Tatigilluinnarlugu naatsorsuutigilluinnarparput Kujataani innuttaasunut angallannikkut atugarisaatitaasut pitsanngorsarniarlugit Mùte B. Egede sulissasoq.
Tamanna tunngavigalugu Naalakkersuisunut ilaasortanngorlaamut makkuninnga apeqqutissaqarpunga:
1. Puttasut sissuikkallu allat pillugit arlaqaqisunik assuarnarluinnartunillu nalunaaruteqartoqartarpoq. Tamakku kiap ilaasunut isumannaatsuunissaat akisussaaffigaat?
2. Danmarkimi nunanilu allani kalaallit ilinniartut angalanermi sillimmasiisarnermut aaqqissussap atulersinneranut tunngatillugu ajornartorsiutaalersimavoq aaqqissuussaq taanna malillugu kalaaliunngimmata. Ajornartorsiut taanna qanoq iluarsiniarneqarpa?
3. Maani takornariaqarnermut ingerlatsisut allatulli misigisimapput atugassarititaasut malunnaateqangaartumik ajorseriarsimasut, tamatumunnga pissutaalluni takornariat ingerlaarnerminni silap ajorsinerani unnuisariaqalernissaannut tunngatillugu annertungaatsiartumik inuussutissarsiornermik ingerlataqartut aningaasartuuteqarnerulernissaminnut aarlerinartorsiortinneqaleramik. Ajornartorsiut tamanna iluarsineqarumaarpa?
4. Pisineq pillugu inatsit tunngavigalugu ilaasut nioqqutissamik pisisut nioqqutissallu tunniunneqartup nikingassutaa aningaasanngorlugu tigusussaatitaavaat. Tassa imaappoq qulimiguulimmut ilaasussaagaluarluni angallammut ilaatinneqaruni nikingassutaa aningaasanngorlugu tigusussaavaa. Atuisunut tamanna qanoq qulakkeerneqassava? Tassungalu atatillugu paaserusunnarpoq qanoq ililluni ilaasunut akileraarut utertinneqarnissaanut qulakkeerniarneqarnersoq? Kiisalu aamma isumaqatigiissutip atuutilereernerata kingorna Disko Line-mi akit suli allanngunngikkallarmatali amerlaqisut bilitsinik pisipput. Ilaasut taakku immikkut tamarmik piginneqatigiiffik eqqartuussivimmut tunniutissavaat imaluunniit Naalakkersuisunut ilaasortap qulakkeerniassavaa ilaasut aningaasarpassuit akileriigaat utertinneqarnissaat?
5. Paasissutissiisarnerit isornarluinnarput. Ilaatigut ilaasut qulimiguulimmut angallammullu ingerlaarniartut tassanngaannaq allannguisoqartillugu elektroniskimik malinnaasinnaanngillat soorlu aamma suliffiup avataatigut oqarasuaatitigut attaveqarniarneq ajornaatsuinnaanngitsoq.
6. Disko Line Air Greenlandilu aqqutigalugit ataqatigiissumik inniminniiniarnermi periarfissaqannginnera ajornartorsiutaavoq. Tamakku iluarsiniarlugit suut pilersaarutaappat?
Ajoqusiinerit annikillisarniarlugit aammalumi innuttaasut Kujataanilu inuussutissarsiortut angallannermut tunngasunut tatiginnikkunnaarnissaat pinngitsoortinniarlugu neriuppunga ataatsimut ajornartorsiutigut tigussaasumik iluarsiiffigineqassasut. Tassa utaqqeqqissinnaajunnaarpugut. Maanna iliuuseqartoqartariaqalerpoq!
Akissutissat qilanaaralugu utaqqivarput.
Inussiarnersumik inuulluaqqusillunga
Jørgen Wæver Johansen
Borgmesteri, Kommune Kujalleq