Tamanna immini assut ilungersunarpoq, kisiannili taassuma oqaasii uppernarsaatitaqanngitsut ilumuunngitsullu Isumaginninnermut Naalakkersuisumit taperserneqarnerat, inuiaqatigiinni tamat oqartussaaqatigiinnerannik aallaavilimmi pissusissamisuunngilluinnarpoq, tassami qaqugukkulluunniit Naalakkersuisuni ilaasortaasut naalakkersuisutut akisussaaffitsik naapertorlugu sulisussaammata, tamanna soorunami aamma Sara Olsvigimut atuuppoq!
Oqaatsit uppernarsaatitaqanngitsut ilumuunngitsullu ima ilungersunartigipput, kommunip aammalu kommunip inuisa akornanni tatigeqatigiinnerannik aseruisinnaallutik, taamatuttaaq oqaatsiminnik ilumuunngitsunik utertinneqanngippata Kommune Kujallermi atorfillit ataqqinassusiannik tatiginassusiannillu assorujussuaq innarliissapput.
2015-mi Kommune Kujallermi suleqatigiinnermiit Inuit Ataqatigiit tunuarniarlutik aalajangermata Isumaginninnermut Ataatsimiititaliami siulittaasuuffik tiguara. Suliassaq oqimaaqaaq, tassami isertugaanngilaq tamatumani nalaani isumaginnittoqarfik sutigut tamatigut ingerlanerlioqimmat. Suliaq tiguinnavilluguli Isumaginninnermut Ataatsimiititaliaq peqatigilluinnarlugu aammalu kommunalbestyrelse tamaat suleqatigalugu peqqissaarulluinnarlugu isumaginnittoqarfiup makiteqqinneqarnissaa sulissutigilerpara, tamannalumi iluatsippoq.
Taamaalillungalu tulluusimaarutgialugu, aammalu Isumaginninnermut Ataatsimiititaliaq tamaat kiisalu Kommunalbestyrelsi tamaat peqatigalugu isumaginnittoqarfiup innuttaasut piumasaannik pisariaqartitaannillu annertuumik tunniussisinnaasoq tullissatsinnut ingerlateqqissinnaanngorpara. Soorunami qaqugukkulluunniit naleqqussaanissaq pisariaqartuassaaq, kisiannili sulisut amerlisimaqaat, ilaatigut meeqqanut inuusuttuaqqanullu tunngasuinnaalluunniit eqqarsaatigigaanni sulisut 70%-inik amerlineqarsimallutik, aammalu 2016-imi suliassaqarfimmut tassunga aningaasaliissutit 10-12 mio. kr.-inik qaffanneqarput.
Taamaammat kommunalbestyrelsinngortussamut suliassanik tunniussinissatsinnik piareersaleruttorfitsinni Ole Mølgaard Motzfeldtip Isumaginninnermut Ataatsimiititaliap suliaanik annertoqisumik aserorsaaniarnera pissusissamisuunngilluinnarpoq.
Debora Kleist Inatsisartunut ilaasortanngornini pillugu Isumaginninnermut Ataatsimiititaliamiit 30. novemver 2016-imi kommunalbestyrelsip ileqquusumik ataatsimiinnerani akuerineqartumik tunuarpoq, tamatumalu kingorna aatsaat 21. december 2016 Isumaginninnermut Ataatsimiititaliap ataatsimiinnerani siullermi Deboramut sinniisutut ilaasortanngorpoq.
Taamaakkaluartorli Ole Mølgaard Motzfeldt Kommunalbestyrelsimut ilaasortatut isumaginnittoqarfimmi aaqqissueqqinnerit, sulisunik amerliliinerit patajaallisaanerillu annertuut pillugit aalajangeeqataasarpoq.
Namminersorlutik Oqartussat Kommune Kujallermi misissuiartorlutik sulineranni kommunip qanoq sulisimanera Ole Mølgaard Motzfeldtimit Sara Olsvigimillu isornartorsiorneqarpoq. Misissuinermi kommunip qanoq inissisimanera ersersilluarumallugu makku nassuiaatiginiarpakka:
Isumaginninnermut Naalakkersuisoqarfiup inatsisitigut misissuisartui 2016-imi 15. aprilimiiit 6. majimut Kommune Kujallermi misissuipput.
2016-imi junimi misissuinermit nalunaarusiassamut missingiut siulleq kommunip tigummaguli aasaq tamaat naalakkersuisoqarfik nalunaarusiaq qassiinik kukkuneqartoq eqqorluanngitsortaqartorlu naqqinniarlugu iluarsiiviginiarlugulu attavigineqartuarpoq.
Kommunip isornartorsiugai ilaatigut naalakkersuisoqarfimmit malinneqarput, nalunaarusiarlu aaqqissorneqarpoq. Aatsaallu aggustip ulluisa 15-ianni 2016 nalunaarusiaq inaarutaasoq kommunip tigummagu kommune suliami ingerlaqqinnissaminut qularnaatsunik toqqammavissaqalerpoq. Nakkutilliisut kommunimut periarfissiipput nalunaarusiaq tunngavigalugu pisariaqarsoriguniuk qanoq iliuuseqarnissaminnik qaammatinik arfilinnik periarfissillugu, periarfissarlu taanna 2017-imi marsip aallaqqaataata tungaanut sivitsorneqarpoq kommunimut qinersinissaq sioqqullugu nalunaarusiamut politikkikkut isummernissaanik kommune periarfissikkumallugu.
