Misileraatitut ingerlatsinermi atualersussat aqqanillit Meeqqerivik Angajumeersut katersugaasivimmut pulaarput, qajaq pillugu ilikkagaqarlutik oqaluttuassartaanillu paasisaqarlutik. Pulaarnerat B-23-mi aallarnerneqarpoq, tassani meeqqat iloqqasunngorlutik puisip amianut issaapput piniartup piniutaa qajaq pillugu tusarnaarlutik.
Kingorna B-29-mi saqqummersitanukarput, tassani meeqqat takuaat qaannat sananeqartarnerini sakkut suut atorneqartarnersut. Umiarsualivimmi qajartornermi makittarinnissamut sungiusartarnerit oqaluttuarineqarput, katersugaasivimmullu utermata meeqqat qaannanik titartaapput titartagaannilu allallugu ”Qajaq”.
– Ullaaq ilikkagaqarfiullunilu nuanneqaaq, pulaartussat tullii erinigilereerapagut, katersugaasivimmi perorsaasoq, Tukummeq Ravn Gabrielsen oqarpoq.
Katersugaasivik upernaap ingerlanerani arlaleriarluni misileraatitut ingerlatsissalluni pilersaarpoq. Siunissami meeqqeriviit, atuarfiit ilinniarfiillu sammisat assigiinngitsut tunngavigalugit ilinniartitsisoqarnissaanik inniminniisinnaanngussapput.
– Qajaq aallarniutaannaavoq. Meeqqat inuusuttullu oqaluttuarisaanermik uummaarissumik ilinniartinnissaannut paasisaqarnissaannullu periarfisseerusuppugut, katersugaasivimmi pisortaq, Lasse Meyer oqarpoq.