Inatsisitigut ataataqanngitsunut neqeroorut

Kikkut tamarmik ataatartik kinaanersoq ilisimassallugu pisinnaatitaaffigaat. 1. juni 2014-imi Kalaallit Nunaanni meeqqat inatsisitigut inissisimanerat aamma kingornussisarnermi inatsisip, Kalaallit Nunaanni inatsisip allanngortinneqarneri pillugit atuutilerneqarnerata kingorna inatsisitigut ataataqanngitsut arlalinnik pisinnaatitaaffeqalerput.

Inatsisitigut ataataqanngitsutut inatsiseq una malillugu pisinnaatitaaffigivatit:

• Ataatat kinaanersoq aalajangerniarlugu ataatassarsiuinermik aallartitsisinnaavutit
• Kina ataataginerit aalajangerneqareerpat, ataatannit ilaqutaaniillu kingornussisinnaatitaalissaatit
• Aamma ataatavit kinguliaqutaa tigusinnaalissavat

Inatsisitigut ataataqannginnerup kingunerisinnaasai 2017-imi qulaajarneqarput. Qulaajaaneq uani atuarsinnaavat.

Inatsisitigut ataataqanngitsut maanna inuusut qanoq amerlatigisut aamma paasiniarlugit qulaajaasoqarsimavoq, paasissutissat uani atuarsinnaavatit.

2019-imi septembarimit inatsisitigut ataataqanngitsutut tarnip pissusaanik ilisimasalimmit akeqanngitsumik katsorsarneqarsinnaalerputit. Inatsisitigut ataataqanngitsutut peroriartorsimaninnit unammilligassat qaangerniarnissaannut tarnip pissusaanik ilisimasallip ikiorsinnaavaatit.

Inatsisitigut ataataqanngitsut ilaqutariinnut inatsiseqartitsineq malillugu suliarineqartarput, suliassaqarfillu Kalaallit Nunaannit tigummineqanngilaq. Taamaattumik Naalakkersuisut Danmarkimilu Social- og Indenrigsministeeriaqarfiup suleqatigiinnerisigut neqeroorut pilersinneqarpoq.

Tarnikkut katsorsartinniaruit inatsisitigut ataataqanngitsuussaatit.

Inatsisitigut ataataqanngitsuuvutit:

• Kalaallit Nunaata Kitaani Kujataaniluunniit 1. juuni 1963 sioqqullugu
  imaluunniit Kalaallit Nunaata Avannaani Tunumiluunniit 1. juuli 1974 sioqqullugu inunngorsimaguit, angajoqqaatillu inunngornivit nalaani katissimanngippata.

• Kalaallit Nunaata Kitaani Kujataaniluunniit 1. juuni 1963-imi kingornaluunniit
  imaluunniit Kalaallit Nunaata Avannaani Tunumiluunniit 1. juuli 1974-imi kingornaluunniit inunngorsimaguit, angajoqqaatilllu inunngornivit nalaani katissimanngippata aamma ataatassarsiuinermi angut angutilluunniit arlallit akilersuisussaatitaasutut isigineqarsimappat(a).

Eqqortumik katsorsarneqarnissat qulakkeerniarlugu, sianeruit oqarasuaatikkut siunnersuisartup apeqqutinik apeqquteqarfigissavaatit.

Akeqanngitsumik tarnikkut katsorsartinniaruit pingasunngornikkut piffissami 16.00-20.00-imi 34 50 50 attavigissavat. Tassanngaanniit tarnip pissusaanik ilisimasalimmut ingerlateqqinneqarlutit innersuunneqassaatit.

345050-imut sianerneq akeqarpoq. Oqarasuaatip normuanik akeqanngitsumik sianerfigineqarsinnaasumik pilersitsinissaq periarfissaanngilaq. Taamaattumik oqarasuaammut akisussaasumut illit oqarasuaatippit normua tunniukkukku, oqarasuaammi akisussaasup sianerfigisinnaavaatit, taamaalilluni aningaasartuutitit annikillisissavatit.

Illit inatsisitigut ataataqanngitsutut imaluunniit inatsisitigut ataataqanngitsumut anaanaaguit, ataatassarsiuisitsinissamut aallartitsisinnaavutit, kina ataataginerlugu imaluunniit kina meeqqavit ataatagineraa paasiniarlugu. Taamaliorniaruit eqqartuussivik naleqquttoq allaffigissavat.
Ataatassarsiuinissamut suliassanngortitsinermi kina ataataginerlugu ilisimasariaqanngilat.

Kalaallit Nunaanni najugaqaruit ataatassarsiuinissamik suliassaq najukkanni eqqartuussiviup suliarissavaa.

Kalaallit Nunaanni najugaqanngikkuit, ataatassarsiuinissamik suliaq eqqartuussivimmi suliarineqassaaq, illit isummat tunngavigalugu ataatagigunakkavit illoqarfiani. Angut taanna toqusimappat, toqusup pigisai pillugit eqqartuussivimmi suliarineqarfiani suliarineqarfigisimasaaniluunniit suliaq suliarineqassaaq.

Pissutsini allani suliaq Sermersuup Eqqartuussisoqarfianit suliarineqassaaq. Soorlu assersuutigalugu kina ataatagisinnaanerlugu, sumiluunniit najugaqarnera nalugukku, Sermersuup Eqqartuussisoqarfiata suliaq suliarissavaa.

