Paaviaaneq

Pujoorfeqarpit? – Pujoorfeqaruit taava arlalialunnguanik pitsaasunik ilisimasassaateqarpugut.

Assersuutigalugu pujoorfeqarsimaguit, kiassaammut uuliatortumut, qisuttortakkanik assigiinngitsunik  kissarsuutit. Pujoorfiit angisuut ikinnerpaamik ukiumut marloriartumik paaviarneqartussaapput. Pujoorfippit paaviartinneratigut, paamit aserueratarsinnaaneq pujoorfimmillu ikuallattooratarsinnaaneq annikillisinneqartarput.

Paaviaasoq sulerisarpa?

Paaviaasoq makkuninnga suliaqarajuttarpoq:

• Ilaatigut pujoorfiup, putsup aqqutaasa kiassaatillu qisuttortakka paaviarnissaat.
• Illup ikuallannginnissaa qulakkeerniarlugu ikuallattoornissamik nakkutilliineq.
• Illup kiassaataanik misileraaneq uuttortaanerlu.
• Allamik kiassaatitaarnissaq akilersinnaanersoq paasiniarlugu illuutililip naatsorsuinerani ikiussallugu.
• Pujoorfinnik allanngortitanik kiassaatinillu qisuttortakkanik nutaanik akuersisarnissaq.

Pujoorfiup paaqqannginnissaa sooq pingaaruteqarpa?

Pujoorfinnik paavianngitsoorneq pujoorfinnilluunniit aserfallatsaaliinngitsoorneq ikuallattoornermut peqqutaasinnaapput. Pujoorfiilli ikuallattarnerat qujanartumik akuttusoorujussuupput, inatsisit tunngavigalugit paaviaasoqartarnera peqqutigalugu.

Illit nammineq qanoq iliorsinnaavit?

Aamma illit nammineq pujoorfiit nakkutigisussaavat, inissisimanermigut anorrimit silamillu pujoorfik sunnertiaqimmat. Pingaartumik usserut misissortaruk:

• Qarmakkat, ussissaatit assigisaallu pujoorfimmiittut quppassersimassanngillat, saattukujuunngorlutilluunniit katagassanngillat.
• Pujoorfiup qaarpiaa betoniugajuttarpoq, aserorsimassanngilaq quppaqassananilu.
• Ussissarnera, tassalu pujoorfiup qaliallu qaavani ataneri ussissuusariaqarput.
• Putoq paaviaavik ilaannakuusanngilaq ussissuussallunilu.

Pujoorfimmik kiassaammillu qisuttortakkamik passusisinnaaneq.

Pisussaaffigivat isumagissallugu paaviaasup ajornanngitsumik pujoorfimmut, kiassaammut qisuttortakkamut, taamaattumik peqaruit, assigisaanullu suliarinnissinnaanissaa. Paaviaasoq paaviaasariaqartarsinnaassaaq inatsisit malillugit.

Qanoq ilisimassaviuk paaviaasup takkunnissaa?

Paaviaasup nalunaarfigissavaatit ikinnerpaamik takkunnissaa ullormik ataatsimik sioqqullugu. Allagartannguami tunissavaatit postkarsinnullu ikillugu, nalunaarut imaqassaaq ulloq suna nalunaaqquttallu qanoq ilinerani takkutissanersoq.

Pisussaaffigivat isumagissallugu paaviaasup ajornanngitsumik pujoorfimmut, kiassaammut qisuttortakkamut, taamaattumik peqaruit, assigisaanullu suliarinnissinnaanissaa.

Angerlarsimassanngikkuit, eqqaamiorisavit ilaqutarisavilluunniit paaviaasoq isertissinnaavaat.

Paaviaasoq isersinnaanngikkuni suliaqarlunilu, postkarsinnut nalunaarummik ilisissaaq, isersimaffigisimagaatit. Taamaattumik nalunaarutisisimaguit, taava pingaaruteqarpoq paaviaasup attaveqarfiginissaa nutaamillu qaqugu aggernissaanik isumaqatigiissuteqarfigalugulu.

Kommunikkoortumik akiliisarneq

Inatsisit malillugit paaviartinneq illit nammineq akilissavat. Kommuni akileequsisartuuvoq. Paaviartinnerup qanoq akeqarnera takusinnaavat kommunip akigititaminik allattuiffiani.

