Kommune Kujallermi illuutilerinermut oqartussat Qatserisartut Annaassiniartartunik peqateqarlutik kaammattuutigaat immikkoortut tulliuttut inuussutissarsiorfinni sanaartukkanilu annerusuni ikuallattoornissamut paasissutissanut / ikuallatsaaliorniarluini periusissianut ilanngunneqartassasut (BR06 kap. 6).

Sanaartukkat upalungaarsimanermut inatsisip ataaniissimatillugit matumani pineqartut naammanngillat

(soorlu teknikkikkut piumasaqaatit).

 

Immikkoortut aammalu ikuallatsaaliuinermi periusissiaq sanaartukkanut pineqartorpianut naleqqussarneqartassapput. Pingaarnerpaaq tassaavoq pissusiviusut nalunaarsorneqassasut, aammalu imarisai erseqqissuussasut naammallutillu. Nassuiaatit takisoorsuit pisariaqarnerpaajuaannanngillat. Taarsiullugu taaguutit qatserinermut tunngasut atorneqassapput.

 

Titartakkat aammalu periusissiami oqaatigineqartut ataqatigiittassapput.

 

Ikuallatsaaliuiniarluni periusissiaq pillugu nalunaarusiap suliarineqarnissaanut sanaartortitsisoq / sanaartortitsisup siunnersortaa akisussaasassaaq. Nalunaarusiaq suliarineqassaaq

sanaartornermi maleruaqqusat, aammalu innaallagisserinermut oqartussat assersuusiai ilitsersuutai naapertorlugit.

 

Ikuallatsaaliuiniarluni periusissiaq pillugu nalunaarusiamut missingiut sanaartornermi suliassalerisumik

aammalu upalungaarsimanermut pisortamik imaluunniit upalungaarsimanermi nakkutilliisumik oqaloqateqarnissamut nassiunneqassaaq.

 

Ikuallannaveersaartitsinermi periusissiakkut siunertaasoq tassaanngilaq naatsorsukkat saqqummiutissallugit, ilisimatitsiviussaarli sanaartukkamut tunngassuteqartunik kiisalu illuliami suut sumut atornissaannik piumasaqaatit

naapertorlugit ikuallattoorneq eqqarsaatigalugu piumasaqaatit minnerpaaffissaannik.

 

Ikuallannaveersaartitsinermi periusissiaq sanaartortitsisumit aammalu

ikuallattoornissamut siunnersortimik atsiorneqarsimassaaq sanaartornermut akuersissutip tunniunneqarnissaa sioqqullugu.

 

Ikuallattoqarnerani pilersaarut / titartagartat

Ikuallattoornissamut paasissutissat titartagartaqartuaannarput, tassanilu illup toqqavia titartagartalerneqartarpoq kiisalu inini quleriinni tamani ikuallattoqarnerani iliuusisssanik pilersaarutitaqartarluni. Ikuallannaveersaartitsinermi periusissiaq ikuallattoqarnerani pilersaarummut /

pilersaarutinut innersuussiuaannassaaq. Immikkoortut taaneqartut ikuallattoqarnerani pilersaarummut ilaassapput. Qatserisartoqarnikkut ilisarnaatit eqqortut atukkit. Taakkununnga assersuutissat quppernermi kingullermi takukkit.

 

Titartakkat nutartikkat tamatigut nassiunneqartassapput, taakkununngalu ilanngunneqartassallutik ikuallannaveersaartitsinermi periuissiat nutartikkat - aammalu paarlattuanik. Allannguutit nalunaaqqutserneqarsimasassapput.

Sanaartornermi maleruaqqusat aammalu assersuutinik katersat

Maleruaqqusat atuuttut BR 2006 aammalu ilitsersuutit uani nassaassaappput

Naalakkersuisut

http://naalakkersuisut.gl/da

aamma sanaartukkani ikuallannaveersaartitsineq pillugu DBI-ip assersuutai 2012-imeersut nassaassaapput

Ikuallannaveersaartitsinermi periusissiap aaqqissugaanera

Saqqaa

Ikuallannaveersaartitsinermi periusissiap saqqaani makku ersittariaqarput:

 

·        Sanaartukkap aqqa

·        Allaffigisartagaq

·        Sanatitsisoq

·        Siunnersorti

·        Ulloq

·        Ulloq nutarterneqarfia kingulleq

·        Atsiornerit

 

1. Imaasa allassimaffiat

Titartakkat normui eqqortut aammalu ullut nutarteriviit kingulliit eqqortut innersuussutigikkit.

2. Aallaqqaasiut

Ikuallannaveersaartitsinermi periuseq nassuiarneqassaaq, tassunga ilanngullugu suliariniagaq nassuiarneqassaaq / eqikkarneqassaaq. Tassani allassimassaaq "Sanaartukkanik ikuallannaveersaartitsinermut assersuutit"-ni siunnersuutit malinneqarsimanersut aammalu taakku illup pineqartup ilusilersugaaneranut naapertuunnersut.