Siusinnerusukkut ataatarsiuineq eqqartuussivikkut aalajangiivigineqareersimappat, angut(inik) akilersuisussaasutut eqqartuussisoqarsimappat, kisianni kinaluunniit ilinnut ataataasutut eqqartuunneqarsimanngippat, taava ataatassarsiuineq eqqartuussivimmi suliap aalajangerneqarfiani suliarineqassaaq.

Najugarisanni eqqartuussivimmut allagaqarlutit ataatassarsiuisoqarnissaa aallartissinnaavat.
Inatsisitigut ataataqanngitsumut anaanaaguit, eqqartuussivik allaffigissavat panivit ernivilluunniit najugarisaaniittoq.

Illit inatsisitigut ataataqanngitsutut, ataatassarsiusitsinissamik aallartitsiniaruit eqqartuussivik paasissutissanik makkunannga tunissavat:

• Atitit tamaasa
• maanna najukkat
• inuttut normut imaluunniit ulloq inunngorfiit 

Eqqartuussiviup aamma iluaqutigissavaa makku paasissutissat tunniukkukkit:

• sumi inunngorsimanerit
• anaanavit aqqi tamaasa
• anaanavit maanna najugaa
• inuttut normua imaluunniit ulloq inunngorfia
• anaanavit inunngorfia 

Isumaqaruit nalunagu kina ataatagalugu eqqartuussivimmut nalunaarutigigukku, ataatassarsiuinerup suliarineqarneranut oqilisaaqataassaaq - ajornanngippat paasissutissat ataataassutsimut uppernarsaataasinnaasut, soorlu allagaatit uppernarsaatit nutaanngitsut, allakkat il.il. ilanngullugit.

Ataatagisimasinnaasannut paasissutissat tamarmik suulluunniit pingaaruteqarsinnaapput.

Suliamut atatillugu eqqartuussivik illuatungeriinnik aamma ilisimannittunik killisiuisinnaavoq, eqqartuussiviullu peqataasut timip kingornussaanut misissuinerni peqataaqqullugit noqqaavigisinnaavai (DNA-mik misiligutit). Pineqartut uku suliamut attuumassutillit illit, anaanat, angullu ataatagisinnaasat. Eqqartuussivik oqartussaasoqarfinnit paasissutissanik pissarsiniarsinnaavoq, soorlu illit inunngorninnut atatillugu uppernarsaatinik.

Ataataassuseq marlunnik assigiinngitsunik periaaseqarluni aalajangerneqarsinnaavoq:

• Angut ilinnut ataataasorisoq ataataassutsi pappiaqqakkut atsiukkamigut akuerisinnaavaa, taannalu nammineerluni politiinut tunniutissavaa imaluunniit nammineerluni eqqartuussisumik oqaloqateqarnermigut.

• Ataataassuseq akuerineqassanngippat tamanna ajornanngippat eqqartuussinikkut aalajangerneqassaaq. Ataataassutsip eqqartuussivikkut aalajangerneqarnissaanut, ataataassutsip uppernarsereerneqarnissaa pisariaqarpoq.

Illit, anaanat aamma angut ataatagisinnaasat sinnerlusi eqqartuussivik inummik inatsisitigut ilinniarsimasumik suliamik ingerlatsisussamik piginnaaniliisinnaavoq.

Angummi ataatagisinnaasimasat toqusimappat?
Meeraq, anaanaq, ataataasinnaasimasoq toqukkut qimagussimagaluartoq ataatassarsiuineq aallartinneqarsinnaavoq. Taamaaliortoqassappat inuup sananeqaataanut tunngasut toqusimasumit tigusat tunngavigalugit DNA-mik misissuisoqarsinnaavoq. Kiisalu meeqqap inunngorneraniit uppernarsaatit, ataataassuseq pillugu paasissutissaqaratarsinnaasut tunngaviginiarneqarsinnaapput.

Eqqartuussivimmi suliap ingerlanneqartarnera pillugu innuttaasunut paasissutissiiffiatigut paasisaqarfigisinnaavat: http://www.gl.dk.domstol.dk/saadan/Pages/default.aspx
Eqqartuussivinnut adressit saaffiginninnissamullu paasissutissat www.domstol.gl -ikkut takusinnaavatit. Immikkoortoq toqqassavat: Attaveqarfissat.

Inatsisitigut ataataqanngitsut pillugit inatsit (Kalaallit Nunaanni meeqqat inatsisitigut inissisimanerat pillugu Kalaallit Nunaannilu kingornussisarneq pillugu inatsisip allannguutaa 21. maj 2014-imeersoq nr. 483) (Danskisut allassimavoq)

Meeqqat pisinnaatitaaffii pillugit Kalaallit Nunaannut inatsit (Meeqqat inatsisitigut inissisimanerat pillugu Kalaallit Nunaanni 16. juuni 1962-imeersumi inatsit nr. 197)

Eqqartuussiveqarneq pillugu Kalaallit Nunaannut inatsit (Ataatassarsiuinermut tunngasut kapitali 26-mi takuneqarsinnaapput) (Eqqartuussiveqarneq pillugu Kalaallit Nunaanni inatsit 30. apriili 2008-meersoq nr. 305) (Danskisut allassimavoq)

Kingornussisarneq pillugu Kalaallit Nunaannut inatsit (Kalaallit Nunaanni kingornussinissamut inatsit 27. maj 1964-imeersoq nr. 164)

Inuit aqqi pillugit Kalaallit Nunaannut inatsit (Inuit aqqi pillugit inatsit 29. april 1981-imeersoq nr. 193)