Ilinniarnertuunngortut ukiuni pingasuni ilinniarnertuunngorniareelutik ataasinngornermi juunip 23-anni allagartartaartut ilaatigut borgmesterimit oqalugiarfineqarlutik pilluaqquneqarput.
-Inuiaqatigiinni sullissinermi nunaqqatigut ilinniarluarsimasut atorfissaqarteqigatsigit siunissamut isumalluarfigaassi, killiffissinnilu maligassiuilliarnissinnut qujamasullunga. Allagartarmi pigiligarsi pappiaraannaanngilaq, ilinniaqqiffissarpassuarnummi matuersaataavoq. Alloriaqqittussangornissinni Kalaallit Nunatta siunissaanut ilusilersueqataalluarisi, pilluaqqigitsi ullorsiorluarisilu, borgmester Malene Vahl Rasmussen oqaaseqarluni pilluaqqusinermini ilaatigut taama oqarpoq.
Borgmesterip oqaaseqareerluni Kommune Kujallermiit nersornaat legati 10.000 kroninik aningaasartalik ilinniarnertuunngortut akornanni ilinniartitsisunit maluginiarneqarluarsimasumut tunniuppaa.
Nersornammik tuninineqartoq ukiut pingasut ingerlaneranni ineriartorluarsimavoq, aallarteqqaarnermini oqaaseqarnissaminut tunuarsimaartarsimasoq, piffissalli ingerlanerani ineriartorluarnermini ilinniarnertuunngorniat akornanni ilinniarnerminnik pimoorussinerpaanut ilaalersimasoq, tassaallunilu Nukaaraq Lukassen.