Nanortallip Katersugaasivia 2016-imi ukiaanerani 2017-imilu aasaq tikillugu immikkut piginnaatitaaffeqarluni Jeppe Gitz-Johansenip qalipagaaterpassuinik katersugaanik saqqummersitsivoq, katersugaataalu pingaarnertut ataataata Aage Gitz-Johansenip Qalipaasorsuartut aamma ilisimaneqartup qalipagarai.
Ukioq sivisooq naallugu qalipakkat illoqarfimmi utoqqaat illuanni utoqqarnit sulisuniillu nuannarineqarluarlutik kusassaataapput.
Jeppe Gitz-Johansenip suleqatigineratigut Nanortallip Katersugaasiviata aasaq manna juulip qaammataani aggustillu aallartilaarnerata tungaanut qalipakkat katersugaasivimmi saqqummersippai.
Jeppe Gitz-Johansen nammineerluni NAPA-p tapiineratigut ornigulluni oqalugiarpoq ataatamilu suliaanik ilisarititsilluni.
Ilanngullugu Jeppe Gitz-Johansen ujaqqamik eqqumiitsuliamik tunissuteqarpoq, sumiiffimmi aalajangersimasumi ujaqqamik aalajangersimasaminik qiperuilluni illoqarfimmik kusassaanermut tapiissutigisaa.
Illoqarfimmiut takornariallu soqutiginnittut saqqummersitsinerup nalaani katersugaasivimmut alakkaasarput. Saqqummersitsinermi postkortinik Gitz-Johansenillu qalipagai assilillugit plakatilianik pisisoqarsinnaavoq.
Jeppe Gitz-Johansen saqqummersitsiviit silataanni qiperuinerata nalaani ujaqqap inissinneqarallarfiani sulivoq. Soqutiginnittorpassuit alapernaallutik alakkaasarput Jeppep ujaqqamik qiperuinerani isiginnaariartorlutik. Tassunga atatillugu inuppassuit eqqumiitsuliortumik oqaloqateqartarput akianilu saqqummersitsivimmi ataataata eqqumiitsuliai takusarneqartarlutik.
Ujaqqamik eqqumiitsuliaq
Ujaqqamut kalaalerpaluttut qiperorneqarsimapput, soorlu sassuma arnaa, qilaat, puisi uumasorlu oqaluttuatoqqaneersoq. Qiperukkat qanoq paasineqarsinnaaneri pillugit allakkiortoqassaaq.
Oqalugiarnerit
Jeppe Gitz-Johansen katersugaaasivimmi ammaanersiorluni oqalugiarpoq aammattaaq kaffimik, tamulugassanik imermillu sassaalliisoqareermat saqqummersitsineq qanimut qimerloorneqarpoq.
Orniguttut qalipakkanik misissuereermata katersugaasivik saqqummersitassanik ammaanermut atatillugu, atuakkamik Nanortalimmut tunngasumik Jeppe Gitz-Johansenimut tunissuteqarpoq.
Utoqqaat illuannut pulaarneq
Aammattaaq Jeppe Gitz Johansen utoqqaat illuanut pulaarpoq utoqqarnullu ataatami inuunera eqqumiitsuliaalu pillugit oqaluttuarluni.
Ujaqqamik eqqumiitsuliamik tunniussineq
Ujaqqamik eqqumiitsuliamik tunniussinermi Nanortallip umiarsualivitoqaani katersugaasiviup eqqaani nalliuttorsiorpalaartumik katerisimaartoqarpoq. James Ignatiussen ammaanersiornermi inngerluni takutitsivoq.
Illoqarfiup siulersuisuinut ilaasortaq Nanortallillu pigisaani qinigassanngortitaq Mari Abelsen oqalugiarpoq aammattaaq Jeppe Gitz-Johansen ataatami eqqumiitsuliai namminerlu eqqumiitsuliani pillugit oqaluttuarluni. Ujarak saqqummiunneqareermat qalipakkanik saqqummersitsiviup ilanngullugu ammasup affarliani kaffimik, kaaginik, imermik tamulugassanillu sassaalliisoqarpoq. Jeppe Gitz-Johansenip oqaluttuaraa ujarak INUA-mik atsersimallugu qiperukkamilu eqqarsaatsit suut atorsimanerlugit nassuiaatigalugit.
UJARAK 'INUA'
Jeppe Gitz-Johansen Bornholmimi najugaqarpoq eqqumiitsulianillu katersugaasiviuteqarluni. Gitzip nittartagaani paasisaqarnerugit:
https://gitz-johansen.dk/ og https://gitz-johansen.dk/jeppe-gitz-johansen/
Ujaqqap oqaluttuassartaa
Ujaqqami uumasoq oqaluttuatoqqaneersoq erserpoq taassumalu inuit nunarsuarmi qanoq pissuseqarnerannik kiisalu avatangiisinut imminnullu aseruutaasumik pissusilersornerannik ersersitsivoq.
Sassuma arnaata takusani amiilaaralugit qimaavoq. Angakkoq ajornartorsiutinik aaqqiiniarluni sassuma arnaataa nujaanik illaarsisoq ilanngulluni qimaavoq. Tumii qilaallu katassimasaa taamaallaat takussaapput. Sassuma arnaata uippakajaarluni katu tigoriarpaa annanneqarsinnaasut annariaraluarlugit pissutsinullu ilisarnartunut eqqissisimanartunullu uteriaraluarluni. Suut tamarmik isumaaruttutut ipput - taamaattorli sassuma arnaata naartunermigut siunissamut neriuuteqarneq ersersippaa, silarsuaq nutaaq pitsaanerlu pilersinneqassammat naligiissutsimik pitsaasumillu inooqatigiinnermik pilersitsilluni.