Narsami Utoqqaat illuanni Luuvikasimmi pissutsinik assigiinngitsunik isorinnilluni Ombudsmandip nalunaarusiaa tusagassiorfitsigut ulluni kingullerni sammineqarpoq.
Ilaatigut naatsorsuutigineqarpoq ileqqaarniarneq pissutigalugu assersuutigalugu nangisinissamut aningaasat naammattut pigineqarsimanngitsut.
2018-imi Kommune Kujalleq ilaatigut Luuvikasimmi nangersiniutissat eqqiarnermullu atortussarsiniutissat 2.5 mio. kr.-iusut 80%-ii sinnilaarlugit atorpai. Taamaammat ileqqaarniarneq pissutigalugu aningaasat nangersiniutissat amigarnerinik ilimanniineq eqqortuunngilaq.
Missingiinerup takutippaa 2019-mi aamma taama pisoqassasoq, tassa maannamut (22.10.2019) aningaasat 1,9 mio. kr-it ilaatigut nangernik eqqiluisaarnermilu atortunik allanik pisiniarnermut atugassanit 1 mio. kr. sinneqalaartut atorneqarsimapput. Tassa, 2019-mi atuineq naatsorsuutigineqarpoq 1.4 mio. kr. missaanniissasoq, tassa aningaasat immikkoortinneqarsimasut 74%-iisa missaat atorneqarsimassasut. Aamma taamaammat pisiniarnissamut, ilaatigut nangersiniarnissamut aningaasat naammattut 2019-imi immikkoortinneqarsimapput.
Aamma ilimanniunneqarpoq Utoqqaat illuanni sulisut ikippallaarsimasut.
Kalaallit Nunaanni sumiiffinni qassiini najugaqartut isumagisariaqassusiinik uuttuutit nunat tamalaat atorneqartut atorneqartarput. Uuttuut atorlugu najugaqartut isumagisariaqarsusiat tunngavigalugu sulisut pisariaqartinneqartut amerlassusii aalajangiunneqartarput. Uuttuut taanna naapertorlugu Luuvikasimmi sulisut 24,6-iusussaapput, taakkunanngalu sulisut 19,6 isumagisariaqartunik sullissisuussallutik. Massakkulli sulisuusut 39-iupput, taakkunanngalu 26 isumagisarialinnik isumaginnittut sulipput taartaasartuullutillu, taamaammat Luuvikasimmi sulisut naammattumik amerlassusilerneqarsimapput.
Taamaammat niuernikutissanik ileqqaartoqarsimananilu ikililerisoqarsimanngilaq, sulisunilluunniit ikililerisoqarsimanani.
Oktoberip ulluisa 22-ianni ”Qanorooq”-mi saqqummiunneqarpoq Ombudsmandip nalunaarusiaa pillugu kommune attavigineqarsinnaasimanngitsoq.
Oktobarip ulluisa 21-ianni KNR Radiop saaffiginnissutaata saniatigut allanik tamanna pillugu saaffiginnittoqarsimanngitsoq kommunip oqaatigisinnaavaa.
Kisiannili qularutigineqassanngilluinnarpoq isornartorsiuineq kommunip pimoorulluinnarmagu. Ombudsmandip tikeraarnerata kingorna ilaatigut utoqqaat illuanni aqutsineq pitsanngorsarniarlugu, sulisut kajumissuseqarnerulersinniarlugit, suliassat sammineqalersinniarlugit, kontuni assigiinngitsuni aningaasanik atuisinnaaneq siammarniarlugu, piginnaanngorsaaniarluni kiisalu sulisunik ilinniarsimasunik amerlanerusunik pissarsiniarluni taamalu najugaqartut pitsaanerusumik ikiorneqartutut misigilersinniarlugit iliuuseqartoqarsimavoq.
Sukumiinerusumik paasisaqarumalluni isumaginninnermut pisortaq Boris Klarsgaard oqarasuaatikkut 64 53 52-ikkut attavigineqarsinnaavoq.