 

·        Illu ileqquusut malillugit ilusilersugaava

·        Sanaartoriaatsit atortussallu nalinginnaasumik atugaasartut atorneqarpat

·        Taamaassimanngippat CE-mærkit assilineri imaluuniit sanaartornermi atortut ikuallannermi pissusiinik uppernarsaatit ilanngunneqassapput.

·        Illu angiva, portua imaluunniit qasseersuarnik immikkoortortaqarpa

·        Inuppassuaqartarpa

 

Eqqaamallugu: Allassimassaaq ikuallannaveersaartitsinermi periusissiami malittarineqartoq tassaanersoq assersuutit malinneqarnersut imaluunniit suliariniagaq atorfissaa naapertorlugu aaqqissugaanersoq. Tassunga ilanngullugu aamma allassimassaaq "allamik taasaqartoqartinnagu assersuutit malinneqarnersut" imaluunniit pissutsit taaneqartariaqartut tamakkerlugit nassuiarneqartassanersut.

 

3. Allaassutit

"Sanaartukkanik ikuallannaveersaartitsiniutinut assersuutit"-nit, BR2006-imit imaluunniit ileqquusunit najoqqutanillu atuuttunit allaassutaasut tamarmik NASSUIARNEQASSAPPUT, tassunga ilanngullugu nassuiarneqassaaq isumannaallisaaneq taakkunani isumannaallisaanermut assingusoq qanoq anguneqassanersoq.

 

4. Sanaartukkap atorneqarnera

Illu oqaluttuariuk ikuallattoqarnerani pisussanik pilersaarut init sumiissusiinik nalunaarsuiffiusoq innersuussutigisarlugu.

 

Pissutsit tulliuttut nassuiarneqassapput:

 

·        Atorneqarneranik suussusilersuinerit aalajangersarneqarnerat, tak. BR2006 kap.  6.9-miit 6.19 ilanngullugu.

·        Suliffeqarfiup suussusaa

·        Illumi inuit amerlassusii (ininut ataasiakkaanut qassiussusii taasarlugit aamma pisariaqarpat ataatsikkoornerannik nassuiaat ilanngullugu)

·        Inuit illup aaqqissugaaneranik qimaaffissianillu ilisimanninnerat

·        Inuit angalasinnaassusiat

·        Ulluunerani isersimasartut aamma / imaluunniit unnuaanerani isersimasartut

 

5. Toqqavimmi illup inissisimanera

Illup toqqavimmi inissisimanera oqaluttuariuk makku innersuussutigisarlugit:

 

·        Sanaartorfimmi inissisimanera, tassunga ilanngullugu toqqavimmi qanoq inissisimanera

·        Ikuallattoqarnerani pilersaarut makkuninnga imalik:

 

·        Immikkoorfiit eqqarsaatigalugit ikuallannermik unitsitsivissiat

·        Toqqavimmi ataatsimi illunut allanut sanilliullugu ikuallannermik unitsitsivissiat

·        Ikuattoqarneranut unitsitsivissiaajunnartut inissinneri sannaallu

·        Ikuallannerup tuniluunnera (illu portusooq / pukkitsoq, uinganerit il.il.)

 

6. Qimaaffissiat

Qimaaffissiat nassuiarneqarneri, tassunga ilanngullugu tamakkiisumik silamut qimarngussineq imaluunniit ikuallattoqarnerani pilersaarummi takutinneqartumut illup ilaani isumannaatsumut qimarngussineq, tassanilu makku ilanngunneqassapput:

 

·        Qimaaffissiat inissisimaneri (tassunga ilanngullugu qaqiniarfiusariaqannginnerannik nassuiaat)

·        Torsuut qimaaffissiat ilusilersorneri

·        Tummeqqat qimaaffissiat ilusilersorneri

·        Pisuffiit ungasissusii

·        Matut atitussusii

·        Matut ammarternerisa sammivii assigiisaallu

·        Annanniarluni qimaaffissiat

 

7. Ikuallattoqarnerani isumannaallisaatit illumut ilaavissut

Ikuallattoqarnerani isumannaallisaatit illumut ilaavissut oqaluttuarineqassapput ikuallannermi pilersaarut innersuussutigalugu, tassanilu makku ilaassapput:

 

·        Toqqavimmi tassani illunut allanut qanoq ungasitsiginera

·        Silataata qaliatalu qalliutaasa inissisimaneri sannaallu

·        Ikuallannikkut immikkoortiteriniutit inissisimaffii sannaallu, soorlu ikuallannernik ingerlaqqitsaaliorfiit assigisaallu.

·        Illup iluani iikkat qalliutaat natsisillu.

