Qinersinermi 2. april 2013-mi Kommunalbestyrelsemut qinigaasut ullumikkut pingasunngornermi 15. februar 2017 naggataarutaasumik ileqquusumik ataatsimiipput.
2013-mi qinersinerup kingorna Kommunalbestyrelsep sulinera aallartimmat Kommune sutigut tamatigut sanngiilliorpoq. Aaqqissuusseqqinnerup kingorna 2009-mi Kommunit kattussuunnerisa kingorna Kommune Kujallermut ajunaarnersuartutullusooq isikkoqalersimavoq.
Aningaasaqarneq ataqatigiinngilaq, kommunip innuttaasunut kiffartuussinera ataqatigiinngilaq, innuttaasunut qajannartumik inissisimasunut kiffartuussineq ataqatigiinngilaq, inuussutissarsiornermik ingerlataqartut inerisaanissaminnut periarfissat annikitsuinnaapput, innuttaasut kommunimit nussornerat annertoqaaq, attaveqaqatigiinneq ataqatigiinngilaq il.il..
Taamaattorli partiit akimorlugit suleqatigiinneq siunnerfigissaartoq, angusaqarluarniarnermik tunaartaqartoq suleqatigiinnerup ingerlalluarnera kinguneqarluarpoq, taamaammat Kommunalbestyrelse tamarmiulluni tulluusimaarluni ullumikkumiit 4. april 2017 Kommunalbestyrelsemut qinersinerup kingorna Kommunalbestyrelsenngorumaartussanut tunniussinissaminut piareersarsinnaanngorpoq.
- Assorsuaq tulluusimaarpunga ajunaarnersuup tungaanut ingerlalersimagaluarneq naammassisaqarluarluta attanneqarsinnaasumut mumisissinnaasimagatsigu. Naak massa unammilligassat siunissatsinniittut suli annertugaluaqisut, pingaartumik attaveqaqatigiinnermut tunngatillugu, Namminersorlutik Oqartussat ingerlatsiviisa suliffeqarfiisalu sinerissamut nussorneqarnissaasa suli timitalersorneqannginnerannut tunngatillugu, taamaattoq sinaakkutassat, sapinngisarput malillugu, kommunalbestyrelsenngortussamut ingerlateqqitassatut pitsaanerpaat pilersissimavagut, taamaammat eqqissilluta qinigaajumaartussanut suliatsinnik tunniussinissatsinnut piareersarsinnaalerpugut, Borgmesteri Jørgen Wæver Johansen, Siumumeersoq oqarpoq.
- IA sinnerlugu nuannaarpunga uagut aamma, naak massa 2016-ip aallartinnerani suleqatigiinnit anissalluta toqqaasimagaluarluta, kommune ingerlalluartoq patajaatsumillu tunngavilik pilersitseqataaffigisimagatsigu, ilaatigut partiit akimorlugit ataatsimiititaliani suleqatigiilluarnerput aqqutigalugu kommunip ingerlanneqarneranik patajaallisaalluarsimavugut. Soorunami isumarput malillugu suli pitsaanerusumik arlalitsigut pitsaanerusinnaagaluarpoq, taamaattorli ataatsimut isigalugu eqqissilluta Kommunalbestyrelsemut qinigaajumaartussamut sulianik tunniussinissamut piareersaaqataasinnaavugut, IA-p gruppiani siulittaasoq Stine Egede sinnerlugu Debora Kleist oqarpoq.
Illuatungeriit neriupput Kommunalbestyrelsinngorumaartoq partiit akimorlugit suleqatigiissinnaanermik piginnaasaqarluarumaartoq:
- Soqutigisat assigiinngissinnaagaluartut qanimut suleqatigiinneq aqqutigalugu kommunip nangittumik inerisarneqarnissaa taamaallaat qulakkeerneqarsinnaavoq. Taamaammat ataatsimoorluta kommunalbestyrelsenngorumaartussamut kaammattuutigissavarput politikkikkut silaannaq pitsaasoq pilersissimasarput ingerlatiinnaqqullugu, borgmester Jørgen Wæver Johansen aamma IA´p gruppiani siulittaasoq Debora Kleist isumaqatigiillutik kaammattuuteqarput.
Kommunalbestyrelsip ullumikkut ataatsimiinneranit imaqarniliaq naammassippat akuersaarneqarpallu Kommune Kujalliup internetsikkut nittartagaani tamanut saqqummiunneqarumaarpoq.