Isumaqatigiissummi suliniut “Ikioqatigiitta” aallaavigalugu ataatsimoortitsinikkut sammisaqartitsinikkullu meeqqat inuusuttullu inuunerisa pitsanngorsaavigineqarnissaat siunertaavoq.
Matumanilu innuttaasut nammineq kajumissutsiminnik najugarisaminni allanngueqataarusuttut ilaqutariittut ataatsimuussusermik attaveqaatinillu pilersitsisarnissaannut ilitsersuunneqqassapput.
-Peqatigiiffik Kalaallit Meerartaat suleqatigalugu isumaqatigiissuteqarnerput nuannaarutigivara. Namminermi kajumissutsiminnik suliaqartut meeqqat inuusuttullu inuunerannik pitsanngorsaaniarlutik suliniuteqarnerat pitsaasuuvoq, kommunitsinnullu inuiaqatigiinnullu tamanut kivitseqataassalluni. Taamaattumik suliniummut matumunnga kommunimiit suleqataanissarput tunuarsimaarfiginngilarput, suliniutillu iluatsilluarnissaanut neriuuteqarluarfigaara, qanorlu inerneqarumaarnera pissangagalugu, Kommune Kujallermi borgmesteri, Malene Vahl Rasmussen oqarpoq.
Suliniut “Ikioqatigiinneq” pillugu isumaqatigiissut 2025-mi maajimiit 2027-mi januaarimut atuuttussatut isumaqatigiissutaavoq.
Isumaqatigiissut una toorlugu atuarsinnaavat.