Asasakka sakkutuut ilaqutaasullu
Ullumikkut Kommune Kujallermi Danmarkip sakkutuujusimasuinut erfalasuliinermut malunnartitsiniarluta katersuuppugut, inuiaqatigiinnut nunatsinnullu annertuumik kiffartuusisimanissinnut nersorinninnitsinnik takutitsiniarluta. Tunniusimanersi sapiissusersilu uagutsinnut inuiaqatigiittut sakkussaavoq nalileruminaatsoq, taaamaattumik tamanna pillugu qujamasulluarnitsinnik takutitsinissarput tamatsinnit pingaartipparput.
Angerlarsimaffik qimallugu kiffartuusiinnanngilasi, minnerunngitsumillu nunaqqatigiinnut toqqissisimanermik nukissamillu tunisisisimavusi. Ilaquttasi qitornasilu tulluusimaarutigilluarsinnaavaassi, pissutigalugu naleqartitanik soorlu akisussaassuseqarnermik, sapiitsuliornermik, ataatsimuussusermillu takutitsigassi, uagut ilinniutigisinnaasatsinnik ineriartortissinnaasatsinnilu.
Ulloq manna nalliuttorfiusup malunnartinneqartalernera Kommune Kujallermut assut isumaqarpoq. Sakkutuunut, sakkutuut ilaqutaannut, kiisalu nunaqqatitsinnut tamanut ataatsimiissusermik nukittorsaasoqarnissaanik tamanna alloriarneruvoq. Takuneqartutut, tusaaneqartutut naleqartinneqartutullu misiginissarsi anguniarlugu, kiffartuusereernissilu kingorna naleqartinneqartutut misiginissarsi anguniarluguttaaq ataatsimuussusermik pilersitserusuppugut.
Inuusutttortagut sakkutooqarfimmut qinnuteqarnissaminnik soqutiginnittut amerliartortillugit inuiaqatigiinnit ataatsimuussuseqarluartunit tapersersoneqarnertik kiisalu kiffartuusereernermi angerlarnerminni tapersersorneqarnertik ilisimassagaat pingaaruteqarluartuuvoq. Maligassiuisuuvusi ilisimasassinnik misilittagassinnilu avitseqatiginnissinnaasut, taamaalillusilu kinguaariit nutaat sakkutooqarfimmut toqqissisimallutik tulluusimaarlutillu appakaanissaannut maligassiorlugillu ikiorsinnaallugit.
Kiffartuusinissinnut, sapiissuseqarnissinnut kiisalu inuiaqatitsinnut nukissamik tunisinissinnut qujanaq. Ataatsimoorluta nukittuumik tapersersuiffiusumillu ataatsimuussusermik pilersitsisinnaavugut, ullormi erfalasuliinermi taamaallaat tapersersuisoqaannarani ingerlaavartumik tapersersuiffiusinnaasumik.