Meeqqat, kiisami ulloq qilanaarisarput nalliuppoq, orpiliatta kusanartup ikinneqarfissaa.
Ukiup taarnerpaaffiani qaammaqqutissarput, nuannaarnermik, neriunnermik, qilanaaruteqarnermillu immersuisussaq.
Soorlu aamma angerlarsimaffippassuit igalaavini ullorissat ikitersimasut qaamanermik kialaamillu pajukkaatigut.
Juullip ullui ataatsimoornermik pilersitsisarput, maanilu katersuunnerput ataatsimoorfeqarnitsinnut immitsinnullu susassareqatigiinnitsinnut takussutissaavoq.
Juulli uannut isumaqarnerpaasarpoq asasat ataatsimooqatigalugit piffissaq ataatsimoorfiugaangat.
Juullilli ulluisa puiunaatsut qamani pigilernikuusama ilagaat pissakinnerusunik angerlarsimaffeqanngitsunillu ataatsimooqateqarnerup qanoq nuannaarnermik qujamasunnermillu immiisinnaatiginerat.
Taamaattunik nunaqqatinnut kissaatigerusuppara, kisimiittunik nalunngisaqarutta, ajunngitsuliornermik uummammioqarluta ataatsimooqateqarnissamut tikilluaqqusinissarput.
Juullimi tunissutissanut akisuunut tunnganngilaq, ataatsimoornermili tipaatsuffiuvoq.
Angajoqqaanut kissaatigerusuppara meerartatta juullip ulluini imigassartorfiusumiinnatik eqqissisimatinneqarlutik paarilluarneqarnissaat, ataatsimoornermillu nuannersumik misigitinneqarnissaat.
Utoqqartatsinnut juullip tipaatsunnartuanik kinguariinnut ingerlatitseqqillutik misigititsiuarsimasunut aamma immersuilluarnissarput eqqaamassavarput, piffissatsinnimmi tunisilluta ilalersuisinnaanerput tamanit isumaqarnerpaavoq.
Juullip ullui asanninnerujussuarmik eqqaamasaqarfigisaratsigit qularinngilara misigissuserparujussuit maanna najuuttut.
Ilaqarpugut maqaasisaqartunik, qimagaasimasunillu, taakkutoq aamma asanninnermik tipaatsunnermillu misigitinneqarluarilik.
Orpiliarput kusanartoq qaammaqutissarput tamatta paarilluassavarput.
Nunaqqatigut Kommune Kujallermi illoqarfinni nunaqarfinniittullu tamaasa eqqaavakka, tamassi juullisiorluarnissassinnik kissaallusi sapaassuarmi pilluaqqoqqippassi.