Nalunaarusiaq inunnik sullissinermi pitsanngorsaanissamut qassiinik kaammattuuteqarpoq malinneqarnissaat pillugu kommunip nakkutilliisoqarfimmut isumaqataalluinnarfigisaanik.
Tamatuma kingorna qaammatip matuma ingerlanerani aaqqitassat aalajangersimalluinnartut pillugit naalakkersuisoqarfiup nakkutilliisoqarfia misissuiartoqqippoq, maannalu isumaginnittoqarfik nakkutilliisoqarfillu paaseqatigiipput ajornartorsiutit taakku kommunimit suliarineqarmat malersoqqinneqassammatalu.
Nalunaarusiami inerniliussat ilaasa eqqortuussusiat pillugu kommunip naalakkersuisoqarfiullu qassiitigut isumaqatigiinngissuteqarnerat pillugu kommunimi aningaasaqarnermut ataatsimiititaliaq isumagininnermullu ataatsimiititaliaq ingerlaavartumik ilisimatinneqartarput, kisiannili nakkutilliisoqarfiup qaqugukkulluunniit piumasarisimanngilaa nalunaarusiap malitseqartinneqarnera allaffissornikkut pinnani politikkikkut ingerlanneqassasoq.
Aamma eqqumiigeqaara Isumaginninnermut Ataatsimiititaliap qanoq isummernissaa Naalakkersuisunut ilaasortap naalakkiutiginiarsarimmagu. Ataatsimiititaliap nammineq naliligassaraa suut oqaluuserissanerlugit, Isumaginninnermullu ataatsimiititaliaq misissuisoqarnerata ingerlanerani tamarmi aammalu misissuinermit nalunaarusiaq pillugu namminersorlutik oqartussat tusarniaaneranni oqaloqatigineqarnerannilu ilisimatinneqartuartarpoq.
Isumaginninnermut Naalakkersuisup aammalu Ole Mølgaard Motzfeldtip akisussaaffitsik misilittakkatillu tunngavigalugit ilisimasariaqaraluarpaat kommunalbestyrelsimi aammalu isumaginninnermut ataatsimiititaliami ilaasortat tamarmik kommunit aqunneqarnerannut inatsit naapertorlugu piumasaqarsinnaajuarmata kommunip ingerlanneqarnera pillugu politikkikkut oqallittoqassasoq aammalu kommunip allaffissornera pillugu ataatsimiititaliaq aqqutigalugu imaluunniit borgmesterimut saaffiginninnikkut paasissutissanik piumasaqarsinnaagamik. Ole Mølgaard Motzfeldt allaluunniit Nuuk TV-mi oqaaserineqartut sioqqullugit isumaginnittoqarfik pillugu paasissutissanik amigarneraalluni oqaaseqarsimanngillat.
Aamma assorsuaq aarlerinartoqartippara Naalakkersuisoq kiisalu Ole Mølgaard Motzfeldt kommunimut isornartorsiuinerminni paasissutissat eqqunngilluinnartut tunngavigimmatigit: Containerimik sullitat pillugit paasissutissanik imalimmik tammartoqarsimanngisaannarpoq, paasissutissallu eqqunngitsut tamakku sumit pinersut ilisimanngilluinnarpara.
Kommunip illoqarfiini nunaqarfiinilu tamani tatigeqatigiilluni pitsaasumik suleqatigiittoqarnissaa Kommune Kujallermut soorunami pingaaruteqarluinnarpoq, soorunami aamma isumaginnittoqarfimmi taamaattariaqarpoq. Taamaammat nunaqarfinni isumaginninnikkut sullissineq pillugu Ole Mølgaard Motzfeldtip eqqunngitsumik paasissutissiineranik tunngaveqarluni Naalakkersuisunut ilaasortap isornartorsiuinera assorsuaq pakatsissutigaara. Taamaallaat oqarsinnaavunga isumaginninnermut politikkitsinni nunaqarfiit tunulliunneqanngilluinnarput.
Ilanngullugu matumani ilisimatitsissutigisinnaavara, 21. december 2016 aalajangiunneqarmat inunnik isumaginnittoqarfimmit nunaqarfiit angalaarfigineqassasut, taannalu sapaatip akunnerata tulliani aallartinneqassaaq. Nunaqarfinnut angalaarnerni meeqqanik sullissineq qitiutinneqassaaq. Tamatumalu saniatigut Ataatsimiititaliaq pilersaaruteqarpoq piffissami aggersumi kommunemi angalaassalluni. Pilersaarutit Ole Mølgaard Motzfeldt-ip nammineerluni aalajangeeqataaffigivai, Nuuk TV-kkut isornartorsiuinini sioqutingaatsiarlugu!
Kommune Kujallermi sulisuvut, kommunitta toqqissinartuullunilu najoruminartuunissaanik, pingaartumik meerartalinnut, ullut tamaasa sulisartut eqqarsaatigalugit tulluanngilluinnartumik akuersaarneqarsinnaanngilluinnartumillu kommunalbestyrelsimut ilaasortamit, allaallu isumaginninnermut naalakkersuisumit taperserneqartumik saassutarineqarnerat pillugu ajuusaangaarnera matumuuna apuuppara.
Kikkunnut tamanut erseqqissumik oqaatigissavara, inunnik isumaginnittoqarfiup suliai annertuut assut qujamasuutigivagut.
Inussiarnersumik inuulluaqqusillunga,
Karla Egede Bisgaard (S)
Kommune Kujallermi Isumaginninnermut Ataatsimiititaliap siulittaasua
Tusagassiorfitsigut nalunaarut uani aaguk