Mehdip akisussaaffigissavai malittarisassanik inatsisinillu malitsitsinermi suliassat pingaarnerit kiisalu inatsisilerinermi kommunimi suliassat nalinginnaasut isumagissallugit. Ingerlatsivitsinni inatsisinik atuuttunik malinninnissaq qularnaassavaa, kiisalu suulluunniit avammut nassiunneqartut inatsisit iluanni pinissaat qularnaassallugu.
Aamma kommunip nammineq malittarisassaasa malinneqarnissaat eqqortinneqarnissaallu Mehdip akisussaaffigissavaa.
- Taama piginnaasaqartigisumik pikkoritsigisumillu atorfinitsitsinerput nuannaarutigaarput, qularinngilarpullu Mehdip suliassaqarfik nukittorsarlugulu ineriartortissagaa taamalu kommune siunissami tamatumuunatigut akisussaaffimminik eqquutsitsisinnaanngussalluni, Kommune Kujallermi pisortaaneq Randi Vestergaard Evaldsen oqarpoq.
Mehdi maanna Qaqortumut tikissimalereerpoq allattoqarfimmilu allaffeqarluni.