Arfininngornermi Oktobarip 18-ianni Qaqortumi arsaattarfiup eqqannguani ilaqutariinnut meeratalinnut inuusuttunullu festivalip ingerlanneqarnerani inuit amerlanerpaaffiini 200-nit ikinnerunngitsut ataatsimoorput.
-Aaqqissuussaq innuttaasunit tigulluarneqarpoq. Ilaqutariinnut meerartalinnut inuusuttunullu pinnguartitsinerit tusarnaartitsinerillu iluatsilluarput. Inuillu ataatsimoorlutik nuannisartut isigalugit nuanneqaat, Kommune Kujallermi Ilaqutariit illuanniit aaqqissueqataasoq, Maali Filemonsen oqaluttuarpoq.
Festivalip Ingerlanneqarnera iluatsillugu skateboardertarfik peqatigiiffik Qaqortoq South Parkiminngaanniit atoqqaarfissiorneqarpoq, innuttaasunullu akeqanngitsumik grilligallertoqarlunilu imeruersaatillertoqarpoq.
-Festivali iluatsilluartumik naammassivoq, naak unnukkut festivalerfiusup eqqaani pisoqaraluartoq. Ataatsimulli isigalugu aaqqissuisut naammagisamaarinnippugut, suliffeqarfippassuillu aningaasaliinermikkut aaqqissuussamut piviusunngortitseqataasut tamaasa qutsavigalugit, Maali Filemonsen aaqqissuisut sinnerlugit oqarpoq.
Festivalip aaqqissuunneqarnissaanut aningaasaliisut tassaapput:
60°North, HK Transport, Qaqortoq El Aps, Qaqortoq Auto Marine, Oliecompagniet Aps, Timi Care Qaqortoq, Great Greenland, Hotel Qaqortoq, Diskoline, Miami BL, Timimut, Mikka, Brugsen, Pisiffik aamma Stark.