Arfininngornermi maajip pingajuanni peqatigiiffilerinermik pikkorissaasoqarnerani peqataasut amerlanngikkaluartut pikkorissaaneq suliniutissanik pilersitsiffiuvoq.
-Timersornermi sungiusaasunut kissasseeriaatsit, ilaasortat ukiui apeqqutaatillugit sungiusaariaatsit, timersorluni ajutuunnginnissamut sakkusaat aamma ikiueqqaarneq qulequtaralugit pikkorissaanissaq peqataasunit siunniunneqarpoq. Matumanilu suleqatigiinnik pilersitsinissaq aamma periarfissanik misissuinissaq suliassatut ingerlariaqqiffiussallutik, Kommune Kujallermi Suliniummut Aqutsisoq, Bolethe Stenskov oqaluttuarpoq.
Sungiusaasut pikkorissarneqarnissaasa saniatigut erinarsoqatigiinnik aamma pikkorissaanissaq siunniunneqarpoq, ullumikkummi Narsami erinarsoqatigiit ataasinnanngorsimapput.
-Erinarsornissaq sioqqullugu kissasseriaatsit, aamma nipit sisamat atorlugit erinarsorsinnaanissamut pikkorissaasoqarnissaa siunniunneqartut aapparaat. Matumani Kommune Kujallermi kulturilerinermik suliaqartut qanimut suleqatigalugit pikkorissaanissaq ilusilersorneqassalluni, Bolethe Stenskov nassuiaavoq, nagillunilu.
-Narsami peqatigiiffilerinermik pikkorissaanermi peqataasut pingasuinnaagaluartut pikkorissaaneq suliniutissanik aallarniiffiummat nuannaarutigaara, neriuppungali Narsami pikkorissaasoqaqqilerpat amerlanerusunik peqataasoqarumaartoq, Bolethe Stenskov naggasiivoq.
Arfininngornermi maajip qulingani Nanortalimmi peqatigiiffilerinermik pikkorissaasoqassaaq.