Randi decembarip aallaqqaataani atorfittaaminut ikkutissaaq taavalu kommunip allaffissorneranut akisussaaffik pingaarneq kiisalu kommunip politikikikkut siunissamullu anguniagaasa piviusunngortinneqarnissaat akisussaaffigilissavai.
Randi Vestergaard Evaldsen 41-nik ukioqarpoq taava inuussutissarsiornikkut politikkikkullu misilittagartuujulluni. Air Greenlandimi attartortitsisarnermut pisortatut atorfimmiit nuussaaq, tassanilu qulimiguulinnik timmisartunillu niuernikkut ingerlatsinermut akisussaasimavoq, soorlu siunissamut sammisumik aningaasaqarnermillu ingerlatsinermut aqutsisuusimalluni, niuerfinnik ineriartortitsineq kiisalu nunatsinni nunallu avataani suleqateqarneq akisussaaffigisimallugit.
Siusinnerusukkut Kalaallit Nunaanni Brugsenimi pisiniartarnermut pisortaasimavoq taavalu Nukissiorfinni pisiniartarnermik isumagisaqarsimalluni, taakkunanilu suliariumannittussarsiuussinerit annertuut, isumaqatigiissusiornerit suleriaatsinillu pitsanngorsaanerit suliarisimallugit. Tamatuma saniatigut oqaatigineqareersutut politikkikkut misilittagaqaqaaq, taamalu politikkikkut aalajangiiniartarnernut tamatumalu kommunimi ingerlatsinermut ineriartornermullu sunniutaanut paasisimasaqarluarluni.
Randi Greenlandic Business Schoolimi nunat tamalaat akornanni niuernermut nittarsaassinermullu ilinniagartuujuvoq taavalu Nordjyllands Erhvervsakademimi takornariartitsineq immikkut sammisaralugu sullissinermut ilinniagaqarsimalluni. Tamatuma saniatigut Kalaallit Airport Holdingimi siulersuisumut ilaasortaasimavoq, tassaniinnerminilu siunissaq isigalugu ataatsimut isiginnittaaseqarnini, aqutsisutsisutut sunniuteqarsinnaassutsi kiisalu suleqateqarnikkut angusaqarsinnaassutsi ilisimaneqaatigai.
– Randip suleqatigilernissaa qilanaaraarput. Siunissamut sammilluni aqutsinermut piginnaasaqassusermik misilittagassusermillu Kommune Kujallermut assut iluaqutaasussamik tunniussaqartussaavoq, atorfininnissaalu kommunalbestyrelsimit tamarmiusumit tapersersorneqarmat assorsuaq nuannaarpunga, Malene Vahl Rasmussen, Kommune Kujallermi borgmesteri oqarpoq.
Randi Vestergaard Evaldsen oqarpoq:
“Kommune Kujallermi kommunimi pisortaaninngornissannut assorsuaq qilanaarpunga. Qamuuna maniguullunga ataqqinnilungalu suliassaq tigussavara - ilisimalluarparalu kommune ilungersuutissaqaqimmat kiisalu assorsuaq periarfissaqarmat.
Ineriartornerup ilorraap tungaanut aallarnissaa pillugu kommunalbestyrelsimik, sulisunik Kujataanilu innuttaasunik tamanik suleqateqalernissannut qilanaarpunga, Kujataatalu nukittoquterpassui periarfissarpassuilu atorluassavavut.
Suliassamut piareersimalluinnarpunga taavalu inuppassuit Kommune Kujalleq najugaqarfissatut, inuuffissatut suliffissatullu kajungernartunngortinniarlugu ullut tamaasa tunniusimallutik suleqataalluartut naapinissaannut qilanaarpunga.
Kujataanut ilaalivinnissara qilanaaraara - ataatsimoorluta siumukarneeq tamattalu kommunitsinnik tulluusimaarutiginnilernissarput toqqammavissiussavarput. ”