Qaqortumi ilinniagaqalernissaq pillugu nittarsaassisoqassatillugu ilinniarfeqarfinniit assigiinngitsuniit siunnersortit ataatsimoorlutik naapittarnerat siullermeerluni siorna pisoq, ukioq manna aammaarluni naapeqatigeeqqittoqarpoq. Naapeqatigiinneq Majoriaq Qaqortup nammineq soqutigalugu aaqqissuussaraa.
-Ilinniarfeqarfiit assigiinngitsut nutaarsiassaateqartarput, taamatullu ilinniarfiit nutaat aamma nutaarsiassaasarlutik. Taamatut naapinnermi aaliangersimasumik qulequtaqanngikkaluarluta oqallittaqaagut, ilisimasanillu nutaanik pissarsiffiulluartumik immersoqatigiittarluta, Kommune Kujallermi Majoriaq Qaqortumi pisortaasoq, aaqqissuisuusorlu Karoline Lund oqaluttuarpoq.
Siunnersortit naapinnerat pissarsiaqarfiulluareertoq, meeqqat aturfiinit, ilinniarfinniillu ilinniartunit aamma illoqarfimmiuniit nittarsaassineq tigulluarneqarpoq.
-Ilinniagaqalernissaq pillugu nittarsaassinerput meeqqat atuarfiini atuartunit annerit, ilinniartunngornianiit aamma illoqarfimmi innuttaasuniit tigulluarneqarpoq, peqataasoqarluarnerami nittarsaassinermut peqataasuniit nuannaarutigineqarpoq. Neriuppunga nittarsaassineq peqataasunit amerlasuunit pissarsiffiulluarsimassasoq, iliagaqaqinnissamullu aqqutissiuusseqataalluni, Karoline Lund oqarpoq.
Ilinniagaqalernissaq sioqqullugu nittarsaassineq Majoriaq Qaqortumiit aaqqissuunneqartoq novembarip taallimaani Campus Kujallermi ingerlanneqarpoq.