·        Anillaffissat, matut ikuallannermik unitsivisisat, silaannarissarfiit inissisimaffii sannaallu

·        Illup saarngisa inissisimaffii sannaallu

taakkulu ikuallannermut akiuussinnaassusii                                                                                                                         

·        Illup sannaasa immikkoortuisalu ikuallannikkut qanoq pissusii

·        Allagartalersuinerit nalunaaqqutsersuinerillu

 

8. Ikuallannermut isumannaallisaatit immikkoortut

Ikuallannermut isumannaallisaatit immikkut ittut nassuiarneqassapput ikuallannermi pilersaarut innersuussutigalugu, tassanilu makku allassimassapput:

 

·        Ikuallannermut kalerrisaarutit isumaminnik ingerlasut

·        Tissalukaartartut imminnut isumagisut

·        Putsumut kalerrisaarutit

·        Kalerrisaarinermi atortut - namminneq ingerlasuunngitsut / isumaminnik ingerlasut imaluunniit oqaasiinarmik kalerrisaarineq

·        Ikuallattoqarnerani silaannarissaaneq

·        Silaannarissarfiit ikuallannermut putsumullu isumannaallisarneqarnerat

·        Matut ikuallattoqalernerani namminneq matusartut inissisimaffii sannaallu

·        Qimaanermi uippallernermilu aqqutissat qaammaqqutaat

·        Imermik qatserutit qatserutillu allat

·        Putsumik milluaatit

 

Inissisimaffii qanorlu angitigineri titartakkani ersissapput.

 

MALUGIUK: Atortorissaarutini tamani allassimassaaq ileqqut maleruagassallu suut malillugit taakku suliarineqarsimanersut,

ingerlanneqarnersut aserfallatsaalineqarnersullu.

 

9. Annaassiniartussat annaassiniarnerminni periarfissaat

Annaassiniartut annaassiniarnissamut periarfissaat oqaluttuarineqassapput ikuallannermi pilersaarut innersuussutigalugu,

tassanilu makku allassimassapput:

 

·        Annaassiniartut iserfissaat (matuersaatit qanoq aaqqiivigineqassasut / matuersaataasivik

·        Annaassiniartut illunut tamanut iserfissaat (soorlu ABA-anlæg)

·        Tissalukaarutinik ikkussivissat inissisimaffii

·        Imermik seqqittaammik ikkussivissat

·        Putsup milluarneqarnissaanut periarfissat

·        Ikuallattoqarnera aqutsiviup inissisimanera, toortaaviit, qilaani qorlortunik aqutsivik assigisaallu

 

10. Ingerlatsineq aserfallatsaaliinerlu

Ingerlatsinermut aserfallatsaaliinermullu pilersaarutit nassuiarneqassapput makkuninnga paasissutissartalerlugit

 

·        Ingerlatsinermut akisussaasut qanoq attavigineqarsinnaanerinik paasissutissartalerlugit

·        Sulisunik ilinniartitsineq

·        Ingerlatsinermi maleruagassat, tassunga ilanngullugit nalinginnaasunit allaassutaasut, nalinginnaasunik minitsinerit aammalu pissutsit immikkut ittut

·        Illutat, init, torsuusat tummeqqallu atorneqarnerat. Tassunga ilanngullugit inuit qanoq amerlatigisarnerat, ikuallannermit artorsartitaaneq il.il.

·        Titartagartat, ikuallannermi pilersaarut, isumannaallisaatit allallu

·        Ikuallannermi isumannaallisaatit illumut ilaavissut immikkoortullu nakkutigineqarneranni immersuiffiit, nakkutilliinerit qanoq ittuusut qanorlu akulikitsigisumik pisartut

 

11. Allannguutit allallu

Tassani ikuallannaveersaartitsinermi periusissiami inaarutaasumik ilisimatitsissutigineqassaaq sanaartornerup ingerlanerani allannguutit suut pisimanersut, taakkulu sanaartornermut oqartussaqarfimmit akuerisaanersut.

 

Tassanissaaq ilanngullugit allanneqassapput paasissutissat nutaat / attuumassuteqartut immikkoortunut allannut ilanngunneqarsimanngitsut.

 

Aammattaaq ikuallatsaaliuinermi periusissiaq inaarutaasoq siunnersortimit akisussaasumit sanaartortitsisumillu atsiorneqarsimassaaq, taavalu kingusinnerpaamik sanaartornerup naaammassineranik nalunaaruteqarnermi ingerlatsinermut aserfallatsaaliinermullu pilersaarummut ilanngullugu tunniunneqassalluni.

 

Suliariniakkami allannguutit pillugit sanaartornermi suliassalerisup ingerlaavartumik ilisimatinneqartarnissaa pingaaruteqarpoq.

 

Ikuallatsaaliuineri periusissiap titartagartallu allannguutaat nalunaaqqutsersimassapput.

 

Suliariniakkami allannguutaajunnartut pillugit saaffiginnissutit taamaallaat pisinnaapput ikuallannaveersaartitsineq pillugu siunnersortimit akisussaasumit pisuugunik. Aaqqiissutissat allat pillugit saaffiginnissutit soorlu sanasuneersut akineqartassanngillat.

 

Suliariniakkami allannguutit annertuut sanaartornermut akuersissummi tunngavigineqartunik piujunnaartitsisinnaapput, taamaammallu suliariniagaq nutaamik qinnutigineqartariaqarsinnaavoq sanaartornermullu akuersissummik pissarsiniartariaqarfiusinnaalluni. Taamaammat sanaartornermi akuersissutit suussusii eqqumaffigilluarneqassapput.