Sapaatit akunneranni uani tamatsinnut attuisumik isiginiagaqassaagut - tassa innarluutilittatsinnut inuiaqatigiittut qanoq pinnittarnersugut. Innarluutillit sapaatit akunnerat aporfissanut tunngasuinnaanngilaq, aammali inuit tamarmik nukissaqarnerat, piginnaasaqarnerat naleqarnerallu nuannaarutigisussaavarput.
Kommune Kujallermi erseqqilluinnartumik anguniagaraarput kikkut tamarmik ilumoortumik akuutinneqassasut. Tassa imaappoq kinaluunniit immikkoortinneqassanngilaq; atuarfimmi, suliffimmi imaluunniit sunngiffimmi. Peqataanissamut aporfissat piiarniarpavut.
Ilisimavarput suliffeqarneq kiffaanngissusermik naleqassusermillu tunisisartoq. Taamaammat innarluutillit pisariaqartitsinerat malillugu tapersersorneqarlutik naleqqussaavigineqarlutillu suliffeqalernissaannut periarfissanik pitsaanerusunik pilersitsiniarpugut, kujataanimi nukissaqartunik tamanik pisariaqartitsivugut.
Aamma akornuteqarani sumulluunniit ingerlasinnaaneq angusariaqarparput. Soorlu illunut, angallannermut kikkunnit tamanit atugaasunut aamma qarasaasiatigut periarfissanut, isumaginninnikkut tapersersorneqarnissamut kommunip isumagisassaanut. Kikkut tamarmik inuiaqatigiinnut akuusinnaassapput.
Aammattaaq isumaginninnikkut aaqqissuussineq nutaaq Nunatsinni atukkanut naleqquttoq sulissutigaarput. Ilisimavarput allamiut suleriaasii uatsinnut tamatigut naleqquttuaannarneq ajortut. Suleriaaseqassaagut innarluutillit ataqqineqartutut misigiffigisaannik, toqqissisimaffigisaannik kiisalu inuttut allatulli periarfissaqarfigisaannik.
Kommunitsinni innarluutilinnut sapaatit akunnerannik aaqqissuinitsinni eqqaasinneqarpugut inuit tamarmik naleqarnerannik aammalu kikkulluunniit puigorneqassannginnerannik. Ataatsimoorluta Kommune Kujalleq, kikkut tamarmik periarfissaqarlutillu inuunermik nalituumik inuuffigisinnaasaat, pilersissinnaavarput.
Qujanaq.
Malene Vahl Rasmussen
Borgmesteri