airplanebooksbriefcase business cogs cross election entertainment fish house law lockmedicalpeopleselfservices socialtax

COVID-19-imut akiuussutissinneqareernermi kingunerluutit nalunaarutigikkit

Maana nalunaaruteqarit

Paasissutissat nalinginnaasut 

Nunatsinni Nakorsaaneqarfik nunatsinni kingunerluutaasorisanik nakkutilliinermi peqataavoq.

COVID-19-imut akiuussutissinneqareerninniit kingunerluuteqaruit, kingunerluutit pillugit paasissutissanik Nunatsinni Nakorsaaneqarfimmut nammineq nalunaarutigisinnaavatit.

Akiuussutissat nakkutigeqqissaarneqarput 

COVID-19-imut akiuussutissaq pisarnermiit pilertornerusumik inerisarneqaraluaq uppernarsaatissartai pisarnertut sukumiisumik misissorneqarput. COVID-19-imut akiuussutissanik misileraanerit oqaluttuarisaanermi annertunerpaapput.

Inerisaanermi alloriarnerit ataatsikkut ingerlanneqarmata akiuussutissat pillugit misilittakkat tamakkiisut piffissaq nalinginnaasumit sivikinnerusoq atorlugu katersorneqarput. Naatsorsuutiginngisanik kingunerluuteqartoqarsinnaanngivisoq oqartoqarsinnaanngilaq, akiuussutissinneqareernerulli kingorna kingunerluutit tamangajammik sap. ak. arfinillit siulliit ingerlaneranni takkuttarnerat, kingusinnerusukkullu takkuttarnerisa qaqutigoorluinnartuunera akiuussutissanit allanit ilisimavarput.

Akiuussutissaq kingunerluutitaqarnerusinnaasoq paasinarsissappat qisuariartoqarsinnaaqqullugu, akiuussutissat akuerineqareerneranniit nakorsaatit pillugit oqartussaasut nakkutilleeqqissaarputtaaq. Kingunerluutit taakku tassaasinnaapput misileraanerni takuneqanngitsut imal. kingunerluutaasartutut ilisimaneqartut misileraanerniit akulikinnerusumik atugaasut.

Ilaatigut innuttaasunit peqqinnissakkullu sullissisuniit kingunerluutinik nalunaarutiginninnerit iluaqutsiullugit nakkutilliisoqarpoq.

COVID-19-imut akiuussutissinneqareernermi kingunerluutit 

Nappaammut akiuussutissinneqarnermi kingunerluuteqarsinnaaneq, soorlu kapitiffiup aappillernera, kissarneqarneq nukiillu ippinnarnerat nalinginnaavoq. Qaqutigut navianaatilinnik kingunerluuteqartoqarsinnaavortaaq.

Akiuussutissat akuerineqarnissaat sioqqullugu, akuerineqarneranni tamatumalu kingorna isumannaatsuunissaat pisortat nakkutigeqqissaarpaat.

COVID-19-imut akiuussutissinneqaruit tunillatsissinnaanerit napparsimalersinnaanerillu annikillissavat. Nakorsaatitut allatulli COVID-19-imut akiuussutissat kingunerluutitaqarsinnaapput. Taakku tassaagajupput kapitiffiup nalaata aappillernera ippinnarneralu, kiaqatsiarnerlu.

Akiuussutissaq akuerineqartinnagu inunnit tuusintilikkaanit peqataaffigineqartumik misilerarneqaqqaartarpoq. Nappaammut illersuutaanissaa kingunerluutaasinnaasullu ersiutinit imal. nappaammit akiuussutissiiffigisamit ajornerunnginnissaat, COVID-19-imut akiuussutissap akuerineqarsinnaanissaanut aalajangiisuussapput.

Akiuussutissinneqareeruit imaaliortariaqarputit 

Akiuussutissinneqareernermi kingunerluutit annikitsut erniinnarlu qaangiuttartut nalinginnaasuupput amerlanertigullu navianaateqanngivillutik. Taakku tassaasinnaapput kapitiffiup nalaata aappillernera ippinnarneralu, kissarneqalaarneq nukiillu ippinnarnerat.

