Asasagut Kommune Kujallermi innuttaasut, meeqqerivinni akinik qaffaanissaq pillugu qisuariaatisi paasisinnaavagut, tusarnaarpagullu.
Akinik qaffaanerput Namminersorlutik Oqartussat nalunaarutaanni inatsisinik malinninniarnitsinnik aallaaveqarpoq. nalunaarummi piumasaqaataavoq meeqqerivinnut aningaasartuutaasut 5-10 procentii atuisunit akilerneqartarnissaat.
Massakkut akit atuuttut nalunaarummik malinninngillat, inatsimmilli malinninniarluta nalimassaasariaqarnissaq pisariaqavimmat aningaasartuutaasut 42 mio. koruuniusut 6,9 procentii atuisunit akilerneqartussanngorlugit ukioq nutaamiit qaffaassuteqarpugut, kommunalbestyrelsip tamarmiusup akuerseqataaffigisaanik. Taama aalajangernitsinni atuisuniit 2,9 mio. koruunit ukiumut isertitassatut aalajangiiffigalugit.
Tamanna Kommune Kujallermi meeqqerivinniittunut 348-sunut agguaqatigiisikkanni
ukiumut meeqqamut ataatsimut 8.300 koruuneqassaaq, qaammammut 694 koruunit, ullormullu 33 koruunit.
Isertitalli aallaavigigaanni agguaqatigiisinneri soorunami allatut isikkoqalertarput. Meeqqerivinni akinik qaffaanerput inatsisinik malinninniarnermik aallaaveqaraluartoq, tamanna aamma meeqqerivitsinni pitsanngorsaanissatsinnut sunniuteqassaaq.
Meeqqerivinni nerisaqarnerup kulturitsinnut tulluarsarlugu pitsanngorsarnissaa pilersikkusupparput, qinigaaffimmi matumani meeqqeriviit nanginik pilersuilernissaat anguniarparput, naatsiivinnik nammineq pilersornissamik meeqqerivinni ilinniartitsiviusunik pilersitserusuppugut, pinnguartarfinnik ullutsinnut naleqquttunik pilersitserusuppugut, meeqqeriviillu illutaasa pitsanngorsartuarnissaannik ilaatigut suliniuteqarluta.
Qulaani taaneqartut imaaliallaannaq anguneqarsinnaanngillat, atuisulli akiliutaanut qaffaanissamut tunngavilersuutigineqarsinnaapput, naak aningaasartuutaasut aallaavigalugit naleqqussaasoqaraluartoq.
Nalimmassaanikkut akinik qaffaaneq kommunip aningaasarliorneranik aallaaveqanngitsoq paaseqqunarpoq. Inuuniarnermi ulluinnarni inuuniarneq akisoreersoq qaavatigut artukkerneqarnersi ajuusaarnarpoq, kisianni siunertaq unaanngilaq meeqqat ajornerusumik atugaqalernissaat killormulli siunertaqarnera naggasiutigalugu oqaatigerusupparput.
Kommunalbestyrelsimi suleqatigiit,
Demokraatit Siumullu.