Suliatigut qaffasissut sammineqarlutik pikkorissaaneq ingerlanneqarpoq, peqataasullu kajumissuseqarluarsimallutik. Pikkorissarneq tamakkerlugu peqataasut aallussilluarnermik, pikkorissusermik tunniusimalluarnermillu takutitsisimapput. Piffissaq tamakkerlugu najuullutillu peqataalluarsimapput piginnaasanillu ineriartortitserususseqarluarnermik takutitisisimallutik.
Pikkorissartitsineq tamanna Kujataata upalungaarsimaneranut nukittorsaataavoq innuttaasullu isumannaallisarneqarnerannut ilapittuutaalluni. Qatserisartut ilinniarnerminni naammasserlaat Kujataani isumannaallisaanermut pingaarutilimmik inissisimasuupput, inuiaqatigiit akornanni toqqissisimanermik pilersitseqataapput, najukkamilu pingaaruteqarluartut akornanni inissisimallutik. Sulinerat Kommune Kujallermut innuttaasunullu pingaaruteqarluartuupput.
Qatserisartut upalungaarsimanermut nukittoqutaalluarput, kommunimit innuttaasuniillu nersualaarneqarluarnertik tulluusimaarutigilluarpaat.
Qatserisartunut ilanngukkusukkuit, najukkami qatserisarfimmut imaluunniit upalungaarsimanermut pisortamut Asmus Hansenimut saaffiginninnissannik kaammattorneqarputit.
Borgmesterip qatserisartunngorlaat pilluaqqungaarpai, taamattuttaarlu suliniutaannut, tunniusimanerannullu kiisalu inuiaqatigiit isumannaallisarneqarnissaannik sulinutaannut qutsavigalugit.