Taamaattunik nalaataqaruit peqqissaavimmut saaffiginnittariaqanngilatit. Kissarneqalaalissaguit tamanna timitta nappaatinut akiuussinnaassusaata qisuariarneranut ersiutaavoq.

Navianaatilinnik kingunerluuteqaruit najukkanni peqqissaavik attavigiuk 

Akerlianilli akiuussutissinneqareernerpit kingorna perulunnartunik ersiuteqaruit, najukkanni peqqissaavimmut attaveqartariaqarputit. Taakku tassaasinnaapput sapigaqarnikkut anernikilliorneq ammikkulluunniit aniornininneq.

Ersiutaasut akiuussutissameersuunersut allamilluunniit patsiseqarsinnaanersut nakorsap naliliivigisinnaavaa.

Kingunerluutinik nalunaaruteqarnissaq najukkanni napparsimmaviup /peqqissaaviup pisussaaffigaa.

Akiuussutissinneqarnerup kingunerluutitaanik ersiuteqarnerit nalornigukku napparsimmavik/peqqissaavik attavigisinnaavat.

COVID-19-imut akiuussutisinneqareerninni kingunerluutit nammineq nalunaarutigikkit 

COVID-19-imut akiuussutissinneqarnermut atatillugu kingunerluutit illit nammineq nalunaarutigisinnaavat tuugassaq sungaartoq ”Maana nalunaaruteqarit” toorlugu.

Suliamut ingerlatseriaaseq 

Nunatsinni COVID-19-imut akiuussuutissanik atuinermi kingunerluutaasorisatut nalunaarutinik nalunaarsuinermi, nakkutilliinermi naliliinermilu Nunatsinni Nakorsaaneqarfik Peqqinnissaqarfik peqatigalugu peqataassaaq.

Nalunaarutit nassiukkukku, Nunatsinni Nakorsaaneqarfimmut nassiussimaneranut uppernarsaammik mailikkut pissarsissaatit.

Nunatsinni Nakorsaaneqarfimmut nalunaarutigisat, COVID-19-imut akiuussutissinneqarnerup kingorna kingunerluutaasutut nalunaarutigisanut paasissutisiivitsinni nalunnarneqassapput, akiuussutissamillu atuinermi isumannaassutsimik nakkutilliinitsinni taamaallaat atorneqassallutik.

Allannguutit 

Nalunaaruteqareernivit kingorna nalunaarutinnut attuumassutilimmik allannguuteqartoqassappat, Nunatsinni Nakorsaaneqarfik nalunaarfigissavat.

Akuersissuteqarneq, pisinnaatitaaffiit maalaaruteqarsinnaanerlu 

COVID-19-imut akiuussutissap kingunerluutaanik nalunaaruteqaruit paasissutissat ilinnut tunngasut siunertanut matumani nassuiarneqartunut atorneqarnissaannut akuersissaatit. Illit pillutit paasissutissaatitta paasisimasaqarfiginissaat paasissutissallu eqqunngitsut aaqqinneqarnissaat piiarneqarnissaalluunniit pisinnaatitaaffigaatit. Paasissutissat ilinnut tunngasut uatsinnit atorneqarsinnaanerannut akuersissutivit utertinnissaa pisinnaatitaffigaattaaq. Taamaaliussaguit paasissutissat ilinnut tunngasut piiarneqassapput.

Paasissutissat ilinnut tunngasut atorneqarnerat imal. pisortat aalajangigaat, paasissutissanik inunnut tunngasunik suliarinnittarneq pillugu inatsit naapertorlugu paasissutissanik nakkutilliisoqarfimmut/Datatilsynet maalaarutigisinnaavatit. Tamanna pillugu www.datatilsynet.dk annertunerusunik paasisassarsiorfigisinnaavat.

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl