airplanebooksbriefcase business cogs cross election entertainment fish house law lockmedicalpeopleselfservices socialtax

Terapeuterne

Pillorissaasut  

Pillorissaasut isumaginnittoqarfimmut atavoq Kommune Kujallerlu tamakkerlugu sullillugu.

Pillorissaasuni timikkut sungiusaasoqarpoq, pillorissaasut marluk piffissap ilaannaani sulisartut, katsorsaasup ikiortaa, aammalu timikkut sungiusaasut aqutsisoqarluni. Sulisuni tallimani taakkunani pillorissaasoq ataaseq Nanortalimmi atorfeqarpoq sinnerilu Qaqortumiillutik.

Suliassat innuttaasup nammineq angerlarsimaffiani ingerlanneqartarput, sungiusaavimmi, utoqqaat illuini, atuarfinni, meeqqerivinni/meeraaqqerivinni, sannavinni nakkutigisani, kommunillu iluani attuumassuteqartuni suliat ingerlanneqartarlutik. Qaqortumi pillorisaasut allaffiat sungiusaaviallu Utoqqaat Illuanni Ajarsivasimmi inini quleriinni aappaanni, immikkoortoqarfiup Qulliup isaariaata eqqaani inissisimavoq.

Pillorissaasut kommunip nunaqarfiini tamani pillorissaanikkut pisariaqartitsisoqartillugu ukiut tamaasa tikeraarniarsarisarpaat. Pillorissaasut timimillu sungiusaasut suliassaraat: Innuttaasut nunaqarfinniittut sapinngisamik naapinninniartarpugut, taamaammat allakkatigut nassiussimasatta akinissaat tunuarsimaarfigissanngilat imaluunniit nalorniguit nunaqarfiup allaffia attavigisinnaavat ikioqqullutit.

Suleqatigiit timimik sungiusaasut pillorissaasullu innuttaasut timikkut, eqqarsartaatsikkut, malugissutsikkut aamma/imaluunniit tarnikkut ulluinnarni erloqissuteqartut namminersorsinnaanerulernissaat anguaniagaraat.  

Tamanna innuttaasunik piginnaaninngorsaanikkut, ataavartumik sungiusaanikkut, pisinnaasat nalilerneratigut, siunnersuinikkut aqqutissiuinikkullu, innuttaasunik nuussinikkut suleqatinullu sanilliussinikkut naleqqiussinikkullu, ikiorsiinermi atortorissaarutit nalilernerisigut, kiisalu najukkanik allannguinikkut suliarisarpagut.

Meeqqat 0-miit 17-it tikillugit ukiullit timimikkut aalaasii, malugisaataat taakkunanngalu tamakkiisumik atuisinnaannginnerat pitsanngorsarniarlugit aammalu atortorissaarutinik imaluunniit najukkami allannguisoqarneranik pisariaqartitsisoqartillugu pillorissaasut suleqataaffigisinnaasarpaat. Kommunip suliffeqarfiutaanni sulisunut aamma siunnersuisinnaasarpugut/ilinniartitsisinnaasarpugut.

Saaffiginninneq 

Kommune Kujallermi innuttaasut tamarmik pillorissaasunut saaffiginnissinnaapput tassanilu naliliiffigineqarsinnaapput ataavartumik sungiusarnissaat, piginnaanngorsaqqinnissaat aammalu namminersornerulersinnaaniarluni angerlarsimaffimmi allanngortiterinissaq pisariaqartitsisoqartillugu. Tamatuma saniatigut nuutsitsinermi, inissiinermi aammalu innartitsinermi siunnersorneqarnissaq naliliivigineqarnissaq piumaneqarpat saaffigineqarsinnaalluta. 

Pillorissaasut attavigineqarsinnaapput uunga: terapeuthuset@kujalleq.gl imalt. oqarasuaammut.: 64 13 50 ulluinnarni nal. 9.00-miit 15.00-ip tungaannut ammasarpoq.

Mailikkut attaviginninnermi cpr.nr., ateq, najugarisaq, tlf., aammalu sooq saaffiginninnerlutit allanneqassapput. Innuttaasoq/meeraq sinnerlugu attaviginnikkuit innuttaasumit imaluunniit angajoqqaanit/paarsisunit akuersissummik peqqaassaatit.

Maannakkut pisut 

Pillorissaasut sungiusaaviit, meeqqanut susassaqarfiit, atortorissaarutit aammalu angerlarsimaffinni allannguilluni suliat pitsanngorsaaviginiarlugit suliniuteqarput. Pitsanngorsaavigisat naammasseriarpata kommunalbestyrelsimiillu akuerineqariarpata nittartakkamut ikkunneqarumaarput.  

 

Ulluinnarni nal. 9.00 – 15.00

Oqar.: 64 13 50

Mail: terapeuthuset@kujalleq.gl