninneq, nalunaarutiginnittarneq aamma akiuiniarneq, soorlu perlerornermik. Perlerornermik pasitsaassaqarluni nalunaarutiginnittarneq pillugu uani atuaruk.
Innuttaasunik sullissineq:
- Inuussutissanik nunanut allanut annissisarneq – Danmarkimi kalaallit napparsimasut angerlarsimaffiinut inuussutissanik annissisarneq Fødevarestyrelsen suleqatigalugu.
- Uumasut nakorsaqarnerannut inuussutissanullu tunngatillugu paasissutissiisarneq – taamatuttaaq ilaatigut uumasunik nassataqarluni tikittarneq aallartarnerlu aamma inuussutissanik eqqussisarneq annissisarnerlu.