Inatsisartunut qinersinermi taasisinnaaniaruit, qinersisinnaatitaassaatit aamma qinersisinnaasut allattorsimaffiannut allanneqarsimassaatit.
Qinersisinnaatitaaneq
Qinersisinnaatitaaneq ima paasineqassaaq, illit taasinissamut pisinnaatitaasutit. Inatsisartunut qinersinermut qinersisinnaatitaavutit, illit
• 18-inik ukioqalersimaguit
• dansk-isut innuttaassuseqaruit
• aamma qinersinissap ingerlanneqarnissaa sioqqullugu sivikinnerpaamik qaammatini arfinilinni (6) Kalaallit Nunaanni aalajangersimasumik najugaqarsimaguit
Kalaallit Nunaanni aalajangersimasumik najugaqanngikkuit, inatsisartunut qinersinermi qinersisinnaatitaassaatit, nuunnissat sioqqullugu sivikinnerpaamik ukiuni marlunni (2) Kalaallit Nunaanni inuit allattorsimaffiannut nalunaaqqasimaguit aamma
• ilinniarnermut atatilllugu Kalaallit Nunaata avataaniikkuit
• peqqissutsikkut patsiseqartumik Kalaallit Nunaata avataaniikkuit
• Kalaallit Nunaanni folketing-imut qinerneqarsimasutut atuuffimmik isumaginninnermut atatillugu Danmark-imiikkuit
• imaluunniit Kalaallit Nunaanni Namminersorlutik Oqartussat sinniisuattut nunami allamiikkuit
Inuit Kalaallit Nunaanni inatsisit malillugit oqartussaaffiiarneqarsimasut, qinersisinnaatitaanngillat.
Qinersisinnaasut allattorsimaffiat
Qinersisoqarnissaa nalunaarutigineqarpat, qinersinermut siulersuisut qinersisinnaasut allattorsimaffiannik sanassapput. Qinersisinnaasut allattorsimaffiat tassaavoq kommunimi pineqartumi qinersisinnaatitaasut inuit allattorsimaffiat. Kalaallit Nunaanni taamaallaat qinersisinnaavutit, qinersisinnaasut allattorsimaffiannut ilanngunneqarsimaguit.
Qinersinissaq sioqqullugu sapaatit akunneri arfinillit (6) sioqqullugit kommunip inuit allattorsimaffiutaa malillugu najugaqarfigisimasanni kommunimi, qinersisinnaasut allattorsimaffianni allanneqarsimassaatit:
• Qinersinissaq kingusinnerpaamik sapaatit akunnerinik arfinilinnik (6) sioqqullugu kommunip inuit allattorsimaffiutaanut nuunnerit nalunaarutigisimagukku, najugaqarfittaanni qinersisinnaasut allattorsimaffiannut allanneqarsimassaatit
• Qinersinissaq sapaatit akunnerinik arfinilinnik (6) sioqqunnagu kommunip inuit allattorsimaffiutaanut nuunnerit nalunaarutigisimagukku, manna tikillugu najugaqarfigisanni qinersisinnaasut allattorsimaffianni allanneqarsimassaatit
• Kalaallit Nunaata avataani najugaqarallarsimaguit qinersisinnaatitaallutilli, manna tikillugu najugaqarfigisanni qinersisinnaasut allattorsimaffianni allanneqarsimassaatit. Ulloq qinersivissaq sioqqullugu kingusinnerpaamik sapaatit akunnerinik pingasunik (3) sioqqutsisumik, qinersisinnaasut allattorsimaffiannut ilanngunneqarnissat qinersinermut siulersuisunut qinnuteqaatigissavat
• Kommunit aggornerisa avataanni ikkuit, Kommuneqarfik Sermersuumi qinersisinnaasut allattorsimaffiannut allanneqarsimassaatit
Ulloq qinersivissaq kingusinnerpaamik sapaatit akunnerinik pingasunik (3) sioqqulllugu, sumiiffimmi tamanit tikinneqarsinnaasumi qinersisinnaasut allattorsimaffiat, qinersinermut siulersuisunit ulluni marlunni (2) saqqummiunneqassaaq. Allattorsimaffimmi ilaanngikkuit imaluunniit peqquteqanngitsumik allattorsimaffimmut allanneqarsimanngikkuit, qinersinermut siulersuisunut naammagittaalliorsinnaavutit:
• Qinersisinnaasut allattorsimaffiata saqqummiunneqarnerata kingorna, ullut suliffiusut marluk (2) qaangiutsinnagit naammagittaalliuteqartoqassaaq
• Naammagittaalliut allaganngorlugu allagaassaaq
• Naammagittaalliummi tunngavilersussavat, sooq qinersisinnaasut allattorsimaffiannut allanneqartariaqarnersutit