Malugiuk

• Pujoorfiit paaviartinngitsoorsinnaanngilat, aamma naak illunni najugaqartoqanngikkaluartoq.
• Illut akigigukku, eqqamassavat tamatuma Teknikkimut Avatangiisinullu ingerlatsivimmut nalunaarutigineqarnissaa. Teknikkimut Avatangiisinullu Ingerlatsiviup isumaminik paasinavianngilaa, illuutillit illumminnik akiginnissimagaangata. Illu akigisimallugu nalunaarutiginissaa puigorukku, suli illumik piginnittutut inissisimassaatit. Tassa imaappoq Teknikkimut Avatangiisinullu ingerlatsiviup paaviaanermut akiligassaq ilinnut nassiuttuassavaa.
• Imermut kissaassuarnik saliineq kiassaammillu misissuineq paaviaanermut ilaanngillat. Imermik kissaatit kiassaatillu misissortissinnaavatit suliffeqarfimmit taamatut nakkutilliinissamik akuerisaasumit.

Isorinninnerit nersualaarinninnerillu

Pujoorfiit paaviarneqarsimanngippat iluamilluunniit paaviarneqarsimanngippat, assersuutigalugu illu paaqalersimappat, maalaarsinnaatitaavutit. Allakkatigut oqaasiinnakulluunniit Teknikkimut Avatangiisinullu ingerlatsivimmut maalaaruteqarsinnaavutit najukkanni nunaqarfiulluunniit allaffiinut.

Aamma Teknikkimut Avatangiisinullu ingerlatsivik nunaqarfimmiluunniit allaffik attaveqarfigisinnaavat, paaviaasut paaviaalluarsimappat. Tusarusoqaarput!

Allanik paasisaqarusuppit?

Paaviaasarneq pillugu apeqqutissarauit, Teknikkimut Avatangiisinullu ingterlatsivik attaveqarfigisinnaavat, imaluunniit Kommune Kujalleq attaveqarfigisinnaavat oq. 70 41 00.

Qaqortumi Paaviaasoq

Tlf. 497677

Email: 3920Paaviaasoq@gmail.com

Narsaq, Igaliku, Qassiarsuk aamma Narsarsuaq

Kommune Kujalleq

Oqarasuaatip normua: 49 61 54

E-mail: teknik@kujalleq.gl

Nanortalik, Aappilatoq, Alluitsup Paa, Ammassivik, Narsarmijit aamma Tasiusaq

Kommune Kujalleq

Oqarasuaatip normua: 53 75 40

E-mail: teknik@kujalleq.gl

Paaviaasoq pillugu naammagittaalliorneq

Paaviaaneq peqqutigalugu ajutoortoqartillugu saqqummiussinerit ass. inummik illumilluunniit ajoqusiinerit, taava paaviaasumut saaffiginninnissaq innersuussutigineqassaaq.

Ajornartorsiut paaviaasoq peqatigalugu aaqqinneqarsinnaanngippat Teknikkimut Avatangiisinullu Ingerlatsivik saaffigissavat.

Paasissutissat sukumiinerusut

Kalaallit Nunaanni pujoorfinnik paaviaasarneq il.il. pillugit Kalaallit Nunaannut ministeeriaqarfiup nalunaarutaa nummer 508, 28. novembari 1980-imeersoq kiisalu Kalaallit Nunaanni annaassiniarnissamut upalungaarsimaneq aamma ikuallattoornissamik qaartoornissamillu pitsaaliuinermi iliuusissat pillugit Inatsisartut inatsisaat nr. 14, 26. maj 2010-meersoq najoqqutarlugit paaviaasarnermik aaqqissuussineq naleqqussarneqarsimavoq.

Paaviaasarnermik aaqqissuussineq pillugu apeqqutissaqaruit Teknikkimut Avatangiisinullu Ingerlatsivimmut saaffiginninnissamut tikilluaqqusaavutit, imaluunniit Kommune Kujalleq oqarasuaat una atorlugu attavigiuk: 70 41 00, soorluttaaq uunga allassinnaasutit:  teknik@kujalleq.gl