Suliniut Sanasa maannakkut Narsami Majoriaq Narsamilu atuarfik qanimut suleqatigalugit ingerlanneqaleruttorpoq.
Majoriamiit inuusuttut maajip qaammataani illoqarfiup katersortarfiani 100 kvadratmeterinik angitigisumik pikkunartumik eqqumiitsuliorput. Ulluni makkunani Konrad Nuka Godtfredsenni nunarsuarmi Andalamik qalipagaq tegneserianeersoq anginerpaaq Narsap atuarfiata aulaani qalipaleruttorpaa. Eqqumiitsuliaq suliniummut Sanasamut ilaavoq, taannalu ukioq manna Narsami ingerlanneqarpoq.
Suliniutip Sanasap siunertaraa inuusuttunik isumassarsiortitsinissaq taakkulu takutillugit inuussutissarsiornermik ilinniarfiit soqutiginartut nutaaliorluarfiusinnaasut toqqarneqarsinnaasut. Narsamilu isumassarsiornerit marsimi workshopertitsinerit aallartinneraniit maannamut ingerlalluarsimapput. Majoriami inuusuttut ilinniartitsisortik pikkorissut tunniusimasullu suleqatigalugit illoqarfiup katersortarfiani mikisunik peqqissaartunik qalipaariaatsinillu nalunartunik qalipaanissartik aallartisarsimavaat.
Majoriaq Narsaq nunaqqatigiillu siunnersoqatigiivi suleqatigalugit illoqarfimmi issiviit qulit nutaat aqqusinermi eqqumiitsuliorfigalugit qalipanneqarsimapput.
Sassuma Arnaanillu qalipakkatut allagartarujussuaq suliarineqarpoq, taanna sissiukkap eqqaaniittoq Permagreenip orsiisarfiata silataani Narsamut tikilluaqqussutitut inissinneqassaaq. Suliffeqarfiup inuiaqatigiinnut akisussaassuseqarluni tapersiinera illoqarfiup kusassarneranut Konrad Nuka Godtfredsennillu atuarfiup aulaani anginerpaamik Andalamik qalipagarujussualiorsinnaaneranut periarfissiivoq.
”Nunanni Narsami Andalamik qalipagarujussualiama naammassinissaanut qilanaaqaanga. Taamak angitigisumik assilissamik suliaqarnissaq pissanganassaaq. Angisuumik aqqusinermi eqqumiitsuliornissaq sivisuumik kissaatigisimavara, taammaasilluni kissaatiga piviusunngulerpoq - nunanni peroriartorfinni Narsami pissaaq, inuusuttuaraallunga graffitinik titartaaffigisarsimasanni - haha" Konrad Nuka Godtfredsen oqarpoq.
Qalipatassaa eqqumiitsuliat angisuut Narsap atuarfiani aggustip ingerlanerani suliarineqartussat aapparissavaat.
Qalipatassaata aappaa atuagaateqarfiup illutaata isuani sananeqassaaq.
Tassani Narsaminngaaneersoq inuusuttoq eqqumiitsuliortoq Egede Godtfredsen nammineq suliaminik qalipaassaaq.
Suliniut Sanasa ingerlanneqarsinnaasimavoq Majoriaq Narsaq, Kommune Kujalleq, Permagreen Narsaq, Air Greenland qanimut suleqatiginerisigut, taamatuttaaq Oak Foundation Denmark aningaasatigut akissarsiassanut atortussanullu il.il. tapersiinera tunngavigalugu.
Qalipagarpassuit nutaat pingasunnorneq aggustip 28-anni nalunaaqutaq 14 – 16 Narsap atuarfiani saqqummersinneqassapput, tassani illoqarfimmi inuussutissarsiutinut ilinniarfik Inuili kalaallit nerisassaataanik naammasseriaannarnik igassapput - kikkut tamarmik tikilluaqqusaapput.
Attaviginninnissamut paasissutissat:
Suliniummi aqutsisoq: Heidi Zilmer, heidi@zilmers.com, +299 278936 & +45 60136029
Majoriaq Narsaq: Karla Bisgaard, Kabi@kujalleq.gl, +299 381512 & +299 538159
Eqqumiitsuliortoq: Konrad Nuka Godtfredsen +299 564645