Nalinginnaasumik pisoqartillugu inuttut nammineq takkunnikkut taasineq ingerlanneqartussaavoq. Taamaaliorsinnaanngikkuilli - imaluunniit ullormi taasiviusumi taasivimmut taamaallaat ajornartorsiorujussuarlutit takkussinnaallutit - allakkatigut taasisinnaavutit. Tassa imaappoq, ulloq taasivissaq nallertinnagu ataani allanneqarsimasut ilaannut taasivissamut ataatsimut taasiartorsinnaavutit, tassanngaanniit illit kommuninnut taasissutit nassiunneqassalluni.
Ataatsimoorussamik nunaqarfinni aqutsisunut kiisalu ilagiit sinniisaannut qinersinermut allakkatigut aamma taasinissamut periarfissaqarputit.
Malugiuk
Allakkatigut taasissut taasiartorfimmut qinersisartup qinersisussat allassimaffimmi nalunaarsorsimaffigisaanut ullormi qinersiffiusup ingerlanneqarnera naatinnagu tiguneqareersimassaaq, imaappoq Inatsisartunut qinersinermi nal. 20.00 kommunalbestyrelsimullu qinersinermi april-imi marlunngornermi siullermi nal. 20.00 nallertinnagu. Taamaattumik siunnersuutigineqarpoq piffissaalluartillugu allakkatigut taasisoqassasoq. Qinersinerup naannginnerani allakkatigut taasinerup qinersivimmut piffissaagallartillugu tunniutereerneqarsimanissaa taasisartup nammineerluni akisussaaffigaa.
Taasiviit
Sumi taasisinnaaninnut sumiinnerit apeqqutaassaaq:
• Napparsimmavimmi uninngaguit imaluunniit allatut peqqissutsimut paaqqutarineqarnermullu pissutsit atugaralugit, napparsimmavimmi imaluunniit paaqqutarineqarfimmi taasisinnaavutit
• Kalaallit Nunaanni pinerluuteqarsimasunut isumaginnittoqarfiup ataaniittumi isertitsivimmi inissinneqarsimaguit, isertitsivimmi taasisinnaavutit
• Sumiiffimmi avinngarusimasumi najugaqaruit, immikkut namminerisaminik taasiveqanngitsumi, inummi qinersinermut siulersuisut toqqarsimasanni taasisinnaavutit
• Timmisartoqarfimmi, silasiorfeqarfimmi assigisaaniluunniit kommunit aggornerisa avataanni inissisimaguit, inummi Qinersinermut ataatsimiititaliap piginnaatitaani taasisinnaavutit
• Naalagaaffiup ilaani inissisimaguit (Danmarkimi Savalimmiuniluunniit) inuit allattorsimaffianni imaluunniit inummi Qinersinermut ataatsimiititaliap piginnaatitaani taasisinnaavutit
• Naalagaaffiup avataani inissisimaguit, (Kalaallit Nunaat, Danmark aamma Savalimmiut) danskit aallartitaqarfianni imaluunniit sinniisoqarfianni taasisinnaavutit
• Umiarsuarmi Kalaallit Nunaanni angerlarsimaffeqartumi issimaguit, angallatip naalagaani imaluunniit inummi angallatip naalagaata toqqagaani taasisinnaavutit
Taasineq
Siuliini taaneqartut ilaanni taasiviusumi taaguinermut siulersuisumut saaffiginnikkuit, ilinnut tunniunneqassapput
• taasivissaq ataaseq
• allakkat puuat ataaseq
• malitsitut allagaq ataaseq
• aamma puussaq ataaseq
Taasivissami qinigassanngortittoq partiiluunniit, Inatsisartunut imaluunniit kommunalbestyrelsimut qinerneqartussatut kissaatigisat allassavat.
Taasereeruit malitsitut allagaq immersussavat. Taanna imaqassaaq:
• Taanna uppernarsaataavoq illit nammineerlutit allaniillu isigineqarnak taasivissaq immersorsimagit, allakkat puuannut ikisimallugu taannalu matullugu. Aammattaaq ullormi taasiviusumi taasivissamut aggersinnaanngitsutit imaluunniit taamaallaat ajornartorsiorujussuarlutit aggersinnaasutit, inatsisit malillugit uppernarsassavat. Taasissummik tigusisussap isigisaanik malitsitut allagaq atsiussavat. Malitsitut allakkami aamma atsiornivit ullua allassavat kiisalu atitit tamaasa, ulloq inuuiit, atorfiit aamma najukkat
• Taasinermik tigusisumiit uppernarsaat atsiorneqarsimasoq
Allakkat puuat taasissummik imaqartoq aamma malitsitut allagaq puussamut ikineqassapput, taanna matuneqassaaq kommunimullu taasisut allattorsimaffigisannut nassiunneqassalluni. Puussap tunuanut illit atit najukkallu allanneqassapput. Illit kommunerisannut ullormi taasiviusumi taasinerup naannginnerani allakkanik tigusisussamut, taakku tamarmik taasinermik tigusisumit nassiunneqassapput.